Kalaallit Nunaanni suliffeqarfiit annersaat, Royal Greenland, siorna ukiup affaanut sanilliullugu 2025-mi ukiup affaani siullermi isertitaqarluarnerusimavoq.
Aalisarnermut suliffeqarfissuaq, Namminersorlutik Oqartussanit 100 procentimik pigineqartoq, 2025-mi qaammatini arfinilinni siullerni kaaviiaartitani 2,6 milliardit koruuniusuni akileraarutit suli ilanngaatiginagit 11 millionit koruuninik amigartooruteqarpoq. Suliffeqarfissuaq 2024-mi piffissami tassani akileraarutit suli ilanngaatiginagit 59 millionit koruuninik amigartooruteqarpoq.
Kalaallit Nunaanni suliffeqarfiit annersaat, Royal Greenland, siorna ukiup affaanut sanilliullugu 2025-mi ukiup affaani siullermi isertitaqarluarnerusimavoq.
Aalisarnermut suliffeqarfissuaq, Namminersorlutik Oqartussanit 100 procentimik pigineqartoq, 2025-mi qaammatini arfinilinni siullerni kaaviiaartitani 2,6 milliardit koruuniusuni akileraarutit suli ilanngaatiginagit 11 millionit koruuninik amigartooruteqarpoq. Suliffeqarfissuaq 2024-mi piffissami tassani akileraarutit suli ilanngaatiginagit 59 millionit koruuninik amigartooruteqarpoq.
Tamanna 2025-mi ukiup affaanut siullermut naatsorsuutini ullumi saqqummiunneqartuni erserpoq.
Ukiup affaa siulleq tassaavoq aalisakkanik qalerualinnillu aalisarfiusoq, ukiullu affaa kingulleq tassaalluni aalisakkat nunarsuaq tamakkerlugu tuniniaavimmut tuniniarneqartarnerat. Royal Greenlandimi ukiup affaa kingulleq ingerlalluarfiunerpaasarpoq.
Naammaginanngitsoq
Royal Greenlandimi pisortaqatigiit siulersuisullu nalunaarusiami ataatsimoorlutik
nalunaarutiminni piffissaq ukioq manna januaarip aallaqqaataaniit juunip 30-anut
akileraannginnermi angusat ima oqaasertalerpaat: “Tamanna eqqortup tungaanut
alloriaqqinneruvoq, ataatsimulli isigalugu suli naammaginarani”.
Aalisakkanut
aallussanut arlalinnut tunngatillugu pissutsit unammillernartut
angusaqarluarnissamut sunniuteqarsimapput. Kisianni
angusarissaarnerulerumalluni pilersaarutip, siorna saqqummiunneqartup,
niuernermilu ajunngitsumik ineriartornerup akileraarutit suli ilanngaatiginagit
angusat siornamut sanilliullugit 48 millionit koruuninik ukiumullu siulianut
sanilliullugit 102 millionit koruuninik pitsanngoriaateqartippaat. Royal
Greenland taama naqissusiivoq.
Kaaviiaartitat appariaateqalaatut
Royal Greenland naapertorlugu ukiup affaani siullermi angusat qaffassimanerat nunani allani politikkikkut pissutsit ilungersunartorsiorfiusut akitsuusiinerlu niuerfinni nalorninartorsiortitsileruttortut nalaanni anguneqarpoq.
Siorna ukiup affaani siullermi 12 millionit koruuninik amigartooruteqaraluarlutik 4 millionit koruuninik sinneqartooruteqaramik pingaarnertut ingerlatsinermi 2024-mi ukiup affaani kingullermi ineriartorneq pitsaasoq 2025-p affaani siullermi ingerlaqqittoq Royal Greenlandip aqutsisui allapput.
2025-mi ukiup affaani siullermi kaaviiaartitat 2.611 million koruuninngorlutik apparialaarput. Siorna ukiup affaani siullermi 2.640 million koruuniupput.
2024-mi akileraarutit suli ilanngaatiginagit 196 millionit koruuninik amigartooruteqarpoq. Royal Greenlandip 2027-mi akileraarutit suli ilanngaatiginagit 250 millionit koruuninik sinneqartoornissaq anguniagaraa. Taamaammat ingerlatseqatigiiffiup amigartooruteqartarnini, ukiumut milliardit arlallit sinnerlugit kaaviiaartitaqarnerminut naapertuuttumik, sinneqartooruteqarnissamut allanngortinniarlugu suli ilungersorpoq.
Sikkorlunnera ajoqutaasoq
Royal Greenlandip aqutsisui naapertorlugit ukioq manna avannaani sikkorlunnera pissutigalugu sinerissap qanittuani qaleralinniarneq ukiup affaani siullermi killeqarpoq.
Aammattaaq Kitaani raajarniarfinni pisat ikiliartuinnarput.
- Peqatigitillugu raajarniarneq kilisaatit marluk amutsivimmiinnerannit sinerissallu qanittuani raajarniarluni Lomur-imut, ukioq kingulleq kivisumut, taarsiulluni Tuulliup aallartinnerata kinguaattoorneranit sunnersimaneqarpoq.
- Upernaaq silap unerisimannginnerata kingunerisaanik nipisat suaannik tunisineq annikippoq
sinerissallu qanittuani saarullinniarneq kingusinaarluni aallartilluni.
- Taamaakkaluartoq qiimmaallannartuuvoq Kalaallit Nunaanni sinerissap avataani qaleralinniarneq saarullinniarnerlu nangittumik patajaatsumik ingerlammat, 2024-imilu Tunumi ammassattassiisoqanngeereertoq ukioq manna ammassanniartoqaqqissimalluni, Royal Greenland nalunaarusiami allappoq.
Kilisaatit nutaaliat
Canadami assagiarsunnik pisaqarluarsimasoq suliffeqarfissuup nalunaarutigaa. Tunisinermi akigitinneqartartut qaffariarsimapput, tassa siorna ukiup affaanut siullermut sanilliullugu 9 procentinik qaffassimallutik.
Kilisaatip nutaap Kaassassup Spaniami amutsivimmit tiguneqarnera ingerlatseqatigiiffiup pisimasutut pingaarutilittut oqaluttuaraa.
Royal Greenlandip kilisaataatiminik ukiuni arlalinni nutarteriniarluni suliniutaa taamaalilluni naammassineqarpoq, ingerlatseqatigiiffimmi ingerlatseqatigiiffinnilu piginneqataaffigisaani. 2 milliardit koruunit missaanniittut katillugit aningaasaliissutigineqarput.
Ingerlatseqatigiiffik nammineq oqaatsiminik oqaatigalugu kilisaatinik nutaalianik siunissami aalisarnissamut tunngavissaalluartunik maannakkut peqalersimavoq.
Royal Greenlandip Kalaallit Nunaanni nunami tunitsiviit ukiuni aggersuni ukkatarinerussavai. Tasiilami aalisakkerivilimmik ukioq manna siusinnerusukkut tunitsiviulersumik ammaaneq siullertut alloriarneruvoq.
Suli pisortaanissarsiortoqartoq
Jan H. Lynge Pedersen aningaasaqarnermut pisortatut januaarip aallaqqaataani atorfinitsinneqarpoq. Ingerlatseqatigiiffik pisortaanermik atorfinitsitsiniarluni suli inuttassarsiuvoq.
- Taakku tamarmik Kalaallit Nunaanni allaffeqassapput, taamaaliornikkullu aqutsisoqarnerup Kalaallit Nunaanni aallaaveqarnerunissaata nukittorsarneqarnissaanik anguniagaqarneq timitalerniarneqarpoq, Royal Greenland allappoq.
Jan H. Lynge Pedersen Kalaallit Nunaanni najugaqarpoq. Siulersuisut Susanne Arfelt Rajamand, taamani 49-nik ukiulik Sverigemi Malmømi najugalik, pisortaanertut februaarimi soraarsippaat. Taanna ukiuni marlunni pisortaanertut atorfeqarpoq.
Taamanimiilli Preben Sunke pisortaanerugallarpoq. Suliffeqarfissuarmili pisortaanertut atorfinivinnissangatinneqanngilaq.
Jan H. Lynge Pedersenip Nils Duus Kinnerup, ukiuni 17-ini Royal Greenlandimi aningaasaqarnermut pisortatut suliffeqarfissuup aningaasaqarnermik aqutsisuusimasoq, ukiup nikinnerani taarserpaa.
Tunisassiornermi pisortaq Lars Nielsen ukiuni 18-ini atorfeqareerluni marsimi soraarpoq.
