SAS Kalaallit Nunaannut uteqqippoq

Tallimanngornermi nalunaaqutaq 14.39 ualikkut SAS Nuup mittarfittaavanut timmisartorsuarmik Københavnimiit siullermeerluni nunatsinnut tikippoq. SAS-ip Kalaallit Nunaannut uteqqinnera aamma malunnartinneqarpoq. 

Ingerlatseqatigiiffik Københavnimiit Nuummut utimullu sapaatip akunneranut pingasoriarluni timmisartuussissaaq angallaffiuleruttorfimmi. 

SAS-ip pisortaanera, Anko van der Werff, timmisartumi ilaavoq tikilluaqquneqarlunilu Greenland Airports-ip pisortaanit, Jens R. Lauridsenimit. 

Anko van der Werff periarfissaq atorluarlugu Kalaallit Nunaanni ilaquttani peqatigalugu feerialaassalluni, Sermitsiamut oqaluttuarpoq. 

- Umiatsiarniarpugut aammalu arfernik takornarniassaagut neriuppungalu takusaqarumaarluta, tamatumalu saniatigut Ilulissanukassamaarpugut. Taanna tupaallaatigissamaaraluaratsigu, taamaattumik neriuutigaarput meeqqat aviisimi atuarsinnaanngikkaat, taanna oqarpoq. 

Najuuttunut oqalugiarnermini Anko van der Werff-ip erseqqissarpaa SAS suleqatitut tikittoq. 

Tamatumunnga atatillugu pisortaanerup aamma Air Greenlandip pisortaanera, Jacob Nitter-Sørensen oqaaseqalaaqqullugu qaaqquaa nalliuttorsiornermi malunnartitsiviliamut.  

Taavalu allunaasamik qiorsinatik assammillutik aqqummik atoqqaarfissiorput.