Takornariaqarnermut inatsisissaq tapersersorneqartoq

Takornariaqarnermut inatsisissaq oqallisaaqisoq takornariaqarnerup nunatsinni innuttaasunut nunallu aningaasaqarneranut iluaqutaanerulernissaanik siunertaqartoq, takornarialerisunit nunaqavissunit tapersersorneqarluarpoq.

Tamannalu ersersinniarlugu Ilulissani takornarialerisut innuttaasullu 70-it missaasa peqataaffigisaannik ikumatitalisaarluni novemberip 11-iani unnukkut illoqarfimmi ingerlaaqatigiittoqarpoq. Ingerlaaqatigiinnerlu naggaserlugu illoqarfiup qeqqani takornariaqarnermut attuumassutillit arlallit oqaaseqarput.

Unammilleqatigiinneq equngasoq

Takornarialerisut nunaqavissut aamma takornariartitsiviit nunatta avataaniit pigineqartut aningaasaateqarluartullu akornanni unammilleqatigiinneq naligiikkunnaarsimasoq, Ilulissani takornarialerisut nunaqavissut ukiuni kingullerni arlaleriarlutik oqariartuutigisarpaat. Unammilleqatigiinnerullu naligiinnerusup pilersinneqarnissaa ilaatigut siunertaralugu takornariartitsivik Ilulissani suliffeqarfinnit takornarialerinermik suliaqartunit qulingiluaasunit pigineqartoq Ilulissat Excursions ApS ukioq manna pilersinneqarpoq. Suliffeqarfimmillu piginneqataasut Ilulissani inuussutissarsiornermi pingaaruteqarluinnartumik nukittuumillu inissisimasuupput, taakkulu takornariaqarnermut inatsisissaq Kalaallit Nunaani siullermeertumik pilersinneqartussaq, ilaatigut inuit nunatsinni najugallit takornariaqartitsinermi sunniuteqarnerulerlutillu suliffeqarfinnut nunanit allaneersunut unammillersinnaanerulernissaannik qulakkeerinnittussaq, tunngaviusumik tapersersoraat, Ilulissat Excursions ApS-imi pisortaq Jan Cortsen oqarpoq.

Periarfissat pitsaanerulissasut

Takornarialerisut nunaqavissut unammilleqatigiinnerup naligiinnginneranik peqquteqartumik annertuumik unammilligassaqartut tamannalu pissutigalugu aningaasaliinissamut tunuarsimaartoqartartoq, Jan Cortsen oqarpoq. Takornariaqarnermulli inatsit takornarialerisut nunaqavissut kissaataattut isikkoqarluni atuutilissappat aporfiit annikinnerulissasut, taanna isumaqarpoq.

- Takornariaqarnermut inatsisissaq atuutilerpat takornariartitsiviit nunanit allaneersut aningaasaliiumajunnaarnissaat ersissutigineqarpoq.

- Tamannali aamma illuanut saatinneqarsinnaavoq, tassami inatsisissaq atuutilerpat nunaqavissut takornariaqarnernermik inuussutissarsiuteqarnerup iluani maannakkorniit annertunerusumik aningaasaliisinnaalernissaminnut pitsaanerusumik periarfissinneqassapput,

- Taamaattumik takoriaqarnermik inuussutissarsiuteqarnerup iluani equngassutaasut pillugit oqariartuuteqartarsimanigut Naalakkersuisuniit paasineqarlutillu tusaaniarneqarnerulersimasut isumaqarpugut, Jan Cortsen, nulianilu Akisooq Cortsen takornariartitsivimmik Ilulissat Local Guide ApS-imik piginnittuusut, oqarpoq.

Taamaakkaluartoq takornariartitsinermik suliffeqarfinni nunaqavissut 66,6 procentimik piginneqataassuteqartalernissaannik siunnersuutip 51 procentimut appartinniarneqarnera akuerinngitsik, taassuma erseqqissaatigaa.

Ingerlaaqatigiinneq iluatsilluartoq

Takornariaqarnermut inatsisissaq pillugu ingerlaaqatigiinneq akerliussutsimik takutitsinerunngitsoq, akerlianilli tapersiilluni ikumatitalisaarluni ingerlaaqatigiinnerusoq aaqqissuisut erseqqissaatigaat. Ingerlaaqatigiinnermi takornarialerisut, innuttaasut politikerillu peqataapput, taakkununngalu ilaavoq Avannaata Kommuniani kommunalbestyrelsimut ilaasortaq ingerlaaqatigiinnerlu naggaserlugu oqaaseqartut ilaat Bendt B. Kristiansen, Inuit Ataqatigiit.

- Upperivatsigit, takusareerparpullu piginnaaneqarlusilu takornariaqarnermik kivitsisinnaasusi, uagutsinniillu tapersersorneqarnissarsi naatsorsuutigissavarsi.

- Takornariaqarnermik inuussutissarsiuteqarnermut aningaasaliinerulernissassinnut takornariaqarnermut inatsisissap aqqutissiuutissavaasi, taamaattumik suliffeqarfinni nunaqavissut 66,6 procentimik piginneqataassuteqartalernissaannik siunnersuutip 51 procentimut appartinneqarnera ilissituulli akuersaanngilarput, taanna oqarpoq.

Ingerlaaqatigiinnermi inuit 70-t missaat peqataapput aaqqissuussarlu iluatsilluartoq aaqqissuisut oqaatigaat.