Royal Greenlandip Kunngi Frederik Tokyo-mi naapippaa
Kunngi Japanimi angalanermini apriilip 23.-25.-ni pisortatigoortumik inuussutissarsiornermut siuarsaanermi siuttuuvoq, aaqqissuussaq aqqutigalugu Danmarkimi aningaasaqarnikkut nunat suleqatigiinnerinik siuarsaanissamut inuussutissarsiutinullu arlalinnut tapersersuinissamut suliniutaalluni, tassanilu Kunngip Royal Greenlandip sinniisai naapippai.
Kalaallit Nunaat sammineqarpoq, sapaatip-akunnerani matumani Ataqqinartorsuaq Kong Frederik X Tokyo-mi danskit niuernermik siunnersuisoqatigiivisa pisortatigoortumik peqataaffigisaanni, tassanilu nunarsuarmi pisumi Royal Greenland Kalaallit Nunaat sinnerlugu peqataavoq .
Asseq: Royal Greenland
Danskit suliffeqarfiutaasa peqataasut 19-it akornanni, Kunngip nammineq toqqarpaa marluinnaat oqaloqatigissallugit - taakkununnga ilaalluni Royal Greenland, taama oqaluttuarpoq Royal Greenland nittartakkamini.
Ataatsimiinneq Tokyomi danskit ambassadeqarfianni pivoq, immikkuullaripporlu Nunarput inuiaqatigiillu qitiutinneqarmata. Pisortatiguunngitsumik oqaloqatigiinnermi Ataqqinartorsuup Nunatsinnut aamma Royal Greenlandip nuna tamakkerlugu ingerlatseqatigiiffittut nunatsinni inuiaqatigiinni tunngaveqarluartutut atuuffianut assut soqutiginninnini nuannarinninninilu takutippaa.
Inuussutissarsiutinik siuarsaaniarluni aaqqissuussami Royal Greenlandip Tokyomi Japanimi sinniisui
Asseq: Royal Greenland
Ukiut ikigisassaanngitsut Japanimut suliffeqarfiup attaveqarsimanera aamma kalaallit aalisartut qanoq asiami niuerfinnut ullut tamaasa nioqqutinik pitsaasunik tulluusimaarlutik imaanullu ataqqinnillutik tunisisarnerat pillugu Royal Greenlandimit oqaluttuartoqarnerani Kunngi tunniusimalluarluni tusarnaarpoq.
- Kunngip naapinnera aamma nammineerluni soqutiginnilluni Royal Greenland aamma Nunarput pillugu tusagaqarusunnera misigalugu tulluusimaarnarpoq. Malugilluarsinnaavarput nunatsinnut asanninnera aalisarnermullu ataqqinninnera, Royal Greenlandimi tuniniaanermut pisortaq, Robert Jan Treebus, ataatsimiinnermi Royal Greenlandimut sinniisaasoq oqarpoq.
Piujuartitsineq pillugu isumasioqatigiinnermi Ataqqinartorsuarmit ammarneqartumi nunarsuarmi tamarmi aaqqiissutinut tunngatillugu Issittup imartaatalu atuuffii pillugit oqallinnermi Royal Greenland aamma peqataavoq. Kingusinnerusukkut Kunngip Nunanut Allanut Ministeri aamma Inuussutissalerinermut, Nunalerinermut Aalisarnermullu Ministeri ilagalugit Royal Greenlandip saqqummersitsivia ornippaa, Royal Greenlandimit oqaatigineqarpoq.
