Takornariartitsinermut inatsimmik isornartorsiuisut nipaaruttut

Inatsisartut takornariartitsinermik inatsimmik assortuussutaaqisumik akuersinerisa kingorna, ilaatigut nunatsinni takornariartitsinermi qallunaat angalatitseqatigiiffiinit aningaasaliisunillu isornartorsiuineq nipaarutingajavippoq. Ingerlatsisunut ukioq manna Naalakkersuisut takornariartitsinermut inatsisissamut siunnersuutaannut isornartorsiuisuni Albatros Travel nipitunerpaanut ilaavoq. 

Albatros Travel ukiuni kingullerni Kalaallit Nunaannit koruuniluunniit ataaseq anninnagu, Kangerlussuarmi Ilulissanilu millioninik untritilinnik arlalinnik aningaasaliivoq.

Søren Rasmussen, ingerlatseqatigiiffimmi siulittaasuullunilu pilersitsisoq, takornariartitsineq pillugu inatsit Kalaallit Nunaannut, Kalaallillu Nunaanni takornariartitsinermut ajunaarnersuannguussinnaasoq, maajimi Sermitsiamut oqarpoq.

– Aningaasat taakku inatsisimmi nutaami Kalaallit Nunaanni takornariartitsinerup taamaallaat inunnit ingerlatseqatigiiffinnilluunniit Kalaallit Nunaanni angerlarsimaffeqartunit ingerlanneqartarnissaanik inatsimmi nutaami piumasaqarnikkut sukkasuumik tammarsinnaasut, siunnersuummik sakkortuumik isornartorsiuinerminut atatillugu oqarpoq. Takornariartitsinermut inatsisip aningaasatigut kinguneqaatai tassannga erseqqinnerusumik oqaatigineqarsinnaanngillat. 

Albatrosilli utoqqartaa ullumikkut tassanngaannaq nipaarsaaleriasaarpoq, isornartorsiutaasinnaasunillu oqaaseqarumajunnaavilluni.

Tamannalu patsisissaqarluarpoq:

– Arlaleriarluta isumarput, Sulisitsisut, Dansk Erhvervip tusarniaanermilu akissuteqartut tamangajaviinut assingusoq anittareerparput. Sunniuteqarsimanngilarli, taamaammallu itisiliineroqqinnissaq tunngavissaqarsorinanngilaq.

Taama angalatitseqatigiiffimmik Albatros Travelimik pilersitsisoq piginneqataasorlu Søren Rasmussen maanna Sermitsiamut oqarpoq.

 Immikkut akuerineqarnissamut periarfissaq

Inatsisit ulloq 1. januar 2025 atuutilissaaq. Eqqartuussissuserisut Nuna Law LinkedInimi ima eqikkaavoq:

”Inatsit suliffeqarfinnut takornariartitsisunut, Kalaallit Nunaanni takornarianut ulluinnarluni angalanernik, angalanernillu ullunik arlalinnik sivisussuseqartunik neqerooruteqartunut atorneqarsinnaavoq. Inatsisillu hotelinut suliffeqarfinnullu angallassisunut atuutinngilaq.”

Suliffeqarfimmik takornariartitsinermik ingerlatsisunut akuersissuteqarnissamik piumasaqaat eqqunneqartoq, Nuna Law ilanngullugu allappoq. Akuersissuteqartut Kalaallit Nunaanni najugaqartutut inuit allattorsimaffianni nalunaarsorsimallugillu tamakkiisumik akileraartartussaapput. Ingerlatseqatigiiffinni aningaasat piginneqatigiissutit taasisinnaassutsillu 67 procentii inunnit siuliani piumasaqaatinik naammassinnittunit pigineqassapput.

Suliffeqarfiit takornariartitsinermik ingerlatsisut piumasaqaatinut immikkut akuerineqarnissamut qinnuteqarsinnaapput. Immikkut akuersissutit ukiuni marlunni tuuttut tunniunneqartarput, ukiullu marluk angullugit sivitsorneqarsinnaallutik.

Naak inatsit ulloq 1. januar 2025 atuutilersussaagaluartoq, taamaattoq ulloq 1. januar 2027 tikillugu suliffeqarfinnut takornariartitsinermik ingerlataqartunut, inatsisip atuutilerfissaa sioqqullugu inatsisit malillugit ingerlatsisunut atuutissanngitsoq, Nuna Law allappoq.

Juulummut Suulummullu inatsit

Kalaallit Nunaanni takornariartitsineq pillugu inatsit siulleq aamma ”Suulummut Juulummullu inatsit”-mik taagorneqarpoq – tassa Albatros Travelimi piginnittoq Søren Rasmussen Topas Explorer Groupimilu piginnittoq Jørgen Sølvsten Nielsen atsiullugit, taama nittartakkakkut tusagassiivik standby.dk allappoq.

Suliffeqarfiit taakku ukiorpaalunni maaniipput, maanilu millioninik qulikkaanik arlalinnik amerlassusilinnik aningaasaliillutik.

Topasimi siulersuisut siulittaasuat Jørgen Sølvsten Nielsen inatsit pillugu ima oqarpoq:

– Tamanna politikikkut aalajangerneruvoq, taannalu aallaavigisariaqarparput. Soorunami aalajangerneqartut ataqqivagut. Akuerineqartut aallaavigisariaqarpagut, Topasip utoqqartaa Jørgen Sølvsten Nielsen Sermitsiamut oqarpoq.

Suliffeqarfissuaq Topas qallunaanni nunatsinni hotelinut takornariartitsinernullu annertunerpaamik aningaasaliisuuvoq, tassa 350 million koruunit missaannik.

Suliffeqarfissuaq Jørgen Sølvsten Nielsenimit erneranillu pingasunit, Jacob, Lasse aamma Gorm Sølvsten Nielsen pigineqarpoq. Suliffeqarfiup umiarsuaatileqatigiiffik Disko Line tamakkiisumik pigaa, Nuuk Water Taxip affaa pigalugu kiisalu umiarsuit ilaasunik angallassissutit mikisut arlallit aamma pigaat.

Taakku saniatigut Topasip Hotel Icefiord Ilulissaniittoq, Hotel Diskobay Qasigiannguaniittoq, Hotel Disko Island Qeqertarsuarmiittoq kiisalu Igalikumi unnuisarfik pigai.

- Immikkut akuerineqarnissamik periarfissaqarpugut. Taanna takornariartitsinermut inatsimmi takuneqarsinnaavoq, Jørgen Sølvsten Nielsen oqarpoq.

Topas: - Annertuumik allannguinermut uatsinnut kinguneqassanngilaq

Maannamut nunatsinni ingerlaannarsinnaanersi naatsorsuutigaasiuk?

– Aap, arlaatigut. Inatsisimmi piginnittuunermut immikkut akuersissuteqarnissamut uatsinnut periarfissaq, qissimigaagassarput pissutigalugu uatsinnut annertuumik allannguiffiussanngitsoq isumaqarpunga. Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiissitaanermullu Naalakkersuisoqarfimmik oqaloqatigiinnerit pitsaasut ingerlappagut, Jørgen Sølvsten Nielsen oqarpoq.

Allamik isorisaqanngitsoq

Naak Albatros Travel takornariartitsinermut inatsisip saqqummiunneqarnissaa sioqqullugu Kalaallit Nunaannut takornariartitsinermullu inussutissarsiortunut aningaasatigut kinguneqaatissanik pitsaanngitsunik saqqummiussigaluarluni, Albatros inatsisip akuerineqarnerata kingorna oqaatigineqareersutut annertunerusumik isornartorsiutissaqarnani oqarpoq.

- Ukiuni aggersuni hotelinik nutarterinerit maanna ingerlatsisut nangittumik suliarissavagut, tamatumalu saniatigut ungasissumut sammisumik periusissiarput pissutsinut nutaanut nalimmassavarput. Erseqqinnerusumik ilassutissaqanngilanga, Søren Rasmussen oqarpoq.

Albatrosip ilaatigut Ilulissani Hotel Hvide Falk Hotel Kangerlussuarlu pigai, Ilulissanilu angallatinut takornariartaatigut millioninik qulikkaanik marlunnik aningaasaliillutik. Ingerlatseqatigiiffiit Kalaallit Nunaannut amerlasuukkaarluni angalanerni umiarsuarnillu takornariarnermi ingerlatsisuni annerpaanut ilaavoq.

SØMA hotellit

Inatsisartut inatsimmik akuersinerisa kingorna, tassanilu takornariartitsinermik suliffeqarfiit piginnittuisa 67 procentiisa Kalaallit Nunaanni najugaqarlutillu akileraartartuunissaannik piumasaqaatip akuerineqarnerata kingorna, nunatsinni hotelinik piginnittut annersaasa ilaat SØMA, takornariartitsinermik inatsimmik nuannaarinnittorsuunngitsoq, ima oqarpoq:

– Aalajangerneqareerpoq. Taanna aallaavigalugulu sulinitsinni sinaakkutigissavarput. Suliffeqarfitta ilaa kalluarneqartoq annertoorsuunngilaq, hotelinimmi ingerlatsineq takornariartitsinermut inatsimmut ilaatinneqanngilaq. Aalajangernerulli siunnerfianut tunngatillugu tamanna namminersorlutik suliffeqarfiutilinnut aalaakkaasuunnginnermik nalorninermillu pilersitsivoq, SØMA-mi pisortaqatigiit ilaat, attaveqarnermut pisortaq Mads B. Futtrup Sermitsiamut oqarpoq.

SØMA ”nunaqavissunut ingerlatsisunut tapersersuisoq – sinneqartoorutittami tamarmik umiartortunut piffinnilu inuiaqatigiinni siunertanut pitsaasunut ingerlanissaa siunertarigatsigu. Takornariartitsinermimi neqeroorutitsinni Kalaallit Nunaannik piviusorpalaarnerpaamik misigisaqartitsinissatsinni nunaqavissut ingerlatsisut atortaratsigit, peqatigisaanillu piffinni ingerlatsisut namminersortullu suliaqartinneranni takornariartitsinermik piujuartitsisumik pilersitseqataagatta.”

Takornariartitsinermut inatsimmut suliffeqarfiillu takornariartitsinermik ingerlatsisunik piginnittut 67 procentiisa nunatsinneersunit pigineqarnissaannut tunngatillugu ima oqarpoq:

– Taamaammat tamanna sulinermi tassani tassanngaannartumik naalleraanertut misinnarsinnaavoq. Siunissamulli naleqqussarnissatut taamaalillutalu sinaakkutini tunniunneqartuni sulinissatut isigissallugu toqqarparput.

Mads B. Futtrup ima ilassusiivoq:

- Kalaallit Nunaanni politikerit aningaasat aningaasaliissutissallu tamarmik Kalaallit Nunaanninngaanneersuunnginnissaannik eqqumaffiginninnerat erseqqissaatigissallugu pingaaruteqarpoq. Ineriartornerummi tamarmiusup kalaallinit aningaasalersorneqarnissaa piviusorsiortuunngilaq. Eqqummarilluta oqimaaqatigiilluartumik kiisalu Kalaallit Nunaannik tamarmiusumik, piginnaasatsinnik, isumalluutitsinnik kiisalu suliffeqarfinnik piujuartitsisunik pilersitsinissami kivitsisinnaasumik sulinissarput isumagissavarput.