USA-mi takornarialerisut anginerit maanna soqutiginnittut

Nuummi mittarfissuaqalerneratigut taamatuttaarlu New Yorkip Nuullu akornanni toqqaannartumik timmisartuussisoqalerneratigut USA-miit takornariat amerlerujussuarsinnaapput.

Kalallit Nunaat ukiuni makkunani USA-mi inuinnarnut aamma tikikkuminarsivoq. Maannakut taamaallaat pisoorsuit tikeraarusuttupilussuillu Kalaallit Nunaannut tikittarput. Taamaammat Kalaallit Nunaata ilisimaneqarnerulernissaa kiisalu sooq qanorlu tikinneqarsinnaanersoq pingaartuuvoq, Visit Greenlandimit Tanny Por oqarpoq nangillunilu:

– Kalaallit Nunaata ilisimaneqarnerunissaa pingaartuuvoq – taamaallaat sumiinnersoq pinnagu, aammali sooq nunamut tikeraartoqartariaqarnersoq qanorlu tassungartoqarsinnaanersoq.

Maanna Kalaallit Nunaat USA-mi angalatitsisunit, soqutiginnittunit aammali mianersortunit, ilisimaneqalersimavoq, Tanny Por oqarpoq.

Kalaallit Nunaata Denverimi Coloradomiittumi Adventure Elevate North America USA-mi 2025-mi maajimi peqataaneratigut soqutiginninnerup annertusiartornera takuneqarpoq. Illoqarfik Rocky Mountainsini sumiiffimmi sisorariartarfittut aamma ilisimaneqartumi pinngortitarsuarmi alutornaqisumi inissisimavoq.

Misigisassarsiorluni takornariarneq

Inuussutissarsiortunut (imaluunniit B2B) takornariaqarnikkut saqqummersitsineruvoq misigisassarsiorluni takornariarnissamut sammitinneqartoq, takornarialerinermut Visit Greelandip sulissutigisaanut pingaartuulluni, Visit Greenlandillu takornariaqarnermut periusissiaani nutaamiilluni Naalakkersuisullu takornariaqarnermut pilersaarutigaa.

Tanny Por Visit Greenland sinnnerlugu suleqatinilu Lennart Olsen saqqummersitsinemi peqataavoq. USA qanoq ililluni Kalaallit Nunaannut soqutiginnilersimanersoq aperineqarami ima akivoq:

– Alapernaallutillu mianersorput, qanorli ilillutik takornarianik amerlanerusunik Kalaallit Nunaaliartitsisinnaanerlutik soqutigisupilussuuaat.

– Maanna takornarialerisut anginerusut ilumut Kalaallit Nunaaliartitsisalernissaminnik isumaliuteqartut takutiinneqarnera Denverimi takornariaqarnikkut saqqummersitsinermi pingaaruteqartut ilagaat, tamannalu siusinnerusumut naleqqiullugu allannguutaavoq.

Siunissani soqutiginninneq isummat malillugu qanoq issava?

– Maanna Kalaallit Nunaat nunarsuup sinneranit tamaniillu tikikkuminarnerulersimavoq, taamaalilluni soqutiginninneq annertusissalluni, nutaanillu niuerfeqallissaaq. Takornariartugut, Kalaallit Nunaaliartut, utoqqaanerusarput siunissamili inuusunnerulerumaarput, Tanny Por nunanut allanut attaveqarnermut ullluinnarni aqutsisuusoq naliliivoq.

Pinngortitami misigisassat

Maanna takornariat naleqquttut Kalaallit Nunaaliartinnissaat, ilaatigut misigisassarsiorluni takornariarneq siammasinnerusoq, tunaartarineqarpoq.

– Isumaliortaaseq pineqarpoq. Kalaallit Nunaanni sila allanngoriasaartarlunilu pinngortitarsuarmi misigisaqartoqariasaarsinnaammat (arferit puttuteriasaarsinnaammata) misigisassat naatsorsuutigiuminaattarput. Taamaammat misigisassarsiorluni takornariaqarneq nunatsinnut tulluarpoq – eqaatsumik pissuseqarlutik naleqqussarsinnaapput. Ajunngilaq-modemik taasarparput, Tanny Por nassuiaavoq.

– Suut USA-mit misigisassarsiorlutik takornariat soqutiginerusarpaat?

– Tamatiguussuseq soqutigaat. Ilaasa pinngortitarsuaq soqutigisarpaat, pisunneq angalaarnerlu, allat alutorsaatissanik soorlu ilulissanik, sermersuarmik, nannunik, arfernik, qimusserarnermik, seqernup kaaviinnarneranik il.il ujartuisarput.

– Ilaasa sakkortuumik timersorneq soqutigisarpaat, soorlu Sermersuup quppaanik misissuineq qulimiguulimmillu sisorariarneq, allat pinngortitarsuaq innarlerneqarsimanngitsoq tikissallugu soqutigaat, aammali iluarusukkusuttunik ilaqartarput. Taakkulu akornanni allarpassuupput. Wellness soqutigineqalersimavoq. Inuppassuit timikkut eqqarsartaatsikkullu ilungersunartussarsiortarput, allat silaannaq minguitsoq nipaassuserlu ujartortarpaat, taanna nassuiaavoq.

Aamma pinngortitami misigisassanik immikkut ittunik misigisaqarnissaq annertuuumik soqutigineqartarpoq, soorlu eqalunniarneq, timmissanik takuniaaneq, kujataani saavaatillit inuunerat, imaani aalisarneq, assiliiartorneq, puisinik, tuttunik, umimmannik nanunillu tammajuitsussarsiniarluni piniarneq. Nalinginnaasumik piniarneq aammali pisissimik qarsumillu piniarneq.

Takornarialli aamma Kalaallit Nunaanni najugaqartut inuunerat takorusuppaat. Kulturiat eqqumiitsuliallu kalaallillu ulluinnarni inuunerat. Kalaallit Nunaat ilumoortoq ileqqullu takorusuttarpaat kalaallit angerlarsimaffiinut pulaarusuttarput, kaffilertunut iserusuttarput, kiisalu qanoq killuni igaasartoqarsinnaanersoq takorusuttarpaat. Taamaammat nunaqarfiit takornariarfigerusunneqartarput.

Siunissaq isumalluarnartoq

Peqataasunut ataasiakkaanut tigussaasunik immininniisoqarpa/isumaqatigiissusiortoqarpa?

– Siunissaq isumalluarnarpoq, Tanny Por saqqummersitsinerup kingorna naliliivoq.

– Siusinnerusumut sanilliullugu takornarialerisut anginerpaat Kalaallit Nunaannut ammanerulersimasut maluginiarpara. Isumaqatigiissutit annertuut piorsarnerat sivisusinnaavoq, isumaqarpungali peqataasut isumaqatigiissutiik pitsaasunik piorsarneqarsinnaasunik angerlaassisut.

Takornarialerisut mikinerumaat soorlu Kangerlussuarmiit Salik Grønvold siunissamut pitsaasunik isumaqatigiissuteqarmat taamaalilluni angalaneq tamarmi akilersinnaasoq Tanny Por isumaqarpoq.

– Piorsaanerli sivisusinnaasarpoq, nangilluni oqarpoq.

 Siusinnerusumiit assersuut

2023-mi ataatsimeersuarnermit takornarnermik piorsaaneq qanoq sukkatigisumik ingerlanneqarsinnaasoq takussutissatut assersuusiorluni oqaluttuarpoq.

– 2023-mi Greenland Adventuremit angalaqatigiit Japanimi Adventure Travel World Summitimi – Denver, Coloradomiittumut assingusumi - peqataapput. Tikinniakkat tassaanngilat Japanimi niuerfik, nunanili tamalaani misigisassarsiorluni takornariaqarneq.

– Minnerpaamik ukiuni qulini siusinnerusukkut attaveqareerluta saqqummersitsinerup ingerlanerani nunarsuarmi angalatitsiviit annersaasa ilaat Intrepid, Kalaallit Nunaannut angalasalernissaq pillugu – oqaloqatigilerparput.

Intrepid ukioq manna nunami takornariarnissamik siullermik ingerlatsivoq. Angalaqatigiiaat qulit tungaannut inuttaqartut, Nuummut Qeqertarsuullu tunuanut (Qeqertarsuaq Qasigiannguillu ilanngullugit) sisamariarluni angallappai. Ukiuni tulliuttuni ataavartumik angalaniarput.

Intrepid Kalaallit Nunaanni angalasarnerminik piorsaaqqissasoq, Denverimilu saqqummersitsineq taamaaqataanik kinguneqarumaartoq Tanny Porip neriuutigaa.

Intrepid ukioq manna juulimi aamma tusagassiortunik, Amerikami avannarlermit, Tuluit Nunaannit Australiamiillu tusagassiortut nuimasut peqataaffigisaannik, ukiumoortumik angallassinissamik aaqqissuivoq.

Kalaallit Nunaata nutaamik ilisarnaasiornera

Visit Greenlandimi Kalaallit Nunaat nutaamik ilisarnaasiorniarlugu sulisoqartoq Tanny Por aamma oqaluttuarpoq.

– Ilisarnaasiornitsinni anguniagaq tkutikkusutallu ersarissarlugit ilisarnaasiinermi nutaanik sammiveqalerpugut.

– Pinngortitaq tassaaginnanngitsoq isikkivik pingaarnertut ilisarnaasiaraarput. Nukissanik, eqqissinermik, nutaanngornermik itisuumillu eqqarsarnissamut aallerfiusoq. Kingornussatsinnik ulluinnarnilu najukkatsinni ilisimasanik ilusilersuisoq. Naleqqussarnissatsinnut nukissanik aallerfigalugulu misigisassarsiornissarput piviusunngortoqmisigalugulu pinngortitamut qaninnerulerluta misigaarput, Tanny Por nassuiaavoq.

Amerikap Avannarliup saniatigut ingammik nunat avannarliit kiisalu Tyskland Tuluillu Nunaat qitiutillugit nunarpassuarni allani Kalaallit Nunaata soqutigineqalernissaa Visit Greenlandip sulissutigigaa nunat tamalaat akornanni sulinermi pisortaq oqarpoq.