Siumup partiimi allattaanerusimasoq atorfinitseqqikkaa
Ole Aggo Markussen Siumumi allattaanertut februaarip aallaqqaataat 2025 aallarnerfigalugu atorfinitseqqinneqarpoq.
Ole Aggo Markussen Royal Greenlandimi qaammat ataaseq atorfeqareerluni Siumumi allattaanertut uterpoq.
Assiliisoq: Siumut
Ole Aggo Markussen Siumumi partiip allattaaneratut 1. februaari 2025 aallarnerfigalugu atorfinitsinneqaqqippoq.
Partii Facebookimini taama nalunaarpoq.
Ole Aggo Markussen Royal Greenlandimi head of public affairsitut 1. januaarip 2025 atorfinitsinneqarpoq, Royal Greenlandimi politikkikkut kiisalu aalisarnermi inuiaqatigiinnilu soqutigisalinnut attaveqarneranik nukittorsaassalluni.
Qaammat ataaseq suliffeqarfimmi atorfeqareerluni maanna Siumumi partiip Inatsisartuni allaffeqarfianut utertussanngorpoq:
- Piffissami kingullermi nunarsuarmi pisut pisussaaffilerpaatigut, politikikkut sulinerup akornusersorneqannginnerpaalluni ingerlaannarnissaanut, tamatumanilu Ole Aggollu misilittagai ilisimasaalu Siulersuisuunernut, partiip tunuliaqutaanut aamma Inatsisartuni gruppimut naleqartupilussuupput, Siumut allappoq.
Ole Aggo Markussen tusagassiortutut ilinniagaqarsimavoq siornatigullu ilaatigut Nukissiorfinni allattoqarfimmi pisortaasimalluni naalakkersuisumullu allattaasimalluni.
