Upernarpoq.
Ullorsiutini 2023-mi februaariusoq
allassimavoq.
Asii Berthelsen EM-imut anngunninnissamut pingaarutilimmut
piareersarnerup nalaani Danmarkimi U19-imi arsaattartut peqatigalugit Spaniamiippoq.
Seqinnarillunilu qilanaartoqarpoq. Aatsaat taama takorloortakkaminut
qanitsigilerpoq - timikkut nukittullunilu tarnikkut aallussivoq. Nunatsinni
inuusuttut arsaattartut isumalluarnarnerpaat ilagaat –
ilinniarnertuunngortussaalluni immaqalu Danmarkimi arnat arsaattartut akornanniissalluni.
Taavali oqarasuaat sianerpoq.
- Angerlartariaqarputit,
angajoqqaavi oqarasuaatikkut oqarpallapput.
Ilungersorpaluttumik nipeqarput. Oqaatsit
akornisigut nipaassuseq oqaatiginiagaannit ersarinneruvoq. Angutaa, tulaavia
kaammattuisuisalu pingaarnersaat napparsimavoq. Tamatuma kingorna akunnerit
uninngasutut ipput. Atisaajartarfimmi nipi, ivikkat tikkat, unamminissap qanoq
ingerlannissaanut oqaloqatigiinnerit arsaassutillu soorlu putsup
iluaniiginnartut.
Asii atualeqqaassammata angajuata nujalerivaa. Taamanili arsaanneq silarsuarillualereersimavaa, taamanilu nuannaartorisaa, arsaattartoq Brasiliamioq Alexandre Pato, pillugu assiliarsuaq tunuani iikkami takuneqarsinnaavoq.
Assi: Nammineq pigisaq
- Suut tamarmik isapput, Asii
oqarpoq nangillunilu:
- Allamik periarfissaqanngilaq, angerlartariaqarpunga,
naak akueriuminaatsikkaluaqalugu.
Ilaquttaminut angerlarpoq. Katillugit sapaatit
akunnerini marlunni Nuummiippoq – soriarsinnaanani aliasoqalunilu. Angunni
anniarnerujartuinnartoq ikiorsinnaanagu isigiinnartariaqarpaa.
- Ataataga naalliuttoq
ikiorsinnaanagu sakkortoqaaq. Aammali utertussaavunga,
ilinniarnertuunngornissannummi soraarummeertussaavunga, arsaaffimmilu
inissisimaffiga pigiinnartussaavara, Asii unneqqarilluni oqarpoq nipaalleriataarlunilu
nipaatsumik ilumoorsaartumillu nipeqalerpoq.
Sivitsunngitsoq Hjørringimut uterpoq,
oqarasuaallu sianeqqippoq. Maannakkut taamaallaat arnani oqaloqatigaa. Angutaa
toqusimavoq. Ulloq taanna ersarissumik eqqaamavaa: 2023-mi marsip arfineq-pingajuat.
Kingumut Nuummut angerlartariaqarpoq –
maannakkut ilisiartorluni – Danmarkimullu uteqqilluni.
- Anguniakkatsinni ilungersornissarput ataatama
pingaartippaa. Uterlunga unammisartoqatigiinni inissara ilungersuutigisariaqarpara
-ilinniarnertuunngorlungalu, Kalaallit Nunaanni arnani arsallaqqinnerpaaq
oqaluttuarpoq, angummilu ilinniarnertunngornini takunngimmagu suli uggoraa.
- Tamanna akueriuminaappoq, oqarpoq.
Asii Berthelsen, ukiualuit ilungersoreerluni arsaattaleqqippoq, ilaatigullu ataatani meeraagallarami Maniitsumi Qunnermut, ilaqutariit aasakkut tupersimaarfigisartagaannut, arsaakkiaqatigalugu nuannarisimasani annaavaa. Taanna Asiip ornittakkamini nuannarinerpaasaraa.
Assi: Nammineq pigisaq
Angunni ullut tamaasa eqqarsaatigisarpaa.
Arsaattartutut kiatimi atineri tamaasa angunni aananilu aamma peerutereersoq
eqqarsaatigisarpai.
- Arlaatigut iluatsitsinissamik pissarsissutigisarpara,
qungujulaarluni oqarpoq arsaattartutullu kiatiminik ileqquni Frankrigimut sakkortuumik
unammereerluni ulloq taanna iluatsitsiumaarluni misigisimallugu pilersimasoq
oqaluttuarpoq.
- Iluatsitsivunga.
Arsaalluarnerpaatut toqqarneqarlungalu isertitsisoq tunivara. Tassalu
unamminerit ataatama toqunnginnermini takusaasa kingullersaat.
Periarfissat
takusarai – aporfissaanngitsut
Ilisimaneqartutuut ataasiaannarluni ajutoortoqarneq
ajorpoq. Angutaata ilisaanerata kingunitsiaa timaa qisuariarpoq. Kuutsiisa
eqqortumik ikkusimannginnerat peqqutaalluni imeqqutamigut ajoquserpoq –
taamaalilluni arsarsinnaajunnaarluni. Nakorsat qularinngilaat, ukiup aappaata
affaa qaangiuppat aatsaat unammeqqissinnaalissaaq.
Ajoquserneramut piffissaq
ajornerusinnaanngilaq. Hjørringimi inissani annaallugulu U19-nit EM-ernissaanut
Danmark sinnerlugu unammeqataasinnaajunnaarpoq. Inuunermini siullerpaamik
arlalitsigut aporfissaqarneq misigaa.
- Anigorniarnera sakkortoqaaq. Ukiorpassuarni
ilungersuutigisimasakka tamaasa angunngitsoorpakka, nikallorsimalluni
eqqissisimallunili oqarpoq nangillunilu:
- Unamminernik nuannarisaqartuulluni
sungiusaqataasinnaanani misigisaq sussaanngilaq, allat kakkaneruleriartortut
isiginnaaginnarlugit. Ilungersunarpoq.
Asiip inuunermini pisut ilungersunartut pissutigalugit ukiut marlussuit arsaassinnaanngilaq. Qujanartumik timersuutini aallutileqqinnikuuaa, ajoqusernermili nalaani angalavoq. Assimi matumani Thailandimiippoq.
Assi: Nammineq pigisaq
Taamaammat inuttut kinaassusaanik annertuumik
oqaluttuartumik aalajangerpoq: Aporfissat uniffiginagit periarfissanik allanik
ujartuerusuppoq. Inuusuttorpassuit ilinniarnertuungorlaat allat assigalugit angalaniarluni
aalajangerpoq. Kangianut.
- Sungiusaqataasinnaannginnama
piffissaq silatusaarlunga – pisariaqaqisumik silaannaq allanngortilaarlugu –
atortariaqarpara. Qaammatip aappaata affaani Kangiani angalavunga.
Siullermik Thailandimut. Kingorna anaananilu
Singaporimut. Naggataagullu ikinngutini marluk peqatigalugit Japanimut.
- Allanik misigisaqarluni nuanneqaaq –
inuusuttut allat assigalugit iliuuseqarluni.
Inuuneq
atorluarlugu
Aliasunneq ajoqusernerlu tunngaviusumik
ilinniarfigai: Inuuneq naatsorsuutigisamik ingerlanngisaannangajappoq. Assoralisimaarnermilu
ilusilersorneqartarpugut. Siornatigut aporfissaannartut takusaraluakkamini periarfissat
takunissaat ilinniarpaa – imminulllu unneqqariffiginissani ilikkarpaa.
- Inuunerup ingerlanerata akuerinissaanut pikkorinnerulersimavunga.
Imaanngilaq anguniagaqanngitsunga – piviusorsiornerulerpungali. Arsaattartutut qaqugukkut
ajoqusissanerluta ilisimaneq ajorparput.
Kiisami arsaateqataaqqissinnaalerami klubbi
sivisuumik isersimaffiusinnaasoq toqqarpaa. Tusaamasaaqisoq B93 angummi
arsaaffigisarsimasaa toqqarpaa. Klubbi qaffannissamut periarfissaqarluni
pikkorinnerpaat tulliani inissisimavoq. Ukioq mannaanavianngilaq – tullianili
piumaartoq upperaa.
- Unammeqatigiiuvugut pikkorissut,
nutaarpassuuppulli, arsaaffimmilu attaveqatigiinnerit piorsarneqartariaqarput.
Periarfissaqarporli.
Ataavartumik arsaattarpoq pingaarnerpaatullu:
Nuannaraa.
- Arsaanneq nuannareqaara.
Nalunngilara arsaassinnaanani qanoq ajortigisoq. Nuannaarnerulersarpunga –
qujamasunnerullungalu.
Asii Berthelsenip piffissaq annertooq arsaannermut atortarpaa: Sapaatip akunneranut sisamariarluni sungiusarneq – sapaatillu akunnerata naanerani unammineq.
Assi: Nammineq pigisaq
Anguniagarpassuit
Ajoqusernini malugisinnaajunnaarsimavaa –
anguniakkallu nutaat ilusinikkiartorput. Anguniakkat arsaannerup saniatigut ilinniarnermut
tunngasut.
- Taamaallunga nunanut
allanukarusuppunga. Arsaatillaqqinnerulernissaq kisiat pinnagu aammali kulturinik
allanik misigisaqarlungalu oqaatsinik nutaanik ilinniarniarlunga. Tamanna
ilinniakkannut tulluarpoq. Nittartakkatigut serviceøkonomitut – tuluttut – ilinniarpoq
aasamullu naammassissalluni. Kingorna ”International Hospitality Management”
(Nunani tamalaani sullissinermi aqutsineq, aaqq.) takornariaqarnermut tunngasumik
ilinniaqqinniarpoq.
Kalaallit
Nunaannut utertitserusuttoq
Asii maanna inuunermi pingajorarterutaani
Danmarkimi najugaqarsimavoq, qulanngilarli: Nunatsinnut angerlarniarpoq. Ilaquttani
ikinngutinilu ilaginiarlugit angerlarluni atuanngiffeqarnissani ukiut tamaasa qilanaarisarpaa.
Piffissanngorpallu arsaattartooreeruni Kalaallit Nunaanni arnat isikkamik
arsaannerannik siuarsaaqataarusuppoq.
- Nunatsinni arnat assaattarnerisa
salliutinneqarnissaat piffissanngorpoq. Sivisuallaamik soqutigineqanngilaq.
Tamanna uggornarpoq. Amerlanerusunik aningaasaliiffigineqarutta arnat
pikkorissut amerlanerit aamma arsaattalissapput.
Tamanna piviusunngorpat Nunarput arnamik
pikkorissumik sungiusaasoqaliinnassanngilaq – aammali inuk inuusuttuunerminiilli
inuunermik ilisimasalik.
