Sulisut inuusuttuaqqat 72-it siunnersorteqarput

Siunnersorteqartitsinermik aaqqissuussaq iluatsilluartoq Pisiffiup nalunaarutigaa.

Aaqqissuussineq 2022-mi atuutilermalli siunnersuisartut pingasoriaammik amerlisimapput, tallimanit 17-inut amerleriarsimallutik. Pisiffiup pisiniarfiini 50-init amerlanerusuni maanna inuusuttut 72-it siunnersuisartunit ikiorneqarput, Pisiffik tusagassiuutinut nalunaarummi allappoq.

Sulisumik misilittagalimmik siunnersorteqartitsinermik aaqqissuussaq UNICEF suleqatigalugu pilersinneqarsimasoq, inuttut aamma inuussutissarsiortutut, ineriartornissamut, sulisunik inuusuttuaqqanik ikiuinissamik siunertaqarpoq.

Pisortaanerup Per Steen Larsenip aaqqissuussaq tamanna, inuusuttuaqqat suliffimmi atugarissaarnerunissaannut iluaqutaasutut isigisani, naammagisimaarpaa:

- Inuusuttuaqqat pitsaanerpaamik imminnut takutissinnaaqqullugit ikiornissaat anguniagaraarput. Taakkunannga amerlasuut siunissami Pisiffimmi ilinniartunngornissamik aamma sulilernissamik toqqaajumaartut neriuutigaarput, kisianni ingerlalluartut aammalu inuiaqatigiinni inissisimaffinnut pingaarutilinnut inissittut takussallugit aammattaaq nuannaarutigaarput, Per Steen Larsen oqarpoq.

Aaqqissuussaq tamanna aamma sulisunut inersimasunut atuutilersinnissaa Pisiffiup neriuutigaa, misilittakkallu suliffeqarfinnut allanullu ingerlateqqinneqarnissaat pisiniarfiutileqatigiiffiup aamma pilersaarutigaa.

Pisiffimmi sulinermik misilittagaqarneq, ilisimasanik ingerlatitseqqiinissamut piginnaasat, sulinermik nuannarisaqarluarneq aamma piumassuseqarneq malillugit siunnersortit peqqissaartumik toqqagaapput. Suliffeqarfissuup sulisuisa inuusuttuarartaasa 40 %-ii aaqqissuussamut ilaatinneqarput.