Royal Greenlandimi aningaasaqarnermut pisortaq nutaaq toqqarneqarpoq

Royal Greenlandimi aningaasaqarnermut pisortaq, Nils Duus Kinnerup, ukiut 17-it sinnerlugit suliffeqarfimmi sulisimasoq, januaarip aallaqqaataani soraassasoq oktobarimi nalunaarutigineqarpoq.

Royal Greenland pisortanik amerlanernik Nuummi katersuiniarneranut atatillugu soraassaaq, tamannami Naalakkersuisut piumasaqaatigaat.

Ingerlatseqatigiiffik ataasinngornermi nalunaarpoq aningaasaqarnermut pisortassamik nutaamik toqqaasoqarsimasoq. Jan H. Lynge-Pedersen, Namminersorlutik Oqartussat suliffeqarfiutaanni KNI-mi assingusumik atorfeqartoq, pineqarpoq.

- KNI-mi aningaasaqarnermut pisortatut aamma Aningaasaqarnermut Naalakkersuisoqarfimmi naalakkersuisoqarfimmi pisortatut tunuliaqutaqarluni aningaasaqarnermik aqutsinermut, aarlerinarsinnaasunut tunngatillugu suliaqarnermut aamma periusissiorluni pilersaarusiornermut tunngatillugu Jan misilittagaqarlualersimavoq. Tamatuma saniatigut Jan ukiuni arfinilinni Royal Greenlandimi siulersuisuni siulittaasup tulliatut misilittagaqarpoq, tamannalu pissutigalugu anguniakkatsinnut piginnittullu suliffeqarfinnut takorluugaat pillugit ilisimasaqarpoq, Royal Greenland tusagassiuutinut nalunaarummi allappoq.

- Unammillernarnerpaaq

Aningaasaqarnermut pisortaq nutaaq marsip aallaqqaataani 2025-mi atorfinissaaq, Nuummilu qullersaqarfimmiilissalluni. Siulersuisuni siulittaasup Maliina Abelsenip atorfinitsitsineq nuannaarutigaa:

- Janip atorfeqarnini tamaat aningaasaqarnermut periusissiatigullu aqutsinermut tunngatillugu piginnaasani ineriartortissimavai. Tamatuma peqatigisaanik inuiaqatigiinnik kalaallinik, aalisarnermut tunngasunik ilisimasalimmik aamma Royal Greenlandip qanoq inneranik ilisimaarinnittumik aningaasaqarnermut pisortartaassaagut, Maliina Abelsen oqarpoq.

Atorfik "unammillernarnerpaatut" Jan H. Lynge-Pedersenip taavaa:

- Kalaallit Nunaanni aningaasaqarnermut pisortatut atorfik una unammillernarnerpaagunarpoq, tamannalu pissutigalugu atorfik assut uannut pissanganarpoq. 

- Aalisarnermut tunngatillugu soqutiginnittuaannarnikuuvunga aamma Royal Greenland inuiaqatigiinni pingaarutilittut inissisimavoq, soorlu aamma KNI taamaattoq. Inuiaqatigiit piunissaannut suliffeqarfiit Namminersorlutik Oqartussanit pigineqartut qulakkeerinneqataasarput. Naatsorsuutini inaarutaasumik angusanut tunngassuteqaannanngilaq. Assorluta ingerlagaluarlutaluunniit pitsaanerusumik inissisimalerniassagatta killiffitsinnik qaffassaanissarput ammasumillu ingerlatsinissarput uannut pingaaruteqarpoq, Jan H. Lynge-Pedersen oqarpoq.

Namminersorlutik Oqartussat ingerlatseqatigiiffiutaat Royal Greenland 2023-mi 255 millionit koruuninik amigartooruteqareerluni maanna aningaasaqarnikkut pitsanngorsaangaatsiarpoq.