Ukiut 15-it ingerlatsereerluni taamaatittoq

Louise Lynge Berthelsen, atisaliortartoq Nuuk Couturemillu piginnittoq, LinkedInimi quppernermini killitsinnartumik allappoq, Nuuk Couture maanna matuneqartoq. Ukiuni 15-ini nuannersunik suliaqarpugut, aallartinnerpullu matuneralu inuunermi allannguutaasimaqaat, allappoq.

- 100 procentimik namminersortutut 2010-mi aallartinnera, inuuninnut allannguutaasorujussuuvoq. Kræfteqarnera paasigakku, taamaalillunga eqqarsalerpunga, takorluukkama piviusunngortinngitsoornissaannut inuuneq sivikippallaartoq. Kalaallinut arnanut atisanik kusanartunik ilusilersuisarnissaq mersortarnissarlu taamani takorluugaraakka. Kulturikkut kingornussakka tunngavigalugit, Louise Lynge Berthelsen allappoq.

Taamatut aallartinnini nammineq takorluugarisimagaluarlugu aammattaaq ernerminut takutikkusukkamiuk, piumassuseqaraanni angorusutat anguneqarsinnaammata.

- Inuuninnik allannguilluinnartumik siorna misigisaqaqqippunga. Ilaquttanni inuusuttumik uannut, ilaquttannut minnerunngitsumillu ernima inuunerannut pingaaruteqartorujussuaq annaavarput. Misigisaq tamanna qamuuna attortissutigeqaara – taamaattumillu aalajangerpunga Nuuk Couturemik ukiuni 15-ini ingerlatsereerlunga allamik sammisaqalernissannut piffissanngortoq, taanna allappoq AG-mullu ilanngullugu oqaatigalugu maanna assiliinermik suliaqalersimalluni Nuummilu assilisittarfimmik ammaasimalluni.