Angutit 363-it – arnarlu ataaseq

Atuagaq nutaaq qimussimik alapernaarsuiartortitaasartunut Siriusikkunnut tunngasoq Tunup avannaani qimussimik angalanermi nassarneqarnissaminut ilimanaateqarpianngilaq.

Issuallaarlunilu angivallaarpoq - tupillu silataani issingaartillugu sinngup puuaniissinnaagunanngilaq.

Atuagaq 1,6 kilomik oqimaassuseqarpoq 352-inillu qupperneqarluni, 28 cm x 22 cm-itut angissuseqarpoq — tassa A4-tut angitigingajaluni.

Taama oqarama isumalluarnanngitsumik isiginnittaaseqanngilanga — akerlianik.

Oqaannarpunga atuagaq „nerriveeqqamiittussiaasoq“. Takisuujullunilu sukumiisumiivoq, pinngortitarsuarmit qimusseeqqamillu assinik kusanartunik assiliartaqarluni. Allatat immikkoortunut naatsunut immikkoortiterneqarluarsimammata atuagaq tamaat naanissaata tungaanut ingerlaannartumik atuarneqartariaqanngilaq.

Atuakkap qulequtaa tassaavoq „Sirius – 75 år med slædehunde, kammeratskab og arktiske eventyr“. Tamatumanilu ukiut 75-it matuma siornatigut ataasinngornermi aggustip 18-iani qimussimik alapernaarsuiartortitat Ellap qeqertaani pilersinneqarsimanerat atuakkami eqqaaniarneqartoq erseqqippoq.

Atuagaq pissanganartoq

Atuagaq pissanganaqaaq. Aaqqissuisup Simon Fleningip, TV2-mi tusagassiortup 2016-imilu Siriusimi sulisimasup, Siriusimi sulisimasut 363-it akornanni 32-t oqaluttuarneri katersorsimavai. Pisimasut pissanganarnerpaajunngikkaluartut, pisimasuinnarnilli tunngaveqartut qaammatini 26-ni Tunup avannaani sakkutuujusimanermit eqqaamaneqarluartut.

Qimmit, nannut, angutit — arnarlu ataaseq — pillugit oqaluttuaapput nuannersut, atuarlugit nuannaalersitsisartut.

Oqaluttuat Bent Zweriusip 1958-imi eqqaamasaanit nunarsuarmi coronap tuniluunnerata nalaani Tunup Avannaani avinngarusimasumi inuunermut tikillugu oqaluttuarineqarput.

Atuakkami oqaluttuarisaanermi qimusserlutik alapernaarsuiartortitat Siriusikkut pilersinneqarneranut atatillugu pisimasut sukumiisumik aamma oqaluttuarineqarput. Immikkoortoq taanna Peter Schmidt Mikkelsenimit, 77-imi alapernaarsuiartoqataasimasumit atuakkiortuusumillu, allaaserineqarpoq. Taassuma nammineq oqaluttuani Tusinde dag med Sirius 1986-imi saqqummersippaa, tamatumalu kingorna Tunup avannaa Siriusilu pillugit atuakkat amerlasuut saqqummersissimavai.

Peter Schmidt Mikkelsenip Siriusimi qimusseqataa Claus ”Tavse” Birkbøll, nalliuttorsiornermut atatillugu atuakkiamut ilanngussassanik paasissutissiivoq, ilaatigut qimussimik alapernaarsuiartortitat sakkui pillugit immikkoortumik allalluni.

"Tavse Siriusi pillugu ilisimasaqarluarpoq, aamma ukiuni 75-ini kingullerni Tunup Avannaani pisimasut tamaasa ilisimalluarlugit, taamaammallu atuakkamut matumunnga oqaluttuarisaanermut tunngasumut allaatigisanit allanit tamanit amerlanerusunik ilanngussaqarpoq,“ Simon Flening siuleqummi allappoq.

Siriusip siunissaa

Aallaqqaammut qimusserlutik alapernaarsuiartortartut Sirius sakkutuut imarsiortut ataaniipput, ullumikkulli Jægerkorpset (sakkutuut malersuisartut, aaqq.) aamma Frømandskorpset (sakkutuut saniatigut aqqartartutut immikkut ilinniarsimasut, aaqq.) peqatigalugit Specialoperationskommandomut ilaapput. Issittumi Sakkutooqarfik Nuummiittoq qimussimik alapernaarsuinermik aqutsisuuvoq. Issittumi Sakkutooqarfiup pisortaa, generalmajor Søren Andersen, Siriusip siunissaa pillugu siulittuivoq – minnerunngitsumik nunat tamalaat akornanni pissutsit maanna atuuttut eqqarsaatigalugit.

Qimussimik alapernaarsuiartortitat Sirius atuuttuaannartut, siunissamili illersornissaqarfiup immikkoortortaqarfii allat suleqatigilluarnerusariaqartut generalmajori oqarpoq. Tamanna sakkutooqarnikkut ilinniartitsissutit allanngorsimanerannik, aammali teknologiip ineriartornerata kinguneranik, pissuteqarpoq tassanilu piginnaasanik nutaanik taaneqartartut soorlu dronet satellitsikkullu nakkutilliineq illersornissaqarfiup Issittumi suliassaanut ilaapput.

Tunup Avannaani suli suliassarpassuaqartoq — aamma kingornussassarpassuaqartoq kivinneqartariaqartoq Søren Andersen inerniliivoq.

Qimusserlutik alapernaarsuiartortitat Siriusikkut illersornissaqarfiup sakkutuuisa ilagaat immikkut piginnaanillit - atuagarlu nalliuttorsiutiginnissutitut saqqummersinneqartoq immikkut piginnaanillit atuagaatut naleqqulluinnarpoq.

Sirius – 75 år med slædehunde, kammeratskab og arktiske eventyr

Aaqqissuisoq: Simon Flening

Saqqummersitsivik Gads forlag

 Quppernerit 352-it

Saqqummersitsiviup akigititaa: 399,95 kr.