Umiarsuarnik takornariartitsisartut saqqummersitsineranni Kalaallit Nunaannut Issittumullu soqutiginninneq annertooq
Umiarsuit takornariartaatit Kalaallit Nunaannut tamarmiusumut, pingaartumik nunaqavissunut suliaqartunut, aningaasaqarnikkut ineriartornissamut periarfissaalluarput, inuiaqatigiinnut tamanut iluaqutaasumik, Miamimi umiarsuarnik takornariartaatinik saqqummersitsinermi kalaallit peqataasut oqarput.
Annonse
Nunarsuarmi tamarmi Amerikamilu Avannarlermi Kalaallit Nunaat suli soqutigineqarluarpoq, ukiunilu aggersuni umiarsuaatileqatigiiffiit nutaat umiarsuarnillu nutaanik tikisitsisoqarnissaa nalunaarutigineqarpoq.
Kalaallit suliffeqarfii ukioq manna umiarsuarnik takornariartaatinik saqqummersitsinermi “Seatrade Cruise Global”-imi, 8.-11. april 2024-mi Floridami Miamimi ingerlanneqartumi peqataasut, taamatut oqaluttuarput. Kalaallit suliffeqarfii assigiinngitsut saqqummersitsinermi ataatsimoorlutik saqqummersitsivimmik pilersitsipput. Tassani pisortatigoortumik kalaallinut saqqummersitsiviunngilaq, soorlu nunat Atlantikup avannaaniittut taamaalioraluartut. Visit Greenlandip umiarsuarnut takornariartaatsinut saqqummersitsisarfik 2019-mili peqataaffigisarunnaarpaa.
Kalaallit suliffeqarfiutaat soqutiginninnermik maluginiaapput umiarsuaatileqatigiiffiit siumut nalunaaruteqarani kalaallit saqqummersitsiviannut pulaartarmata, tusagassiuutinut nalunaarummi oqaluttuarineqarpoq.
Umiarsuaatileqatigiiffiit siumut nalunaaruteqaqqaaratik kalaallit saqqummersitsiviannut pulaartarnerisigut, kalaallit suliffeqarfiutaasa soqutiginninneq malugaat, taakku tusagassiuutinut nalunaarummi oqaluttuarput.
Kalaallit Nunaanni attaveqaatit ineriartortinneqarnerat, kiisalu umiarsuarnik Kalaallit Nunaannut Kalaallit Nunaanniillu timmisartuussinissamut periarfissat, mittarfiit pioreersut pilersinneqarumaartullu eqqarsaatigalugit apeqqutigineqarput. Aammattaaq maluginiarneqarpoq, ingammik umiarsuarnit anginerusunit nunaqavissunit angallassinerit kiffartuussinerillu pisiarineqarnissaannut soqutiginnittut, tusagassiuutinut nalunaarummi allassimavoq.
Kalaallit Nunaannit peqataasut arlaqartut
Kalaallit Nunaannit suliffeqarfiit peqataasut tassaapput Blue Water Greenland, Eimskip Greenland, Greenland Sagalands Qaqortumeersoq, Arctic Cruises Ilulissaneersoq, Albatros Arctic Circle (Kangerlussuaq) aamma kalaallit umiarsuarnut ilisimasortaqarfik Imaq Pilot siullermeerluni peqataasoq.
Kalaallit Nunaat takornariarfissatut soqutigineqaraluttuinnarpoq, Kalaallit Nunaannilu mittarfiit takornarianik umiarsuarnik takornariartaatinik umiarsuarnut tikisitsisartunut umiarsuarnillu aallartitsisartunut atorneqarnerujartuinnarput, taamaalillutik Kalaallit Nunaanni mittarfiit attaveqaatillu aningaasaqarnitsinnut iluaqutaallutik, suliffeqarfiit tusagassiuutinut nalunaarummi allapput.
Kalaallit peqataasut umiarsuarnik takornariartaatinik angalaneq naammagisimaarluarpaat, Kangerlussuarmilu Albatrosimi pisortaq Jørgen Larsen ima oqarpoq:
- Kalaallit Nunaat suli soqutigineqarluarpoq. Umiarsuit takornariartaatit nunanit tamalaaneersut Kalaallit Nunaannut Kalaallit Nunaanniillu angalaneranni kiffartuussinissaat qilanaaraara. Kangerlussuarmi naatsorsuutigineqarpoq 2024-p kingorna umiarsuaatileqatigiiffinnut takornarianullu pitsaasunik nioqqutissiorsinnaaneq ingerlaannassasoq.
Aningaasaqarnermut kulturimullu iluaqutaasoq
Qaqortumi Greenland Sagalandsimi pisortaq Pitsi Høegh aamma taamatut misigivoq imalu nangilluni:
- Umiarsuit takornariartaatit ukioq manna illoqarfitsinnut tikittarmata uagutsinnut takornarialerisunut pitsaasuuvoq, taamaalilluta kalaallit takornarialerisut umiatsiamik nunakkullu takornariartitsisinnaalerput, aamma sanaluttartut tunisassiatik tuniniarsinnaanngorpaat, tamannalu najukkami aningaasaqarnermut kulturikkullu kingornussatsinnut iluaqutaavoq.
Søren Nuka Olsvigip, Imaq Pilotimeersup, siullerpaamik saqqummersitsinermi peqataanini nuannaarutigaa:
- Suliffeqarfitta takornariartaatinik angallassisunut saqqummiunnissaa pingaaruteqarpoq, taamaalillutik kalaallit umiarsuarnut ilisimasortaqarfiat kalaallinik aquttulinnik aquttussarsiorniassammata, tamannalu nunatta aningaasaqarnikkut ineriartorneranut iluaqutaassaaq.
Kalaallit takornariartitsisartut saqqummersitsineq naammassimmat ilisimatitsipput umiarsuarnik takornariartaatinik takornariartitsisarneq Atlantikup avannaani takornariartitsinermut pingaarutilittut ineriartortinneqartuartoq. Islandimi pisortat saqqummersitsiviat ukioq manna aamma angisuujuvoq, Savalimmiormiut Newfoundlandimiullu aamma peqataapput, nalunaarummi allassimavoq.
Kalaallit suliffeqarfii tusagassiuutinut nalunaarummi kajumissaaripput, Kalaallit Nunaata pisortatigoortumik Miamimi saqqummersitsinermut uteqqittariaqartoq, taamaalilluni kalaallit suliffissuaqarnermi soqutigisaat qulakkeerniarlugit, aammali umiarsuarnik takornariartaatinik takornariartitsisarneq Kalaallit Nunaannut nalinginnaasumik, pingaartumik nunaqavissunut, aningaasaqarnikkut ineriartornissamut periarfissatut pitsaasutut nittarsaallugu, taamaaliornermikkut kalaallit inuiaqatigiit tamarmik iluaqutigissammassuk, taakku oqarput.
