Tusass inuiaqatigiinni kalaallini digitalimik
kiffartuussinerup annertusiartuinnarnerata kingunerisaanik Paamiuni, Narsami,
Nanortalimmi, Qeqertarsuarmi, Qasigiannguani, Upernavimmi Uummannamilu Tusassip
niuertarfiinik matusillunilu allatut aaqqissuisariaqalerpoq.
Tusassili
illoqarfinni pineqartuni teknikkeqarnikkut sulisumik ataatsimik sulisoqassaaq, allakkerisuusimasullu
Pilersuisumi Brugsenimilu suliffissaminnik neqeroorfigineqarput.
Tusass inuiaqatigiinni kalaallini digitalimik
kiffartuussinerup annertusiartuinnarnerata kingunerisaanik Paamiuni, Narsami,
Nanortalimmi, Qeqertarsuarmi, Qasigiannguani, Upernavimmi Uummannamilu Tusassip
niuertarfiinik matusillunilu allatut aaqqissuisariaqalerpoq.
Tusassili
illoqarfinni pineqartuni teknikkeqarnikkut sulisumik ataatsimik sulisoqassaaq, allakkerisuusimasullu
Pilersuisumi Brugsenimilu suliffissaminnik neqeroorfigineqarput.
Imminut akilersinnaanngitsoq
Tusassimi Nassiussalerisut Ataqatigiissaarisullu allakkat
poortukkallu pingaarnertut suliariuaannarnikuuaat. Inuiaqatigiinnili kalaallini
digitalinngorsaasoqarneratigut Tusassip allakkanik isumaginnittarnera
annikillingaatsiarlunilu isertitaqarfiujunnaarpoq. Nunani tamalaani
ineriartorneq taamaammat allakkeriviit tamarmik sunnerneqarput, Tusassilu
allaanerunngilaq. Taamaammat Tusassip illoqarfinni minnerni arfineq-marlunni
niuertarfini matusariaqalerpai. Maasi Brøns Chemnitz, Tusassimi
Attaveqatigiinnermut Ingerlatsisoq, ilisimatitsivoq.
- Tusassip oqarasuaatinik angallattakkanik
allanillu tuniniaanini 2023-miit 2024-mut ukiup nikinnerani matuai. Tamanna
niuernissamut pilersaarusiornikkut aalajangigaavoq. Tusassimi Nassiussalerisut
Ataqatigiissaarisullu allakkerineq pingaarnertut suliaqarfigaat. Niuernermik
ingerlatsisut allat niuerfik oqarasuaatinik angallattakkanik allanillu
pilersoraat Tusassimi Nassiussalerisut Ataqatigiissaarisullu suliassartik
pingaarneq ukkatarissallugu toqqarpaat, Maasi Brøns Chemnitz oqarpoq.
Suleqatigiilersut
Tusassimiit suliassat pisariaqartut qulakkeerniarlugit
Kalaallit Nunaanni Brugseni kiisalu KNI suleqatigilerneqarput.
- Tusassip illoqarfinni allakkeriveqarnissamut
imminut akilersinnaanngitsuni suleqatigeeriaaseq atuisut allakkerinermi
sullinneqarnissaannik qulakkeerinnittoq pilersippaa.
- Assersuutigalugu Qeqertarsuarni Pilersuisoq
Tusass sinnerlugu maannamiit illoqarfimmi allakkerinermik suliaqalissaaq. Taamaammat
allakkanik aallertarfiit maanna Pilersuisup niuertarfianiilersut
takusinnaavatit, Maasi Brøns Chemnitz oqarpoq.
Tamanna Tusassimi atuisut sullinneqarnerannut
apparsaataassanngitsoq taanna isumaqarpoq.
- Illuatungianik atuisut pitsaanerusumik
sullinneqalissapput. Illoqarfippassuarni ammasarfiit sivikitsuararsuunikuupput –
ilaanni ullormut akunnerit pingasuinnaat ammasarlutik - kisianni, niuertarfimmut
aallersinnaalernikkut sivisunerusumik ammasalerlunilu taamaalilluni atuisunut
tikikkuminarnerulissaaq.
Atorfiit nutaat
Taassumali illoqarfinni arfineq-marluusuni immikkoortortat
ataatsimik teknikkeqarnermi sulisoqassasut, illoqarfinnili taakkunani
allakkerisut Kalaallit Nunaanni Brugsenimik KNI-millu suleqateqalernermut
atatillugu atorfinnik allanik periarfissinneqarsimasut oqaatigaa.
- Tusass allanut ingerlatitseqqiinnginnissaq
eqqarsaatigalugu sulisut ataasiakkaat pillugit isumaqatigiissutit
ajoraluartumik oqaaseqarfigisinnaanngilai. Suleqatigulli sulisunut
soqutiginnittunut atorfinnik nutaanik iluatsittumik neqerooruteqarsinnaasimasut
oqaatigisinnaavarput, Maasi Brøns Chemnitz oqarpoq.
Assersuutigalugu Qeqertarsuarmi aqutsisoq Tusassimi suli
sulisorineqarpoq, allatulli Qeqertarsuarmut toqqaannartumik
atassuteqanngitsumik, atorfeqarpoq, allakkerisorlu maanna Pilersuisup
niuertarfiani atorfeqarpoq, tassani, Jonas Aronsen, Pilersuisoq A/S-o,o
tuniniaanermi ingerlatsisuusoq, naapertorlugu allakkerisartuullunilu
niuertarfimmi suliassanik nalinginnaasunik suliaqartarpoq.
- Pilersuisoq nunaqarfinni allakkerinermik
suliaqareersuuvoq, taamaammat Tusassimik suleqateqalerneq uatsinnut
nutaajunngilaq. Aammattaaq allakkanik aallertarfiit maanna
niuertarfitsinniilernerat pisisartut naammagisimaarpaat, tassami allagarsiatik
poortugarsiatillu niuertarfimmut niuerniartillutik aamma aasinnaanngorpaat, oqarpoq.
Allakkerisut sisamat ilinniartorlu ataaseq Pilersuisup
niuertarfiini suliffittaarput.
