Aviaq tusagassiutilerinermik ilisimasalik

Arsaattarfissuaq Parken. København 2013.

Robbie Williams erinarsuusiani nuannarineqarluartut soorlu ”Feel” aamma ”Angels” qillaalasulimmik kavasserluni erinarsuutigalugit scenemi uteqattaarujoorpoq. Inuit nuannateqalutillu juulimi kiatseruttortoq ataasinngornerup unnukkuani inuunerminni puigugassarinngisaminnik misigisaqarput.

Tusarnaariartut 45.000-it akornanni Aviaq angutaataalu Iinnguaq nikorfapput. Tasiorlutik tusarnaartitsisoq tusarnaarujoorpaat. Feeriarput, nipilersuutillu inuulluataartutut kiffaanngissuseqartutullu misigilersippai.

Ukiut aqqanillit aappariissimapput. Ukiut gepardimit pangalittumit sukkanerullutik ingerlapput, nunarsuarmilu aliikkusersuisartut tusaamaneqarnerpaat ilaat Københavnip qeqqani tusarnaaramikku suli asannilerlaatut misigisimapput.

Iinnguaq Aviap tunuani nikorfavoq, eqqarsaataalu ingerlasuunnavipput. Tassa taanna inuunerma sinnera najorusutara, eqqarsarpoq. Robbie Williamsip tusarnaartitsinermini erinaq kingulleq erinarsorpaa.

”I was her, she was me. We were one, we were free” (Taannaavunga, uangaavoq, ataasiuvugut, killilersugaanngilagut, aaqq.), erinarsormat tusarnaariat tamarmik erinarsoqataammata qiiaamminaannarpoq.

- Katikkumavinga?, Iinnguaq Aviamut isussuppoq. Qiviapiluujutigalugu isaatigut isigaa. Alaqqillugulu. Tupaallappoq. Iinnguaq seeqqummerpoq apereqqillugulu.

- Katikkumavinga?

Aviaq nuannaajallappoq Robbie Williamsillu erinarsuusiamini ”She’s the one”-imi (Inuunerma sinnera najugassara, aaqq.) versi kingulleq erinarsoraa asanerpaasani angerpaa.

Aviaq Fleischer Nuummi ineqarfiani AG-mit naapippara, ilisimatusarfimmilu ilinniartitsisoq paasisaqarfiginerujumallugu oqaloqatigaara. Taartunik nujalik eqqissisimasumillu pissusilik qanormita kinaassuseqarpa?

1985-imi februaarip 26-iani – ukiut 40-t matuma siorna - Nuummi inunngorpoq. Oline aamma Kaaleeraq Jørgensen angajoqqaarai. Aviaq inunngorsimatsiaannartoq arnaa toquvoq. Taamaammat ataatani Upernavimmi aanaminut aataminullu nooqatigaa. Tassani peroriartorpoq. Aanaamit aataamillu pakkusimaarneqqarluni. Nuannersumik. Kingorna ataataa meeqqioqqimmat qatanngutitaarpoq.

- Meeratuaallunga peroriartorpunga, kisiannili aamma naamik, tassami aanaga aatagalu qitornarpassuaqarput, taakkulu qatanngutitut isigaakka, Aviaq Fleischer, kalaallit inuiaqatigiit 1970-ikkunni tusagassiuutinik atueriaasiisa ineriartorneranut tunngasumik ph.d.-liaminik illersueqqammisoq, oqaluttuarpoq.

Atuarnini nuannarigaa

Aviaq Fleischer meeraanermini ilaquttat akornanni isumassorneqarluni pilluarlunilu 80-ikkunni Upernavimmi peroriartorpoq.

- Eqqaamasara siullerpaaq tassaavoq aataga illutta eqqaani quimik iluarsaasoq kaattamik tigummillunga. Meeqqerivimmiittannginnama piffissap annerpaartaa ilagisarpakka, eqqaamasalersaarpoq.

Aviaq Fleischerip atualeqqaarnini eqqaamalluarpaa. Pissanganermik ullut pingasut napparsimasimavoq. Nalullugu meeqqat atuarfiat nuannarissanerlugu, sunaaffami ukiut aqqanillit ingerlanerini ullut tallimaannaat napparsimalluni angerlarsimaannartussaalluni.

- Peroruma laborantinngorusuppunga. Takorluukkanni pingaarnerpaavoq, ilinniartitsisunngunngisaannassallungalu eqqarsartarnikuuvunga, oqaluttuarpoq.

Aviaq meeraanermini sunngiffimmini sammisarpassuaqartarpoq, soorlu qitinneq, erinarsorneq, timersorneq ikinngutimaarnerlu.

Meeqqat atuarfiannit soraarummeerami efterskoleriartussanngorpoq. Ingerlaannarluni ilinniarnertuunngorniarsinnaasoq ilinniartitsisuata siunnersuutigigaluarpaa.

- Danmarkimulli efterskoleriarusuppunga. Allammi taamaattarput, oqarpoq.

Aviaq Fleischer Danmarkiliangajalerluni Nuummi Arctic Winter Gamesertoqarnerani peqataavoq. Ukioq 2002. Tassani angut alarsinnaanngisani naapippaa.

- Aallaqqikkama sapinngisatsinnik attaveqatigiinniartarpugut, taamanilu sianertarneq sms-erlunilu allaqatigiittarneq akisugaluartoq akunnerpassuit oqaloqatigiittarpugut, Aviaq Fleischer oqaluttuarpoq.

Sapaatip akunnerini pingasuni Danmarkimeereerluni angerlaannarpoq.

- Slagelsep eqqaani illoqarfeeqqamiippunga, uannuunngilarlu. Angerlarserlungalu angutaatitaara maqaasivara, eqqaamasarsorpoq.

Ukiumi akersuulluarnerpaaq

Taava Aviaq Fleischer meeqqat atuarfianni ilinniartitsisumi siunnersuutaa malillugu Nuummut nuulluni ilinniarnertuunngornialerpoq. Angutaatitaani najorlugu. Iluaallak.

Akuutissalerinerup uumassusilililerinerullu silarsuaani suli laborantinngorniarusuppoq, ilinniarnertuunngorniarfimmi ilinniarfissanik nittarsaassisoqarnerani Sanamut pulaarnissami tungaanut.

- Qanoq suleriuseqarnersut takuara, ullullu tamaasa suliaat ataasiinnaasutut uannut misinnarput. Uanga taama sulerusunngilanga, sussa, ilinniakkamik allamik aallartitsiinnassaanga, Aviaq Fleischer oqaluttuarpoq.

Ukiut pingasut ilinniarnertuunngorniareerluni ilinniakkamillu allamik takorluuilereerluni ilinniarnertuunngorpoq, soraarummeeramillu tupaallaatigisaminik ”Ukiumi akersuulluarnerpaatut” toqqarneqarpoq.

Taava Aviaq Fleischerip Ilisimatusarfimmi oqaasilerinermut, atuakkialerinermut tusagassiuutilerinermullu immikkoortortami nuannareqisaminik ilinnialerpoq. 2010-mi bachelorinngorpoq.

- Tusagassiuutilerinertaa nuannareqalugulu soqutigilluinnarpara, oqarpoq. Aviaq Fleischer ukioq affaa Aalborgs Universitetimi ilinniarpoq, tassani tusagassiuutilerinermi ilisimatusarpoq. Silap allanngoriartornera pillugu Sermitsiami AG-milu ukiuni qulini allaaserineqartartut inaarutaasumik allaaserai.

- Qaammatini pingasuni aviisinik qupperaavunga, tassani silap pissusia pillugu ukiuni 20-ni allaaserisat tamaasa nassaarisussaavakka. Aviiserpassuupput, illarpoq.

Naammassigami ilinniartitsisunngunngisaannassalluni oqarnikuugaluarluni ilinniarnertuunngorniarfimmi ilinniartitsisunngorpoq.

- Ukiut arfinillit ilinniartitsisuuvunga, sunaaffami ilinniartitsisuuneq nuannarilluinnassallugu, oqaluttuarpoq.

Nunarsuarmiooqataasut nutaat

Aviaq Fleischerip aappassani naapissimavaa, ilinniakkani naammassisimavaa namminerisaminnillu ineqarput. Taava suna tullinnguuppa? Nunarsuarmiooqataasut nutaat.

- Meerartaarniarluta aalajangerpugut, oqaluttuarpoq.

Oqaatigiinnarlugu ajornanngeqaaq.

- Naartulersinnaannginnama marloriarlunga kinguaassiorsinnaanissamut nakorsartippunga. Taamaakkaluartoq suli naartulersinnaanngilagut, Aviaq Fleischer oqaluttuarpoq.

Nåh, ajunngilaq. Ilisimatusarfimmi suliffittaarpoq.

- Meerartaarnissara utaqqitiinnassallugu eqqarsarpunga. Suliffittaara aallukkusuppara, oqarpoq.

Silarsuarli allatut pilersaaruteqarpoq. Naartulerpoq.

Ulloq suliffiusoq siulleq naartulluni oqartariaqarpoq. Ups.

- Ernerput inunngoqqammertoq AAMMAARLUNGA naartulerpunga. Taamaalillunga ukiut pingasut naartuvunga, Aviaq Fleischer oqaluttuarpoq.

Aappariit marlunnik meeraqarput. Niviarsiaraq arfinilinnik ukiulik nukappiararlu arfineq-marlunnik ukiulik.

Ullumikkut ph.d.-nngorniareerluni nalinginnaasumik sulileqqinnini sungiunniarsaraa. Ph.d.-nngorniarnermini kalaallit tv-qarfiisa pilersinneqarsimanerat, tusagassiuutit imaasa oqaluuserineqarlutillu misissorneqarneri, KNR-TV-mi aamma tv-qarfeeqqami Tusaat TV-Aasianni tusagassiuutit toqqorsiviisa qanoq innerat imaallu sammivai.

TV pillugu allaaserinninniarneranut KNR-ip toqqorsivianut pulaarneq peqqutaavoq.

- Filmitoqqat toqqorsiviillu karsiniiginnartut takuakka. Misissorneqarsimanatillu digitalinngortinneqarsimanngillat. Illorsuaq imermit innarlerneqarsimallunilu allanik ajoquteqarpoq, taamaalillunga kajumissusinillungalu arlaannik iliuuseqartariaqarlunga aalajangerpunga, oqaluttuarpoq.

- Ilaannikkut aallakaatitatoqqat sapaatip akunnera isiginnaarujoortarpakka, ilanngutassiallu soqutiginartut, qinersinerniit aallakaatitatoqqaniit puisip amia atorlugu arsaliorsimalluni arsaalluni unamminerit isiginnaarpakka, nuan!, oqarpoq.

Aviaq Fleischerip suliniutini aallartereeraa KNR toqqorsivimmiittunik digitalinngortitsinissaminut aningaasaliiffigineqarpoq.

Siunissamut pilersaarutai suli Ilisimatusarfimmut tunngapput.

- Suliffiga nuannareqaara, allamilu suliffeqarnissara takorloorsinnaanngilara, oqarpoq.