Royal Greenland KNAPK-mit sakkortuumik isornartorsiorneqarpoq – akerliussutsimik takutitsisut naapinnianngikkaat

Royal Greenlandip aqutsisuisa KNAPK-p akerliussutsimik takutitsisut sisamanngornermi naapikkusunngilai.

Aalisarnermik ingerlatseqatigiiffik sisamanngornermi ullaap tungaani tusagassiuutinut nalunaaruteqarpoq.

KNAPK-p ikummatissap akitsoraluttuinnarneranut akerliussutsimik takutitsinissaq sisamanngornermi ullup-qeqqanut aallartissasoq aarlerisaarutigaa. Nuummili akerliussutsimik takutitsinissaq Royal Greenlandip Nuummi allaffianut aamma pissasoq Royal Greenland politiinit ilisimatinneqarsimavoq.

- Tatiginnikkunnaarsitsisarpoq

Royal Greenland nalunaarummi allappoq eqqissisimasumik akerliussutsimik takutitsisoqarsinnaanera akuerineqartoq, Royal Greenlandilli aqutsisui aalisartut piniartullu kattuffiannit isornartorsiuinermi siunertaassanngitsut.

Royal Greenlandip KNAPK-p iliuusai ima isornartorsiorpai:

- KNAPK-p aaqqiissutissanik ujartueqatigalugu pitsaasumik ataatsimeeqatigisimatillugit misigisimalluta aaqqiissutissamik nassaaliivilluta kingornartigut tusagassiutitigut naapertuutinngitsumik allatut oqariartuuteqarlutik saqqummertarpoq. Oqariartuutinik eqqunngitsunik siammarterilluni.

- Tamanna tatiginnikkunnaarsitsisarpoq oqaloqatigiinnernullu akornutaallunilu, taamaattumillu isumaqarpugut akerliussutsimik takutitsisut naapittariaqarnagit, Royal Greenland allappoq.

Akerliussutsimik takutitsinerup suna siunertarineraa Royal Greenlandip nalornissutigaa. KNAPK-miit nalunaarutigineqartarmat ikummatissap akitsoraluttuinnarnera, aalisarnermut inatsit nutaaq saarulliillu akii naammagineqanngitsut akerliussutsimik takutitsiffigineqassasut.