Savat savaaqqallu meqquinik atuilluarnissamik suliniut aallartippoq
Savaatilik mersortartorlu suleqatigiillutik savat savaaqqallu meqquinik aallaavilimmik suliniuteqarput. Meqqut pingaarnerusumik nuersagassanngortinneqassapput nuersagassanngortinneqarsinnaanngitsortaalu naggorissaatinngortinneqassallutik.
Savaatilinnut periarfissaq nutaaq sulissutigineqalerpoq, savat savaaqqallu meqquinik tunisassiorneq aallartinneqalermat.
Assiliisoq: Leiff Josefsen
Savat savaaqqallu meqqui 23 tonsit missaat atorneqaratik ukiumut ikuallannneqaannartarput, tassami annikitsukkuutaanik savaatillit tunisassiortarnerisa saniatigut meqqut atorneqarnissaannik periarfissaqanngimmat.
Kisianni savaateqarfiutilik Tupaarnaq Kreutzmann Kleist aamma mersortartoq Hansa Vid Stein Olsen allannguinissaminnik pilersaaruteqarput.
Hansa Sisimiuni najugaqarpoq, Tupaarnarlu Qorlortup Itinnerami kujataani savaateqarfimmi najugaqarluni. Taakku marluk suleqatigiillutik isumassarsiaminnik piviusunngortitsiniarput.
Taakkumi savat savaaqqallu meqquinik atuinissamik piujuartitsisumik nutaaliorfiusumillu aallaavilimmik suliniummik aallartitsipput, siunertarivaallu meqqut nuersagassanngortinneqartassasut nuersagassanngortinneqarsinnaanngitsortaalu naggorissaatiliarineqartassasut.
- Suliniut manna aqqutigalugu savat savaaqqallu meqquinik Kalaallit Nunaanneersunik piujuartitsisumik nuersagassanik tunisassiornissaq siunertarineqarpoq. Meqqut sinneruttut naggorissaatiliarineqartassapput nunaatini, nammineq naatitsinermi naasulivinnilu naasuutinut atorneqarsinnaasut. Periuseq suliniummi atorneqartoq tassaavoq nunani avannarlerni ilisimatusarnikkut angusimasat iluaqutigalugi, ilaatigut naggorissaasiat iisartakkatut ilusillit annertuumik iluaqutigineqarsinnaasut takutinneqareermat, suliniummik ingerlatsisut nassuiaapput.
Tupaarnap ilanngullugu assersuutigalugu oqaluttuarivaa nuersagassat tunisassiallu nunatsinneersut takornarianit piumaneqarluartaraluartut taakkuninngali tunisassiortoqarani, taannalu qilanaarnerarpoq tunisassiaminnik neqerooruteqartalernissaminnut.
Aallarnisarnermi annikitsooriarluni annertusaasoqassaaq
Tupaarnaq Kreutzmann Kleist oqaluttuarpoq aallartinnermi nunaateqarfimminniit meqqunik tunisassiornermik aallartissallutik. Ingerlallualeriarpalli aamma pilersaarutaanerarpaa savaateqarfinnit allanit tigoqqaanissaminnut pilersaaruteqarlutik.
- Savat savaaqqallu meqqui siulliit hundrede kilot arlallit Sisimiunut nassiunneqarnissaat maanna piareerparput, taakku meqqut Qorlortup Itinneraneersut nuersagassiarineqassapput. Tamanna suliniutitta nunatsinni misilinneqarnikuunngitsup timitalerneranik aallartinnitsinnut takussutissiissaaq. Tamatuma saniatigut aamma savaateqarfimmi Qorlortup Itinnerani annertuumik pilersaarutigineqarpoq savat savaaqqallu meqqui nuersagassiarineqarsinnaanngitsortaasa naggorissaasiarineqartalernissaannik, tamaannalu savaatilinnut allanullu annertuumik iluaqutissiissasoq naatsorsuutigaaarput, suliniummik suleqatigiit taamak oqaluttuarput.
Una suliniut Kalaallit Nunaanni savaateqarnermut pissanganartoqarpoq, suliniuteqartullu neriuutiginerarpaat pilersaarut iluatsissasoq taamaalillunilu nunatsinni piujuartitsinermik nutaaliornermillu aallaavilimmik inerisaanissamut peqataalluarumaartoq.
- Savaatilinnut nunatsinnullumi tamarmut piujuartitsinermik aallaavilimmik siunissamik pilersitseqataarusuppugut, suliniutinik aqutsisoq “Uagutsinnik pigisatsinnik atuinikkut ikioqatigiilluta inuiaqatigiinnut tapersersuisinnaavugut avatangiisinillu piujuartitsinermik qitiutitsilluta.”
Nuersagassiat assigiinngitsunik qalipaasersugaassapput. Tassami pilersaarutaavoq aamma pinngortitaq atorluarlugu, soorlu naasut atorlugit nuersagassat qalipaasersorneqassasut.
