Unnuinermi akitsuut pillugu siunnersuut piareerpoq: unnummut ataatsimut 20 koruunit

Naalakkersuisut unnuisarfinnut akitsuummik atuutilersitsinissamik siunnersuummik tusarniaassuteqarput. Akitsuut 20 koruuniussasoq siunnersuutigineqarpoq, angalasunullu tamanut akitsuut atuutissaaq. Akitsuummit isertitat 6,8 millionit koruunit missaanniissasut naatsorsuutigineqarpoq, kommuninullu agguaanneqassallutik.

Takornarissat angalasullu allat 2026-mi januaarip aallaqqaataanit unnuinermut ataatsimut 20 koruuninik akiliisalersinnaapput.

Unnuinerit akitsuuserneqarnissaat pillugu siunnersuut Naalakkersuisunit tusarniaassutigineqarpoq.

Siunnersuut 2024-mut aningaasanut inatsisissatut isumaqatigiissummik tunuliaqutaqarpoq, tassani partiit peqataasut, IA, Siumut, Naleraq aamma Atassut, taamatut akitsuusiinissamik periarfissaq misissorniarlugu isumaqatigiissuteqarmata.

Aningaasanut inatsimmi unnuinermut ataatsimut 30 koruunit 100 koruunillu akornanni akitsuuteqarnissaq eqqaaneqarpoq.

Siunnersuutip inaarutaasumik suliarineqarnerani unnuinermut ataatsimut inummut ataatsimut 20 koruuninik akitsuuteqarnissaq aalajangiunneqarpoq. Meeqqalli inuusuttullu 18-it inorlugit ukiullit akitsuuteqartitsinermi ilaatinneqassanngillat.

- Akitsuummi siunertaq tassaavoq, kommunit piffimminni takornariaqarnermik ineriartortitsinissamut periarfissaanik ilapittuineq, siunnersuut pillugu allassimavoq. 2026-mi, akitsuutip atuutilersinneqarnissaanut siunnersuutigineqartumi, 6,8 millionit koruunit missaanni isertinneqarsinnaassasut missingerneqarsimavoq. Siunnersuut Nunatta Karsianut isertitsissutaassanngilaq, unnuinerilli akitsuummik akiliuteqarfiusussat qassiuneri malillugit iluanaarutit aggornerinik kommunit tigusaqartassapput.

25-nit ikinnerusunik unnuisoqarpat ilanngunneqassanngillat

Naalakkersuisut naapertorlugit akitsuutit tungaatigut nunat allat qaffasissuserisaannut Kalaallit Nunaat inississaaq. Takussutissaq ataaniittoq tusarniaanermit saqqummiunneqartumit tigusaavoq, assersuutinillu nunani illoqarfinnilu allani qanoq akitsuuteqartitsisoqartarnersoq ersersitsivoq:

2023-mi Kalaallit Nunaata takornariaqarnera pillugu misissuinermi, Europami unnuisitsinermut akitsuutit aalajangersimasut Visit Greenlandip sanilliuppai. Kalaallit Nunaanni unnuinermut ataatsimut 20 koruunit akitsuutaasut takussutissamiippoq.

Qaammatini pingasuni unnuinerit 25-t inorlugit unnuisarfiit unnuisitsisarpata akitsuusiisoqartassanngitsoq, siunnersuummi allassimavoq.

Inunnut ataasiakkaanut aamma atuutissaaq

Siunnersuut nunami maani akunnittarfinnut attartortitsisartunullu allanut aningaasaqarnikkut allaffissornikkullu pitsaanngitsunik kinguneqaatinik nassataqarsinnaasoq, Naalakkersuisunit ilimagineqarpoq.

- Akunnittarfiit eqqarsaatigalugit unnuisut qassiunerannik nalunaarutiginninnerit aallaavigalugit, naatsorsuutinut nalunaarsuinerminni atortulersuutiminnik pioreersunik annikitsumik naleqqussaanissaat ilimagineqarpoq, tusarniaassummi allassimavoq.

Innuttaasut namminneq inigisaminnik AirBnB aqqutigalugu, illuaraatinik assigisaannillu attartortitsisartut akitsuummik akiliuteqarnissamut ilanngunneqassapput.

Powered by Labrador CMS