Rubinisiorfik akiliisinnaajunnaarpoq
Aatsitassarsioqatigiiffik Greenland Ruby annaanniarlugu aqutsisut iluatsitsinngillat.
Assiliisoq: Dorthe Olsen
Aggustip qulingiluaani Greenland Rubyp akiliisarnerat unitsinneqartoq nalunaarutigineqarpoq, aqutsisullu aatsitassarsioqatigiiffik ajornartorsiortoq, Aappaluttumi rubinisiorfimmik ingerlatsisoq, annaanniarlugu pilersaarusiulerput.
Annaassiniarnissaq iluatsinngitsoorsimasoq maanna Naalakkersuisut nalunaarput, sapaatip-akunneranilu matumani marlunngornermi ingerlatseqatigiiffik akiliisinnaajunnaarnerarlugu nalunaarutigineqarpoq:
- Ulloq 24. september 2024, Greenland Ruby A/S akiliisinnaajunnaartutut nalunaarutigineqarpoq. Ingerlatseqatigiiffimmi aqutsisut akiliisarnerminnik unitsitsillutik sivisuumik suliffeqarfik annaanniarsarigaluarpaat, kisianni tamanna ajoraluartumik ajornarsimavoq, Naalakkersuisut allapput, inatsisillu maleruarneqarnissaat qulakkeerniarlugu suliaq qanimut malinnaaffigineqarsimasoq erseqqissaatigaat.
Pisisussarsiortut
Nalunaarut naapertorlugu pisisussaasinnaasut arlallit Kalaallit Nunaanni rubininik tunisassiornerup tigunissaanut ingerlateqqinnissaanullu soqutiginnillutik takutitsisimapput. Eqqartuussissuserisut pigisanut isumaginnittussat qanimut suleqatigalugit, siunissami Kalaallit Nunaanni rubininik tunisassiornerup ingerlaqqissinnaaneranut periarfissat maannakkut Aatsitassanut oqartussap misissorpai:
- Soqutiginnittumik pisisussaqassappat, pisisussaq rubininik tunisassiornerup ingerlateqqinnissaanut pisariaqartunik aningaasaqarnikkut piginnaaneqarnersoq teknikkikkullu ilisimasaqarnersoq oqartussat nalilersussavaat, Naalakkersuisut allapput.
Nunatsinni nunanilu allani toqqorsiviit isumannaarniarneqartut
Naalakkersuisoq Naaja H. Nathanielsen (IA) oqarpoq akiliisinnaajunnaarneq tupaallaatiginagu:
- Akiliisinnaajunnaarluni nalunaaruteqarneq taanna tupaallannartutut saqqumminngilaq. Piffissami sivisunerusumi Greenland Ruby A/S-imut tunngatillugu ingerlatat annikilliartuaartinneqarsimapput, kisianni neriuutigineqarsimagaluarpoq Qeqertarsuatsiaat eqqaanni rubininik piiaanermut attanneqarsinnaasumik siunissamillu qulakkeerisumik allatut Greenland Ruby A/S aaqqiissutissarsisinnaassasoq, Naaja H. Nathanielsen oqarpoq.
Pisumi tassani ingerlatseqatigiiffimmi nalillit sinneruttut qulakkeerneqarnissaat, ilanngullugulu ingerlatseqatigiiffiup nunatsinni nunanilu allani toqqorsiviisa isumannaarnissaat pingaaruteqartoq, nangilluni oqarpoq:
- Aatsitassanut oqartussap aaqqiissutissarsinissamut eqqartuussissuserisut pigisanut isumaginnittussat qanimut attaveqarfigaat, nunatsinni nunanilu allani toqqorsivinnik assartuisinnaaneq iliuuseqarfiginnissinnaanerlu ilanngullugit, nalunaarummi Naaja H. Nathanielsen oqarpoq.
