Ilinniartitaanermut
kultureqarnermullu naalakkersuisunngorlaap Demokraatineersup Nivi
Olsenip aningaasaqarnermut akileeraartarnermullu
naalakkersuisuusimasoq Erik Jensen Siumumeersoq eqqissisarpaa.
– Aap,
Naalakkersuisut siuliisa siorna maajimi aalajangerneratut
Saviminilerinermik Ilinniarfiup 2030-mi Nuummiit Sisimiunut
nuunneqarnissaa aalajangiusimavarput.
Ilinniartitaanermut
kultureqarnermullu naalakkersuisunngorlaap Demokraatineersup Nivi
Olsenip aningaasaqarnermut akileeraartarnermullu
naalakkersuisuusimasoq Erik Jensen Siumumeersoq eqqissisarpaa.
– Aap,
Naalakkersuisut siuliisa siorna maajimi aalajangerneratut
Saviminilerinermik Ilinniarfiup 2030-mi Nuummiit Sisimiunut
nuunneqarnissaa aalajangiusimavarput.
Erik
Jensen marsimi qinersisoqarnera kingorna Naalakkersuisullu nutaat
ivertinneqarnerat pissutigalugit ilinniarfiup illoqarfimminut
Sisimiunut nuunneqarnissaanik pilersaarutit
allanngortinneqarsimanersut ernumalluni aperaaq.
Demokraatineersup
Justus Hansenip, Inatsisartunut Kommuneqarfik Sermersuumilu
kommunalbestyrelsimut ilaasortap, Nivi Olsenip paasissutissiinera
eqqissiallaatiginngilaa.
–
Kommunalpolitikeritut
isummissaguma Saviminilerinermik Ilinniarfik Nuummiiginnartariaqartoq
isumaqarpunga, Justus Hansen Sermitsiamut oqarpoq.
Ilinniarfik
ukiuni 50-ini sanasunngornianik ilinniarfiuvoq.
– Nuummi
ukiuni taakkunani atuarfimmi ilisimasat misilittakkallu
ineriartortinneqarluarsimapput, taakkulu Sisimiunut nuunnermi
annaaneqarsinnaapput. Ilinniarfimmi ilinniartitsisut allaffimmiullu
nuunnissaq arlaleriarlutik akerlerisaraat eqqaarusuppara, tamannalu
akuererusunngilaat. Aamma Sisimiuni ilinniarfik nutaaq 352 millionit
koruuninik akeqassasoq, kollegianut aningaasartuutit aamma
matussuserneqartussaassallutik. Nukiit Nuummi ilinniarfiup
ingerlalluarneranut ineriartortitseqqinnissamut atorusunneruakka.
Inissiarujussuup sumut atorneqarnissaa suli nalunartoq
Nuummi Saviminilerinermik
Ilinniarfiup ilinniartunut ineqarfiutaa immikkuullarissumik
orangeanik qalipaatilimmik aneerasaartarfilik pillugu
assigiinngitsorpassuarnik taagorneqartarpoq.
»Sanaartugaq
angisoorsuaq« immaqa tulluarneruvoq, illoqarfimmilu
allanngorartuaannartumi ilisarnaataavoq. Ukiulli tallimat
qaangiuppata inissiarsuaq taanna atorunnaarsinnaavoq, politikkikkummi
aalajangerneq tunngavigalugu Saviminilerinermik Ilinniarfik Nuummiit
Sisimiunut nuunneqartussaavoq.
– Inissiaq
isaterneqassanersoq imaluunniit 2030-p kingorna allatut
atorneqalissanersoq Naalakkersuisut suli isummerfiginngilaat,
Ilinniartitaanermut, Kultureqarnermut, Timersornermut
Ilageeqarnermullu Naalakkersuisoqarfimmi pisortaq Nuka Kleemann
Sermitsiamut oqarpoq.
Ilinniartut
inaat arfineq-marlunnik quleriilik, inummut ataatsimut 34-nik,
inunnut marlunnut 29-nik ilaqutariinnullu aqqanilinnik initaqarpoq.
Quleriit tamarmik ataatsimoorussanik igaffeqarput,
isersimaartarfeqarput, uffarfeqarlutillu anartarfeqarput.
Saviminilerinermut
ilinniarfiup sanianiippoq Maskinistkollegia, taanna inummut
ataatsimut 20-nik initaqarpoq, marlunnik isersimaartarfeqarluni,
marlunnillu uffarfeqarlunilu anartarfeqarluni.
– Sisimiuni
nutaamik Saviminilerinermik Ilinniarfittaassaq atulertinnagu Nuummi
ilinniarfiit kollegiallu qanoq pineqarumaarnersut Naalakkersuisut
aalajangiiffigiumaarpaat, Nuka Kleemann oqarpoq.
kurt@sermitsiaq.gl
Pilersaarutit
naapertorlugit Sisimiuni Saviminilerinermik Ilinniarfik 2030-mi
ammarneqassaaq.
– Ukiuni
tulliuttuni tallimani ilinniartitsisut allaffimmiullu
toqqissisimanavianngillat. Nuunnissaalu qalliartortillugu
ilinniarsimasunik sulisoqarnikkut nuna tamakkerlugu
pisariaqartinneqartunik piginnaasat annaasaqattaarneqalissapput,
tamannalu ilinniarfiup pitsaassusianut unammillernassalluni, Justus
Hansen oqarpoq.
Suli
nalorninartorsiortoqartoq
Nivi
Olsenip neriorsuutaa Saviminilerinermik Ilinniarfimmi allaffimmiunut
qulinut ilinniartitsisunullu 20-nut eqqissiallannanngilaq, naak
Sisimiunut nuunnissaq ukiuni tallimani suli
akueriniartussaagaluarlugu. Sulisut 30-t nuunnissartik kissaatiginagu
arlaleriarlutik oqartarput, tamannalu ukiuni kingullerni
allanngorsimanani. Ilinniarfik Nuummi inuunermut ima akuutigaaq
suliffimmut ilaquttanullu allanut nuunnissaq
piviusorsiornerusorineqarani.
Aquutealaat
qamuteralaallu pillugit ilinniartitsisup sulisullu sinniisaattut
siulersuisuini ukiup aallartinnissaata tungaanut ilaasortap Jens
Peter Jensenip Nuummiit Sisimiunut nuunnissaq pillugu oqallinnerit
peqataaffigai.
– Saviminilerinermik
Ilinniarfiup nuunneqarnissaa ukiuni 30-ni oqaluuseraarput, maannalu
oqallinneq aallarteqqippoq. Naalakkersuisut 2030-mi nutaamik 352
millionit koruuninik akeqartumik ilinniarfeqalissasoq
neriorsuutigaat, maannamulli aningaasanut inatsimmi aningaasanik
immikkoortitsisoqarsimanani. Politikerit neriorsuuteqaraluartut
Nuummi ilinniarfiup siunissaa suli nalornissutigineqarpoq, Jens Peter
Jensen Sermitsiamut oqarpoq.
Ilinniartut
inaat minillugit aki
Sisimiuni
Saviminilerinermik Ilinniarfik 8.800 kvadratmeterisut
angissuseqassaaq, sanaartornerlu 2027-mi aallartinneqarluni 2030-mi
naammassineqassaaq.
Sanaartornermut
missingersuutit suli suliarineqanngillat. Kvadratmeterimut 35.000
koruunit 45.000 koruunillu akornanni akeqassasoq
naatsorsuutigineqarpoq, tassalu 308 aamma 396 millionit koruunit
akornanni; taakku akornanni 352 millionit koruunit inissisimapput.
Nuummi kollegiat marluk Saviminilerinermik Ilinniarfimmut
atassuteqartut sananeqarnikuupput, Sisimiunili kollegiat nutaat
akimut ilanngunneqanngillat.
Kalaallit
Nunaanni Teknikimik Ilinniarfik naalisarlugu KTI tallimanik
immikkoortortaqarfeqarpoq: Sanaartornermik ilinniarfik,
Aatsitassalerinermik ilinniarfik, Ilinniarnertuunngorniarfik aamma
Sisimiuni oqaatsinik ilinniarfik. Nuummilu Saviminilerinermik
ilinniarfik.
2030-miit KTI-p susassaqarfii tamarmik
Sisimiuniilissapput.
