Rubinisiorfik akiliisinnaajunnaarnissamik qinnuteqaateqartoq
Greenland Ruby DK ApS-ip akiliisinnaajunnaarnissani qinnutigaa, tamatumalu saniatigut Greenland Ruby A/S-ip aamma LNS Greenland A/S-ip akiliisinnaajunnaarnissartik qinnutigaat.
Aappaluttumi rubinisiorfik iluarsaqqiinermi tuniniarneqartussat ilagigaat Greenland Ruby ilisimatitsivoq. Inatsisit piumasaqaatillu malinneqarnissaat qulakkeerniarlugu Naalakkersuisut qanimut oqaloqatigineqartut, ingerlatseqatigiiffik ilisimatitsivoq.
Assiliisoq: Dorthe Olsen
Aappaluttumi rubinisiorfik ukiuni arlalinni ajorsaateqarpoq. Aatsitassarsiorfik matuneqarsimavoq, ingerlatseqatigiiffiillu peqataasut annaasaqaaterpassuaqarsimapput.
Maanna iluarsaqqiinermik taaneqartartoq aallartinneqarpoq, akiliisinnaajunnaarnissaq pinngitsoortinniarlugu suliniummut piginnittunik nutaanik nassaartoqarnissaa siunertaalluni. Tamanna tusagassiutinut nalunaarummi Greenland Rubyp ilisimatitsissutigaa.
- Kalaallit Nunaanni rubininik piiaaneq iluatsilluaraluartoq ajoraluartumik suliffeqarfik akiitsuminik akiliinissamut naammattumik isertitaqarsimanngilaq, ingerlatseqatigiiffik allappoq.
Ingerlatseqatigiiffik Greenland Ruby DK ApS Københavnimi Sø- og Handelsrettenimi akiliisinnaajunnaarnermik aalajangiisartunut akiliisinnaajunnaarnermik iluarsaqqiinermik qinnuteqarsimasoq, nalunaarummi aamma ilisimatitsissutigineqarpoq.
Tamatuma saniatigut ingerlatseqatigiiffiit Greenland Ruby A/S aamma LNS Greenland A/S akiliisinnaajunnaarnermik Nuummi eqqartuussivimmut qinnuteqarsimapput.
Tunisinissamik neriuuteqartut
Greenland Ruby allassimavoq iluarsaqqiineq tassaasoq suliffeqarfiup aqutsisui suleqatigalugit akiitsugaqarfinnut suliffeqarfiullu siunissaanut pitsaanerpaamik nakkutilliisut aaqqiissutissarsinissaat. Tamatumani suliffeqarfiup akiitsugaqarfini akilernianngilai:
- Piginnittunut nutaanut, suliffeqarfimmik tamakkiisumik ilaannaasumilluunniit ingerlatseqqittussanut, tunisinikkut nalinginnaasumik iluarsaqqiineq naammassineqartarpoq.
- Tuniniagaqarnermit isertitassat siullertut iluarsaqqiinermit aningaasartuutit akilernissaannut atorneqassapput, tamatumalu kingorna suliffeqarfiup akiitsugaqarfii tamakkiisumik ilaannakuusumilluunniit akilerneqassapput, Greenland Ruby allappoq, aammalu malittarisassat piumasaqaatillu tamarmik malinneqarnissaat qulakkeerniarlugu Naalakkersuisut qanimut oqaloqatigineqartut erseqqissarlugu.
Greenland Ruby naapertorlugu maanna piginnittut, Norgemiut LNS Group, 1,5 milliardit norskit koruuningajaat (948 millionit koruunit missaat) Greenland Rubymut aningaasaliissutigisimavaat, aningaasallu taakku nalikillineqareersimapput.
Greenland Rubyp pigisaanillu, ilaatigut Aappaluttumi aatsitassarsiorfimmik, ujaqqanik erlinnartunik toqqorsivimmik allanillu pigisaanik tuniniaanermi siunnersortissatut suliffeqarfik Alvarez & Marsal toqqarneqarsimavoq.
Namminersorlutik Oqartussat siornatigut inuussutissarsiutinut tapiissutit aqqutigalugit Nalik Ventures aqqutigalugu (siornatigut Greenland Venture) Greenland Rubymut millionilikkaanik aningaasaliisimapput, Nalik Venturesilu ullumikkut Greenland Rubyp 10-15 procentianik piginneqataavoq, suliffeqarfinnut nalunaarsuiffimmi takuneqarsinnaavoq.
