KL

DK

Zelenskyjip Ukrainemi eqqissinissaq anguniarlugu isumaqatiginninniarnissamut piareersimasoq

Trump eqqissisitsisinnaasoq aamma eqqissinissamut pilersaarut piareerneqareerpat Putin aatsaat ataatsimeeqatigiumaarlugu Zelenskyj oqarpoq.

Ukrainep præsidentia Volodymyr Zelenskyj, præsident Donald Trumpip saamianiittoq, USA-p præsidentia eqqissinermik pilersitsisinnaasoq isumaqarpoq.
Ritzaus Bureau
Saqqummersinneqarpoq

Ukraine eqqissinissamik isumaqatiginninniarnissaminut piareersimavoq, præsidentilli Volodymyr Zelenskyjip Ruslandip præsidentia Vladimir Putin kisiat ataatsimeeqatigiumavaa.

Tamannalu USA-mik Europamillu eqqisseqateqarnissamut pilersaarut naammassineqarpat aatsaat pissaaq.

Zelenskyj Münchenimi isumannaallisaanermut tunngasunik ataatsimeersuarnermi tallimanngornermi oqarpoq.

- Ruslandimiut assigiinngitsut ataatsimeeqatiginianngilakka, russi ataasiinnaq ataatsimeeqatiginiarpara: Putin. Trumpi Europalu ataatsimut pilersaarusioqatigereerneranni aatsaat pissaaq. Taamaalilluta Putin issiaqatigalugu oqaloqatigissavarput sorsunnerlu unitsillugu.

- Aatsaat taama pisoqarpat ornigukkumaarpunga, Zelenskyj oqarpoq.

USA-p præsidentia Donald Trump akerleriinneq aaqqissinnaagaa, tassa Ukrainemut tapersersuilluinnaruni, isumaqarpoq.

- Naatsorsuutigaara. Inuit qinernikuuaat, takusinnaavarpullu angutaasoq nukittooq.

- Uagut tapersersorniarluta aalajangeruni, qeqqaniinnani, taava sunniuteqarluarsinnaassaaq Putinilu sorsunnermik unitsitsitillugu. Taamaaliorsinnaavoq, Zelenskyj oqarpoq.

Trumpip allaffeqarfia sapaatip-akunnerani matumani Ukrainemut tunngatillugu nikallornartunik nalunaaruteqareeraluartut taama oqarpoq.

USA-p illersornissamut ministeriata, Pete Hegsetip, Ukraine eqqissinissamik isumaqatigiissuteqarniarluni nuna Ruslandimut tunniuttariaqaraa, aamma Nato-mut ilaasortaajunnaartariaqartoq pingasunngornermi oqaatigaa.

Nato-mut ilaasortanngorneq Zelenskyjip eqqissinissamik pilersaarutaani septembarimi saqqummiunneqartumi pingaarnersaagaluarpoq.

Tassani Nato-mut ilaasortaaneq eqqissinerup kingorna Ruslandip saassusseqqinnissaanik pinngitsoortitsissaaq.

Ukraine Natomut ilaasortanngussanngikkuni saassunneqaqqissinnaaneq annilaanganarmat sakkutuuminik marloriaammik amerlisitsisariaqartoq, Zelenskyj tallimanngornermi oqarpoq.

Aammali oqallisigineqarpoq Europami nunat sakkutuuminnik eqqissinissamik siunertaqartunik Ukrainemukartitsissanersut.

USA-p sakkutuui peqataassanngikkaluarput, sakkutuullu eqqissisitsisut NATO-p isumaqatigiissutaani immikkoortoq 5-imi piumasaqaataat malillugit iliussanngikkaluarput, Hegsetip sapaatip-akunnerani matumani oqaatigaa.

Tassa sakkutuut eqqissisitsisut saassunneqarpata USA Natomilu ilaasortat allat Ruslandimut toqqaannartumik akuliunissamik pisussaaffeqassanngillat.

Trumpip nalunaarutai nikallornaraluartut allatigut Ukraine tapersersorpaa.

USA Ukrainemut sakkutuut atortuinik suli nassiussisarpoq, USA-p Ruslandimut pillaatini attatiinnarpai, aamma Trumpip Putin isumaqatiginninniassanngippat kinguneqartitsissalluni sioorasaarpaa.

USA-lli kisimiilluni iliuuseqarnera, ilaatigut Ukraine Europamiluunniit iligisani peqataatinnagit Trumpip Putinimut oqarasuaatikkut oqaloqateqarnera, Europami pakatsisitsisuuvoq.

Trumpip erseqqissarpaa Ukraine eqqissinissamik isumaqatiginninniarnernut peqataatinneqarumaartoq.

NATO-p generalsekretæria Mark Rutte naapertorlugu, tamatumunnga peqatigitillugu Trumpip aqutsisoqarfiata nunanut allanut tunngasunut politikkimut tunngasut tamangajammik Münchenimi isumannaallisaanermut ataatsimeersuarnermut aallartippai.

Taamaasilluni aamma Europami iligisat isumasioqatigineqassapput, Rutte tallimanngornermi oqarpoq.

Illersornissamut ministerip Pete Hegsetip saniatigut præsidentip tullia J.D. Vance Münchenimi ataatsimiinnermut peqataavoq.

usa volodimir zelenskyj ukraine nunarsuarmi inuussutissarsiutit inuussutissarsiornermut ukrainemi saassussineq

ATORFIIT Se alle jobs

JOB – Se alle jobs

Powered by Labrador CMS