Timmisartoqarfiup illorsuartaa piareersarluarneqanngitsoq ammarneqartoq

Naliliineq.

Nuummi mittarfissuup nutaap illorsuartaa ataasinngormat atorneqalerpoq. Akuersissutit kingulliit pissarsiariniarnerisa ajornakusoornerat pissutigalugu, sapaatip akunneranik ataatsimik kinguaattoorluni atorneqalerpoq.

Maannali mittarfissuup illorsuartaa atorneqalerpoq – taamalu mittarfissuup nutaap 2200 meterinik takitigisup novembarip 28-anni atorneqalinnginnerani misilittarnissaanut piffissanngorluni.

Tamannami aamma pisariaqarpoq, timmisartoqarfiummi illorsuartaani nutaami atortorissaarutit tamarmik atorsinnaalernissaannut suli aaqqitassaqaqimmat. Sermitsiami aviisiliortup marlunngormat ualikkut Nuummut tikikkami tamanna maluginiarpaa.

Bussinik takornariarneq

Timmisartut mittarfiup illorsuartatoqaata mikisuararsuup 1979-imeersup eqqaanut suli unittarput. Timmisartoq unikkaangat ilaasut bussinik aaneqarnissartik utaqqisariaqartarpaat. Aamma Nordjyllands Trafikselskabip illoqarfimmi bussitoqarsua, suli qallunaatut allagartalik NT-millu ilisarnaatilik, Nuummi mittarfissuassami angalaaqattaarpoq.

Bussinik ingerlatitsisoq aatsaat taamaattumik suliaqalersimasoq – arlaleriarluni siumut kingumullu aallariaqattaariarluni aatsaat aallariartortut isertarfiata eqqaanut unippoq. Suulluunniimmi aallaqqaataaneerlugit ilungersunarsinnaasaramik.

Timmisartoqarfimmut iseraanni inissaqarluarnera tupigusuutissaavoq. Timmisartoqarfitoqqap illorsuartaanut sanilliullugu inissaqarluarneroqaaq. Suut tamarmik nutaajupput, qaamallutillu inissaqarluarlutik, allagartalersugassalli suli inissinneqarsimanngillat, ilaasorpassuillu illorsuarmut iseramik qanoq iliussanerlutik nalulluinnarpaat.

Majuartarfikkut majuartariaqartoq paasinarsivoq, nassatanimmi aallertarfik ingerlaartoq init quleriit aappaanniimmat. Nassatanik aallertarfiup ingerlaartup tamaanniittup eqqaa inissaqarluarpoq, timmisartumummi Dash-8-mut ilaasut 35-iinnaammata. Tamannali allaanerussalluni Tuukkaq 330-nik ilaasoqarluni tikittalerpat.

Nassatanik aallertarfik ingerlaartoq unittoortoq

Aamma taava nassatanik utaqqineq aallartittarpoq. Marlunngormat ualikkut 50 minutsersuit utaqqineqarput. Kangerlussuarmit Nuummut timmisartornerup tamanna sivisoqatigaa. Nassatanik aallertarfik ingerlaartoq aallartikkumanngilaq.

Teknikki nutaaq qinngasaarigami. Ilaasut aallaqqaammut nikorfaannarput utaqqillutillu – taavali pisoqalerpoq. Timmisartoqarfiup illorsuartaani sulisoq pisoqattaalerpoq ajornartoornermilu toortakkanik toortaalluni – nassatanilli aallertarfik ingerlaartoq aallartissinnaanngilaa. Taavali susoqalaalerpoq.

Timmisartup minneranit aatsaat 45 minutsit qaangiuttut teknikerimik takkuttoqarpoq, taannalu misissuilluni aallartilluni – misissuisinnarluni pukutsumigullu kumilaartariarluni toortagassanillu toortaareersorlu ingerlaartoq aallartippaa.

Ajortoqanngilaq

Nassatat tigoreerneranni pilersaarutigineqartutut ilanngaaserisut aqqusaarneqartussaapput – akitsuutilinnik nalunaarutissaqarnerluni nalunaarutissaqannginnerluniluunniit paasitinniarlugu, soorlumi mittarfeqarfinni anginerusuni allani taamaaliortoqartartoq. Taava anisarfiup tungaanukartoqarsinnaanngortarpoq, inersuup tikittarfiup ilaasunut aqqutaatigoorluni, aamma tassaniillutik paasissutissiisarfik, ilaasussanut nalunaarsuisarfik assigisaallu.

Silataani taxanut biilit aqqutaasigut arlalitsigut inissaqarpoq, taamaattorli suli atorneqalersimanngitsunik. Anisarfik aamma majuartarfinnut betoniusunut angisuunut sammiveqarpoq biilinut unittarfinnut aqqutigineqartussamik. Taxat aqqutissaasa aamma majuartarfiup akornanni qaamasumik angisuumik pujortartarfeqarpoq.

Nuuk piffissap ingerlanerani kusanartumik mittarfissuaqalerumaartoq qularutissaanngilaq. Sulili sivisuumik utaqqisariaqarpugut. Timmisartoqarfiup illorsuartaa nutaaq atorneqalereeraluarpormi, sulili naammassineqanngilaq. Sanaartornermut atortut sumi tamaani takussaapput. Aamma igalaamerngit amigaataapput. Allagartartaarfiit suli inissinneqarsimanngillat. Teknikkikkut atortorissaarutit aamma, ledningit iikkami suli nivingapput. Igalaat ilaat sumi tamaani aamma amigaataasarput. Allagartalersuinerit aamma suli inissivinneqarsimanngillat. Teknikimut atortut aamma taama inissisimapput, tassami iikkani ledninginik suli nivingasoqallattaarami.

Suulli tamarmik nutaatut tipeqarput. Kisiannili iikkani assilialersuisoqartariaqarpoq, iseruminarnerulissappat. Nuummi aamma takornariartitsisartorpassuit akunnittarfippassuillu ussassaarutaat aamma takussaalertussaassapput – taamaalillunimi nunani tamalaani mittarfittut isikkoqalissammat.

Tamatumali angunissaanut ilungersorluni sulisoqaqqaartariaqarpoq. Taamaallaat qaammatit tallimat qaangiuppata mittarfissuaq nutaaq atorneqalissaaq, taamanikkumut timmisartut Atlantikoq qulaallugu timmisartuussisartut, takornariarpassuit niuertullu angalasut Nunatsinni illoqarfiit pingaarnersaannut toqqaannartumik timmisartuunneqarnissamut periarfissaq nutaaq atorluarumaarpaat.