SISA pension Polar Seafoodimik piginneqataalerluni pisivoq
SISA Pension 1. oktober 2025 Polar Seafood Greenland A/S-ip piginneqatigiissutaanit 5 procentimik pisivoq.
Polar Seafood Greenland A/S Kalaallit Nunaanni suliffeqarfiit namminersortut annersaat oktobarip aallaqqaataa tikillugu Miki Brønsimit (qeqqani) Lailamillu aamma Bent Friis-Sallingimit pigineqarpoq.Talerpimmit tulleriiaat aappaat tassaavoq SISA-mi siulersuisunut allattoqarfimmi pisortaq Pâviâraq Heilmann. Sisa pingasunngornermi 1. oktober piginneqatigiissutip 5 procentianik pisivoq maannalu piginneqataalerluni.
Pressefoto: SISA
SISA-mmi soraarnerussutisiaqalernissamut aningaasaateqarfimmiittut 44.000-init amerlanerusut maanna Kalaallit Nunaanni suliffeqarfiit namminersortut annersaanni, Polar Seafood Greenlandimi, piginneqataalerput.
Soraarnerussutisiaqalernissamut aningaasaateqarfik 1. oktober aallarnerfigalugu suliffeqarfiup 5 procentianik piginneqataalerpoq, taamaasillunilu suliffeqarfiup oqaluttuarisaanerani avataaneersutut piginneqataasutut siullersaalluni nalunaarsorneqarsimalerluni. Illuatungeriit naatsorsuutigaat SISA ukiualuit ingerlaneranni suliffeqarfimmik piginneqatiginninninni 5 procentimik ilaqqikkumaaraa.
SISA tusagassiuutinut nalunaarummi taama allappoq.
- SISAmi aningaasaliinerup iluanaarutissartai kisiisa eqqarsaatiginagit – nunatsinni suliffeqarfiit qulakkeernissaat aammalu nunatsinni inuussutissarsiutit pingaarnersaata nukittorsarnissaa kiisalu ilaasortatsinnut piginneqataatitsinissaq periarfissikkumavarput.
- Polar Seafood Greenland A/S nunatsinni aalisarnermi annertuumik pingaarutilittut inissisimavoq, suliffeqarfiullu taassuma suli ineriartortuarnissaanut suleqataasinnaanerput tulluussimaarutigaarput, SISA Pensionimi siulersuisunut siulittaasoq Jess G. Berthelsen oqarpoq.
Sukumiisumik misissuineq
SISA-mi pisortap Søren Schock Petersenip erseqqissarpaa pisinissaq sioqqullugu SISA-p Polar Seafood Greenlandip inissisimanera sukumiisumik misissorsimagaa:
- Aningaasaliinissamik aalajangerneq Polar Seafood Greenland A/S-ip sukumiilluinnartumik misissuiffigereerneratigut pivoq, iluanaarutissatullu naatsorsuutigisat eqqarsaatigalugit tamanna aningaasaliinerup aarlerinaateqarsinnaaneranut naapertuuttoq SISA-mit nalilerneqarpoq.
- SISAmmi aningaasaliissuteqartarnera ilaasortat aningaasaataat ataqqillugit nalilersuilluni suliaqarnikkut pisarpoq, pisortaq oqarpoq.
Piginnittoq nutaaq tikilluaqquneqarpoq
Polar Seafood Greenland 2024-mi naatsorsuutit naapertorlugit 119 million koruuninik sinneqartooruteqarpoq. Ingerlatseqatigiiffik Bent aamma Laila Friis-Sallingimit kiisalu Miki Brønsimit pigineqarpoq.
Miki Brøns aamma Bent Friis-Salling ingerlatseqatigiiffimmi pisortaapput, Bent Friis-Sallingillu piginneqataalersoq tikilluaqquaa:
- SISA ingerlatatsinnut piginneqataalernerani nuannaarluta tikilluaqqungaarparput. Aalisarnermut inatsit nutaaq ilungersuullugulu pimoorupparput, SISA-millu piginneqateqalernerup nassataanik ataatsimoorluta nunatsinni pisuussutitta suli amerlanernit iluaqutigineqalernissaannut aqqutissiueqataavugut.
- Nunatsinni aalisarnermik ingerlatsinerup suli nukittorsarnissaanik nalittorsarnissaanillu ineriartortuarnissamik anguniagaqarnitsinni piginneqateqalernerput siunissamut isumalluarfigaarput, Bent Friis-Salling oqarpoq.
