Taxanik angallassinermut tunngatillugu politikeri oqaaseqarpoq: Toqqissisimanarnanilu isumakulunnarpoq
Taxartarnermut inatsisit pillugit Jens Napaattooq Naleqqameersoq apeqquteqarpoq.
Annonse
Taxameterinut tunngasut allanngutsaalisat nakkutilliinermullu tunngasut ilanngullugit taxatillip nammineerluni allanngortissinnaagai ilumoorpa, aamma taxanut tunngasunik politiit misissuiumajunnaarsimanerannut suliaqarumajunnaarsimanerannullu suna pissutaava?
Apeqqutit taakku Inatsisartunut ilaasortap Jens Napaattooq (N) Naalakkersuisunut apeqqutigisaasa ilagaat.
Taxat ingerlaarnerannik malittarisassaliorunnaarnissamik Avannaata Kommuniata nalunaaruteqarnerata kingorna politikeri suliamut akuliuppoq, suliaqarfimmimi pissutsit ernummatigineqarmata.
Taxat qassiusariaqarneri kilometerimullu qanoq akeqartariaqarneri kommunit aalajangertarpaat.
- Upperiuminaatseqaarput
Inatsisit tunngaviusut pisoqaavallaarnerat ajornartorsiutaaginnarpoq, kommunillu inatsisinik malinninnissamut pisinnaatitaaffeqanngillat, Avannaata Kommuniani eqqartuussissuserisoq naliliivoq.
Jens Napaattuup suliaq isumakuluutigaa:
- Ajoraluartumik arlaleriarluta tusarsimavarput aammalu inunnik arlalinnik toqqissisimanngitsunik ernumasunillu saaffigineqarsimalluta, taxanunngooq akuersissutinik suliaqarnissaminnut kommuni inatsisitigut tunngavissaarussimasoq, aammalu politiit taxameterinut tunngasunut allanngutsaalisanut nakkutilliinermullu tunngasut ilanngullugit misissuinissaminnut suliaqarnissaminnullu inatsisinik tunngavissaarussimasut, apeqqummut tunngavilersuinermini politikeri allappoq nangillunilu:
- Inuiaqatigiinni taama pisoqarsinnaanera Naleqqami upperiuminaatseqaarput.
Akulerukkusunngitsut
Taakku pillugit Naalakkersuisut qanoq iliuuseqarnialersaarnersut politikerip aamma paaserusuppaa.
Inatsisitigut aalajangersagaqartussanngortitsisoqanngippat taxat angallannerat kommunip aqunnianngikkai, Avannaata Kommuniani pisortap Nick Nielsenip oqaatigaa.
Kommunip eqqartuussissuserisua suliamut qanoq naliliinersoq nittartakkami aviisip Sermitsiap atuarpaa.
Eqqartuussissuserisoq oqartussaasunut arlalinnut attaveqarsimavoq, inerniliinerillu ilaat imaappoq:
- Maannamut malittarisassat tunngaviusut tassaasut politiit nalunaarutaat kommunillu malittarisassaat, politiinit kommuninillu atortinneqarsinnaanngillat, taamaalillutillu aamma taxanik angallannermik malittarisassaliornissamut tunngavissaanngillat.
