Toqoraaviup Neqip kaaviiaartitai appariarput

Neqi A/S-ip naatsorsuutai septembarip 20-ani akuerineqarput, KNI-llu ingerlatseqatigiiffiutaata sulisui 17 procentinik ikilisimasut, tassa 38-nit 32-nngorlutik, tassani takuneqarsinnaavoq. Tamatuma saniatigut sulisunut aningaasartuutit 9,9 millionit koruuninit 4,7 millionit koruuninut appariarujussuarsimapput.

Sulisunut aningaasartuutit taama appariartiginerat arlalinnik pissuteqartoq, Neqimi pisortaq Ole Vestergaard Sermitsiamut ilisimatitsivoq. Sulisut arfinilinnik ikilisimanerat agguaqatigiissillugu 866.000 koruuninik akissarsiaqarneranik pissuteqanngilaq, tamassumami sulisunut aningaasartuutit 5,2 millionit koruuninik appartissavai.

Naatsorsueriaatsit nutaat

Ingerlatseqatigiiffik „suliffeqarfinni nalinginnaasumik periaaseqarnissamut qaninnerulerniarluni“ naatsorsueriaatsiminik allannguiniarluni aalajangersimasoq, taanna ilisimatitsivoq. Taamaasilluni sulisartut akissarsiaat, tunisassiornermi toqqaannartumik aningaasartuutaasut, maanna nioqqutissanut tunisassiarineqartunut akigitinneqartunut ilaasalersut nassuiaataavoq.

- Sulisunut aningaasartuutit 1,5 millionit koruuninik ikinnerupput, tamatumunngalu arlallit pissutaapput: Ingerlatsinerup pitsanngorsarneqarnera, 2023-mi toqutat 2022-mut sanilliullugit ikinnerunerat eqqiaanerullu allamut isumagisassanngortinneqarnera, Ole Vestergaard oqaluttuarpoq.

Oqaatsit piviusumit allaanerulluinnartut

„Toqorakkat ikinnerunerat“ pillugu nalunaarut 2022/23-mut 2023/24-mullu aqutsisut nalunaarusiaannit allaanerulluinnarpoq, tassanimi ima allassimasoqarmat:

“Tassannga najukkami savaatilinnik ukiumut savaaqqanik 20.000-inik tunisassiortartunik ingerlatseqatigiiffik qanimut suleqateqarpoq. Savaaqqat neqaat pitsaassutsimik nalunaaqutserneqartinnagit tuninialersinnagillu assigiinngitsunut aggorlugit 350 tonsinngorlugit suliarineqartarput”.

Ingerlatseqatigiiffimmik, KNI-mik kanngunartuliornerup kingorna ukiuni arlalinni isertortumik amigartooruteqangaarsimasumik, aningaasaqarnikkut tapersersuinissamik KNI A/S-imit suli pilersaaruteqartoq naatsorsuutit takutippaat. Taamaasilluni KNI A/S-ip Neqimi nammineq aningaasaatit iluarsartuunniarlugit ukiumi naatsorsuusiorfiusumi kingullermi akiitsut 142,5 millionit koruunit isumakkeerfigisariaqarsimavai.

Tapersersuinermut uppernarsaat

Naatsorsuutit ilanngussaanni ima allassimasoqarpoq:

- Ingerlatseqatigiiffiup piginnittuata KNI A/S-ip ingerlatseqatigiiffik tapersersuinissamik tunuarniarnermillu nalunaaruteqarpoq, taamaalilluni ingerlatseqatigiiffiup ingerlaannarnissaa qulakkeerneqarluni. Tapersersuinissamik nalunaarut 31. marts 2025-ip tungaanut atuuppoq. Tapersersuinissamik nalunaarut sivitsorneqarsinnaasoq aqutsisut naliliipput, tapersersuinissamik nalunaarutip atuukkunnaarnerani ingerlatseqatigiiffiup ingerlaannarnissaa qulakkeerniarlugu tamanna pisariaqassappat.

Neqi A/S-ip annaanneqarnissaanut pilersaarut siunissami piviusunngortinneqarsinnaanersoq aqutsisut nalunaarusiaanni eqqaaneqanngilaq.

Ingerlatseqatigiiffinnut Allattoqarfik Naalakkersuisut Siulittaasuata Naalakkersuisoqarfianiittoq aggustimi Sermitsiamut ilisimatitsivoq Neqip siunissaa pillugu aaqqiissutissamik suli suliaqartoqartoq, tassani piginneqataanermut periutsit assigiinngitsut eqqarsaatigineqarlutik. Suliniaqatigiiffik naalakkersuisoqarfinni assigiinngitsuneersoq KNI-milu qullersat isumaqatigiinniarput.

Neqi ukiumoortumik naatsorsuutini 6 millionit koruunit missaannik nammineq aningaasaateqarpoq.

Savaaqqanik toqoraaneq naammassivoq

Qaammatit kingulliit marluk toqoraaffiusut pingaarutillit pillugit pisortaq ilisimatitsivoq sapaatip-akunnerata siuliani ukiumoortumik savaaqqat toqorarneqareermata nersutaatinik toqoraaneq aallartittoq.

- Toqoraaneq ingerlalluarpoq annertuumik akornuserneqarani, ilisimatitsivoq.