Timmisartuussisarnissaq nutaaq USA-mit nuannaarutigineqartoq

Nuummi mittarfik nunarsuaq tamakkerlugu nutaarsiassaavoq.

Kapitali nutaaq illoqarfiit pingaarsaannut issittumiittumut ammaassisussaq pillugu tusagassiorfiit nunarsuarmi tusaamaneqarnerpaat ilaat sapaatip-akunnerani makkunani nutaarsiassiileruttorput.

Amerikamiut aningaasaqarnermut aviisiata Wall Street Journalip mittarfik USA-miit angalasorpassuarnut ammaassasoq allaaserisami siulittuutigaa.

Aviisip inummit tatiginartumit ikiorneqarluni pisoq narsaamanersuarmi killingusaamik pujoralammik qernertuinnanngortumik atuaasunik takorluuilersitsisoq nassuiarpaa.

- Uumasut ataatsimoortut takkutinnginnerini ikkuluppoq, inuk tatiginartoq ulluni makkunani pisut pillugit oqartutut issuarneqarpoq.

Qeqqaqqissaani

Nutaarsiassaqartitsivik nunarsuarmi tutsuigineqarnerpaaq, BBC, tusagassiortumik Nuummukartitsivoq. Taassuma arnap inuit aqqusinermi naapitani mittarfiup novembarip 28-ani ammarnissaa pillugu apersorpai.

- Nunarsuup sinneranut mattuteqqanikuuvugut, maannami ammarpoq, nuummioq oqarpoq.

Nuuk mittarfittaarnermigut timmisartuussiviit qeqqaqqissaanut inississaneragaavoq. Greenland Airportsimi pisortap Jens Lauridsenip BBC-mit apersorneqarnermini Europamiit Kalaallit Nunaannut kiisalu Kalaallit Nunaanniit Amerikap kangianut inoqarluartumut timmisartorneq akunnernik sisamanik sivisussuseqartoq eqqaasitsissutigaa.

- Taamaammat qeqqaqqissaaniippugut. Europami timmisartuutileqatigiiffinniit annerniit tamaniit soqutigineqartorujussuuvugut, Lauridsen oqarpoq.

Tusagassiorfiit soorlu Newsweek (USA) aamma The Sydney Morning Herald (Australien) – kiisalu nunani tamalaani nutaarsiassaqarfiit timmisartorneq timmisartullu pillugit tusagassiortartut aamma avannamut saapput.

Allaat Tuluit Nunaanni aviisi uissuumminarsinnaasunik allaaserinnittartoq, The Sun, pisoq pillugu allaaserinnippoq, Kalaallit Nunaatalu SUN-imiit allaaserineqartarnera qaqutigoorluinnaraluarpoq.

Aviisip Tuluit Nunaanniit Kalaallit Nunaannut aqqummik toqqaannartumik suaaruteqartoqarsimanngitsoq atuartartuminut nalunaarutigaa, tuluilli angalasut assersuutigalugu akunnerit tallimat ingerlanerinnaani Tuluit Nunaanniit Københavnimukariarlutik Air Greenlandimiit billetseqarlutik Nuummukarsinnaasut erseqqissarpaa.

PIffissaliineq neriulluarfiugunarpoq.

Ajoqutaasinnaasut

Nunani tamalaani tusagassiorfiit nuannaaginnanngillat, aammali ajoqutaasinnaasut nassuiarpaat. Tikeraarpassuit naatsorsuutigineqartut akunnittarfimmi inissaasa naammattut pissarsiarinissaat ajornakusoortoq assersuutigalugu eqqaaneqarpoq. Takornariaqarnerlu - takornariarpassuaqarneq - pitsaavallaaluatsiarsinnaavoq.

Naalakkersuisup Naaja H. Nathanielsenip (IA), mittarfittaat pingasut kattullutik inuiaqatigiinni kalaallini annertuumik sunniuteqarsinnaasut nalilerpaa.

- Kalaallit Nunaata assinga allanngortingaatsiassagaa malugisinnaavara, BBC-mut oqarpoq.

Tusagassiorfiit nunanit allaneersut aamma nunarsuarmi timmisartuutileqatigiiffiit annersaasa aappaagu aasakkut Nuup New Yorkillu akornanni timmisartuussisarnissamik ammaanissaa maluginiarpaat.

Tassani Newark Liberty International Airportimiit New Jersey-miittumiit Nuummut akunnerni sisamani uninngiivilluni timmisartortoqartassaaq. Amerikamiut timmisartuutileqatigiiffiat Kalaallit Nunaannut aatsaavissuaq timmisartuussisarnissamik ammaavoq.

Takornariat misigisassarsiorusuttut narrutuullu periarfissamik atorluaassasut Wall Street Journalip allaaserisamini siulittuutigaa.

- Europami tikinneqarnerusartut ulikkaarpallaalernerisa nalaanni angalasut inoqannginnerusunut sulili usorsitsaataasinnaasunut angalaniarlutik ujaasisalissapput. Kalaallit Nunaat maanna allattuiffimmi qullarpoq, aviisi allappoq.

Ukioq manna apriilimiit aggustimut nunanit tamalaaniit Kalaallit Nunaannut timmisartuussinerni timmisartumi issiaviit 55.000-it atorneqarsimapput. Kisitsisit taakku piffissami tassani 105.000-inut qaffakkumaartut Jens Lauridsenip Greenland Airportsimeersup nalilerpaa.