Eqqumiitsuliortut sisamat Naalakkersuisunit ataqqinaammik nersornaaserneqartut
Naalakkersuisut eqqumiitsuliortunut sisamanut eqqumiitsuliornermik ilusilersueqataasimasunut ineriartortsiseqataasimasunullu ataqqinaammik tunniuttakkanik siullermeerlutik nersornaasiipput.
Ataqqiniarneqartut siulliit sisamat tassaapput filmiliortartoq Inuk Silis Høegh, atuakkiortoq Niviaq Korneliussen, assiliisartoq Inuuteq Storch aamma nipilersortartoq Ole Kristiansen.
Assi: Malik Brøns
Tallimanngornermi marsip 28-ani 2025-imi Kalaallit Nunaanni Eqqumiitsuliornermut Aningaasaateqarfik eqqumiitsuliortunut sisamanut ataqqinaammik tunniuttakkanik nalliuttorsiorpalaartumik tunniussivoq, taamaasilluni Kalaallit Nunaanni eqqumiitsuliortunik ataqqinninnermik killiffik pingaarutilik malunnartinneqarpoq.
Taakku siulliullutik eqqumiitsuliortunut pinngorartitsisunut ataqqinaammik tunineqarput, suliaminnik suliaqarnerminnillu eqqumiitsuliornermut annertuumik sunniuteqarsimasunut aammalu eqqumiitsuliornerup iluani qitiusumik inissisimalersimasunut.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik tusagassiorfinnut nalunaarummi allappoq.
Ataqqiniarneqartut siulliit sisamat tassaapput filmiliortartoq Inuk Silis Høegh, atuakkiortoq Niviaq Korneliussen, assiliisartoq Inuuteq Storch aamma nipilersortartoq Ole Kristiansen.
INATSISARTUT INATSISAATA ALLANNGORTINNEQARNERA
Ataqqinaammik tunniuttakkat eqqumiitsuliornermik ingerlatsineq pillugu inatsisartut inatsisaata allanngortitsisoqarnerata kinguneraa 2023-mi akuerineqartoq, taannalu ataqqinaammik tunniuttagaqarsinnaanermik aammalu eqqumiitsuliortunik akissarsisitsisinnaanermut periarfissiisuuvoq.
Inatsisip allanngortinneqarnerata kingorna ataqqinnilluni tunniuttakkat pillugit Namminersorlutik Oqartussat nalunaarutaat suliarineqarpoq, novembarillu aallaqqaataani 2024-imi atuutilersinneqarluni.
Ataqqinaammik tunniuttakkat ukiuni qulini tunniunneqartarput, ukiumut aningaasat tunngaviusut 250.000 koruuninik naleqarlutik. Pilersitsinermi matumani siunertaavoq eqqumiitsuliortut eqqumiitsuliornermikkut Kalaallit Nunaanni eqqumiitsuliornermik ilusilersueqataasimasut ineriartortsiseqataasimasullu ataqqinneqarnissaat.
Ataqqinaammik tunniussineq eqqumiitsuliortup suliarisimasaanik pitsaassusaanillu nalilersuineq kisiat tunngavigalugu pisarpoq. Nalilersuinermi piumasaqaatit tallimat tunngavigineqartut taakkuppullu inuttut pigiliussineq, paasinninneq, alapernaanneq, nutaanik isumaliorneq eqqumiitsuliortarnermillu ineriartortitsineq.
