Erfalasorput ukiuini 40-ni

- Erfalasorput amoqqaarneqarmat eqqaamalluaqaara. Aqqanilinnik ukioqarpunga Narsamilu ulloq 21. juuni 1985 inuiattut ullorsiortussaalluta. Kommunip allaffiata saani ungalusami qorsooqqinnersamiippugut illup sungaartup inneruulalippassuit qalipaateqataat kujatinnguaniilluta. Qulisimasoq eqqaamaniarpara, eqqaamanerlussimasinnaavarali. Ukiummi 40-t matuma siorna pivoq.

Aap, Erfalasorput ukioq manna ukiunik 40-nngortorsiorparput. Innuttaasut akornanni erfalasoqaleratta nuannaarneq tulluusimaarnerlu atuuppoq. Kisianni aamma akerliusoqarpoq soorlu nunatta nammineq erfalasoqassanersoq paasiuminaatsinneqarluni. Tassami Kunngeqarfiup Danmarkip ilaatut Dannebrog erfalasoraarput. Nammineq isumaga naapertorlugu aamma erfalasortaarput aappaluttoq qaqortorlu kusanaatsoq - kusanaatsorujussuaq. Dannebrogip seqerngup sikumi tarrikkiartorneranik taarserneqarnera kalaallit allat assigalugit nuanniilliutigaara. Taamanimi meeraavunga allanngornerillu tamarmik nuanniilliutigisarlugit. Taamani aamma eqqarsaatiginngilara ilisarnaat taamaattoq inuiannut qanoq isumaqarsinnaanersoq.

Sungiussinerma inuiaassutsinnillu tulluusimaarinninnerma Erfalasorput pillugu isiginnittaatsinnik allannguerujussuarpoq. Pisinnaagaangama pigisannik erfalasoq saqqummertarpara. Erfalasorpummi inuiattut kinaassusitsinnut ilisarnaataalersimavoq. Ataatsimoorutigisarput.

Inuiaavugut qeqertarujussuarmi siammasissorujussuarmik najugaqarluta assigiinngisitaartorujussuuvugut. Kujataani peroriartorpunga qimussillu allamiut isiginneriaasiattulli allanartigipput. Nerisatigut kulturitsinni assigiinngisitaartoqarsinnaavoq assigiinngisitaarnitsinnik ersarissititsisunik. Puisip orsua igititaq mamareqaara avannaamiulli amerlanersaasa orsoq nutaaq imaluunniit tarajortigaq panertortorniartillutik allanilluunniit neriniartillutik perusunnerusarlugu. Inughuit aamma assaannikunik appaliarsuttortarput, mamartuliarlu taanna eqqarsaatigiinnarlugu sapingajappara. Sumiiffinni assigiinngitsuni mamartuliat amerlassajunnarsipput. Ungaseqalutami najugaqarnitsigut suminngaanneernerput aallaavigalugu pissusissamisoortumik assigiinngisitaarpugut. Oqaatsinut aamma tunngasoqarpoq. Tamanna oqallisaajuaannarpoq.

Allatigut aamma ataatsimoorussarinngisatsinnik peqassajunnarsivugut. Siornatigut allaaserisartakkanni immitsinnut tapersersorlutalu kivitsisinnaanissatsinnik pikkorinnerulerumalluta inuiattut sumik ataatsimoorussaqarsinnaanerluta ujartorpara. Kingullermik allaaserisaqarama ataatsimut kinaassusitsinnik kalaallit kalaallinut oqaluttuaasa aalajangiisooqataasarnerat allaaseraara. Frederik Elsnerillu LinkedInimi sapaatit akunnerisa matuma siulianni allataa atuarakku nuannaajallappunga allassimavormi:

»2025-mi Inuiattut ullorsiorneq nalinginnaasumit pingaarnerussaaq. Ukioq mannami Erfalasorput asasarput ukiunik 40-nngortorsiortoq nalliussissavarput – inuiattut kinaassusitsinnut ataatsimoornitsinnullu ilisarnaat nukittooq.«

Imaassinnaavoq Erfalasorput 1985-imi tamanit tikilluaqqusaasimanngikkaluartoq. Aamma imaassinnaavoq sinerissami erfalasulerfinni Dannebrog suli amuneqartartoq (10’kkunni arlaqalaartunik takusaqarpunga). Erfalasorpummi maanna saqqummertarparput amulluguluunniit – kaffillerfinni, angerlarsimaffiit silataanni kiisalu suliffeqarfiit oqartussaqarfiillu silataanni. Erfalasorput inuiattut ilisarnaatigut pissusissamisuulersimavoq. Ilisarnaat inuiattut ataatsimoorfigissallugu pisariaqartitarput tulluusimaarutigisarpullu.

Piffimmi Kalaallit Nunaannik aatsaat taamak annertutigisumik ukkataqartoqartillugu avataaniillu nukinnut akiuunniarluta ataatsimoornissamik pisariaqartitsigitilluta erfalasutta inuiattut ataatsimoorluta nersorinninnissarput naleqqulluinnarpoq. Erfalasoq nunarsuarmi qeqertat annersaanni inuiattut ataatsimoorlutalu nukittuutut naleqartitatsinnut, kulturitsinnut kinaassusitsinnullu ilisarnaataasoq.