KL

DK

Royal Greenlandip kilisaataataani nunanit allaneersunik amerlasuunik suli sulisoqarpoq

Naak kalaallit amerlanerusut kilisaatini qullersatut atorfeqartinneqarnissaat politikkikkut sulissutigineqartaraluartoq, Royal Greenlandip kilisaataataani nunanit allaneersut amerlassusaat ukiuni kingullerni allannguuteqarpallaarsimanngillat.

Tusagassiortoq
Saqqummersinneqarpoq

Kilisaatini inuttanut piumasaqaatit pillugit Naalakkersuisut nalunaarummik nutaamik naammassinnileruttorput, kilisaatinilu aqumiut 60 procentiinit 90 procentiinut nunaqavissunit inuttalerneqarnissaat tassani pilersaarutigineqarpoq. Politikkikkut anguniagaq nutaaq Royal Greenlandimut suli angujuminaatsuussasoq, paragraf 37 naapertorlugu akissuteqaammi erserpoq.

Royal Greenland ilisimatitsivoq kilisaataatiminni qulingiluaasuni kalaallit aqumiut 127-t atorfeqartut, taakkunannga aquttut 35-t kalaaliullutik. 2019-imit 2022-mut nunanit allaneersut 124-nit 141-nut amerlisimapput, tamanna GFLK-p naatsorsuisimaneranit erserpoq.

Kalaallit naalakkat 14-it

Kalaallit aqumiuinit 127-usunit kalaallit aquttut 35-usut, Aalisarnermut Naalakkersuisup Kim Kielsenip Hans Enoksenimut Naleqqameersumut akissutaani atuarneqarsinnaavoq.

Inuttat pillugit malittarisassat pillugit Kim Kielsen ima allappoq:

- Kalaallit aalisariutaanni inuttalersuisarneq pillugu Namminersorlutik Oqartussat nalunaarutaat nr. 13, 17. november 2011-meersoq naapertorlugu, nalinginnaasumik inuttat tamarmik ukiut kingulliit marluk Kalaallit Nunaanni najugaqarsimassapput akileraartussaatitaasimassallutillu. Tamatuma saniatigut aqumiut 60%-ii ukiut kingulliit marluk Kalaallit Nunaanni najugaqarsimassapput akileraartussaatitaasimassallutillu. llinniarneq pissutigalugu ukiut kingulliit marluk iluanni Kalaallit Nunaata avataani najugaqarsimagaanni, immikkut akuersissummik tunniussisoqarsinnaavoq.

Nalunaarummi aqumiut ima nassuiarneqarput:

  • Angallatip naalagaa
  • Aquttut
  • Igasoq/pilittaq
  • Qaavani sulisut naalagaat
  • Suliffissuarmi pisortaq aamma suliffissuarmi aqutsisoq

Siusinnerusukkut paragraf 37 naapertorlugu apeqquteqaat naapertorlugu Kim Kielsen akissuteqarnermini ilisimatitsivoq juulip qaammataani inuttat pillugit piumasaqaatit pillugit nalunaarut nutaaq tusarniaassutiginiarlugu. "Naammaginartumik angusaqarluarfiusussamillu ikaarsaariarfeqarnissaq pisariaqartinneqassasoq" erseqqissarneqarpoq.

Ukiup nikinnerani atuutilertussaq

Inuttat pillugit malittarisassat nutaat ukiup nikinneranit atuutilissasut, partiit isumaqatigiissuteqartut ukioq manna aningaasanut inatsisissamut aalajangerput.

- Nalunaarutip tusarniutigineqartussap tusarniutigineqarnera naammasseriarpat aamma anguniakkap pineqartup tunngavissai pisariaqartinneqartut pissarsiarisinnaanissaat qulakkeerneqareerpata, ikaarsaariarfissap sivisussusissaa erseqqissarneqartariaqassaaq, Kim Kielsen akissummini allappoq, aammalu "kilisaatini inuttat eqqarsaatigalugit Kalaallit Nunaani najugaqarnissamik aamma najugaqartussaanermik piumasaqaatip aaqqiiffigineqarnissaa aamma pisariaqartoq" ilassutigalugu.

royal greenland naalakkersuisut bemandingskrav erhverv fiskeripolitik grønlandske officerer inuussutissarsiutit

ATORFIIT Se alle jobs

Powered by Labrador CMS