Royal Greenland nutaamik kilisaatitaartoq

Royal Greenlandip kilisaat nutaarluinnaq ataasinngornermi tiguaa. Taanna suliffissuup kilisaatinik nutaanik sanaartortitsineranik 2019-imi aallartinneqartunit kingullersaavoq. 

Kilisaat pitsaalluinnartoq Spaniami umiarsualiorfimmi sananeqareerluni Royal Greenlandimi inuttanit Nuummut ataasinngornermi tulaanneqarpoq.

Suliffissuaq Namminersorlutik Oqartussanit pigineqartoq tusagassiutinut taama nalunaaruteqarpoq.

Kilisaat nutaaq ilaatigut nioqqutissanik nammineq poortuuteqarlunilu palitsinut ilioraasinnaasoq Royal Greenlandimit paasissutissiissutigineqarpoq.

Teknikkikkut atortorissaarutit nutaat atulersinneranni suleriaaseq pisariitsoq pilersinneqarpoq. Oqimaatsunik kivitsineq annikillisarneqarlunilu avammut nioqqutissat suliarineqartarnerat assigiissarneqarpoq.

Royal Greenlandimi kilisaatit pillugit ingerlatsinermi pisortap Johan Berthelsenip kilisaat siunissamut aningaasaliinertut taavaa:

- Kaassassuk atortorissaarutitigut nutaanik aningaasaliinerinnaanngilaq. Royal Greenlandip Kalaallit Nunaatalu aalisarnerup siunissaanut aningaasaliineruvoq. Tunisassiornikkut annertuumik pitsaassuseqarnissaq isumannaarniarlugu innuttaasullu sulisut atugarissaartikkumallugit kilisaat sanaajuvoq,  Johan Berthelsen oqarpoq.

Imarsiutinik nutarsaaneq Royal Greenlandip ataani siunissaq ungasissoq eqqarsaatigalugu periuutsitigut ingerlatsineq, pitsaassuseq tunisassiornikkullu unammillerneq nukittorsarniarlugu aallarnisarneqarsimasoq Royal Greenland allappoq.

Suliffissuaq ukiuni kingullerni aningaasaqarnikkut ajornartorsiuteqarpoq. 2024-mi akileraarutit suli ilanngaatiginagit 196 millionit koruuninik amigartooruteqarluni. Pisortaasimasoq Susanne Arfelt Rajamand ukioq manna siusinnerusukkut soraarsinneqarpoq, Preben Sunkelu pisortaanerugallartutut ivertinneqarluni.

Kaassassuk pisortatigoortumik septembarimi atserneqassaaq.