Filmiliornermi nutaaliortoq

Marc tasersuup Qallussuup tungaanut pisuppoq.

Seqineq, qilak tungutsorissoq qaqqarsuarlu alutornartoq Ukkusissaq allaanngillat Kalaallit Nunaanni qalipaasup Emanuel A. Petersenip qalipagai.

Marcip assiliissutini droninilu taskimini qernertumiitippai. Suliassaqarpormi: Nunap ilaanik ujaqqanillu assigiinngitsunik angissusilinnik assiliinissaq.

Ujaraaraq tigoriarlugu kaajallallugulu assilisaariarlugu tatsip tungaanut ingerlaqqippoq. Ujarak suliniummi Marcip aallartitaani atugassaavoq.

Ujaqqanik nunallu ilaanik assigiinngitsunik ilusilinnik, ukiuni marlungajanni kingullerni suliaqarnermigut immikkut ilisimasaqapajaalernini eqqarsaatigalugu qungujuppoq.

Nunatsinni pinngortitaq annertuumik sammereerlugu Marc allaffimminut utertussanngorpoq, assillu qarasaasiamut nuullugit videospilimi ineriartortitamini atugassanngortissavai.

Takorluugaa ersarippoq: Spili kalaallit kulturiannik pinngortitamilu Kalaallit Nunaanniittumik isumassarsiffiusoq.

Marc Fussing Rosbach filmiliortartuuvoq, minnerunngitsumillu ataataanini pingaartigaarlugu Taamattaaq qarasaasiat silarsuaanni oqaluttuallaqqissuuvoq nutaaliortoq – taamaalillunilu nunatsinni filmiliornermi pinngorartitsisuni kinguaariinni tulliuttuni aqqutissiuussisunut ilaalluni.

Alapernaatsuunini, meeraanermini takorluukkani Kalaallillu Nunaata nunarsuarmi nalunnginneqarnerulernissaanik kissaateqarnini nukigalugit, panini sisamanik ukiulik, Ukaleq peqatigalugu Nuummiuuvoq. Imaluunniit nammineq taasarneratut Ukaliaraq.

Atagu angut assiliisoq ilinnialaariartigu.

Marc Fussing Rosbach 1995-imi, ukiut 30-t matuma siorna, ulloq 13. september inunngorpoq.

- Aarhusimi inunngorpunga, marluliinissamalu tungaanut tassani najugaqarpugut, kingornalu Ilulissanut nuuppugut, oqarpoq.

Ane Lena Fussing Rosbach aamma Edvard Rosbach angajoqqaarai.

- Anaanaga ilinniartitsisuuvoq, meeraaninnilu ataata ukiorpassuarni Hotel Arcticimi sulivoq, Marc Fussing Rosbach oqaluttuarpoq.

Angakkut silaannarsualiartaatillu

Marc Fussing Rosbach marlunnik qatannguteqarpoq. Qatanngutigiinni akullersaavoq.

- Naalattortaavunga. Angajoqqaakka angajunnut sanilliullugu uannut killilersuinerupput. Immaqa ingasangajattumik, taamaammallu erngunnerit assigisaallu kingusissukkut aatsaat misigaakka, taanna oqaluttuarpoq.

Kingusinnerumaakkut inerittoq Marc tamanut inissaqartitsisuuvoq, misigissutsinut tamanut, nunamullu tunngasortaalluni.

Eqqaamasai siulliit 1990-ikkunni Ilulissani pipput.

Filmiliornerup silarsuaanut soqutiginninnera tassanngaanneersuuvoq. Meeraallunili oqaluttualianit, silaannarsualiartaatinit angakkunillu tiguartissimavoq.

- Harry Potter, Star Wars Ringenes Herrilu nalaanni alliartorpunga, taanna oqaproq.

Ilaqutariit filmit nuannarilluartuuaat. Aliikkutaannaanngillat – taakku kateriffigisarpaat, avitseqatigiffigalugit pulaffigisarlugillu.

- Ataata nipilersuutinik appittarpoq, taavalu nipilersukkap filmimit sorlermeernera eqqoriartussaasarparput, Marc Fussing Rosbach eqqaamasalikkersaarpoq.

Eqqaamasat siulliit tassaapput nunarsuarnik nammineq pilersitsilluni sanarfinissamik takorluukkat, nipit, qaamanerit nikittarnerillu oqaluttuami atorneri.

Marcip ukiuni 15-ini filmiliortarnermik suliaqarnera inimi popcornitornermiit aallaaveqarput, ilaqutariinnit akuusuninngaanneerlutik fjernbetjeningimillu oqaluttualiamik tullermik aallartitsisuminngaanneerput.

Harry Potter samminngikkaangamiuk, Marc meeqqatulli allatut atuartarpoq.

- Atuaqatigiit tissisaarisartoraannga, takornartanullu nipaarluusartoq, ilisarisimasammali akornanniikkaangama nipitusaqaanga, oqarpoq.

Sunngiffimmi Marc ikinngutaalu pananik qullilinnik panaassuataarlutik imminnut filmiliarisarput. Assilisat pinnguaralugit katiterlugit innermik pilersitsillunilu angakkuaganngortittarpai.

- 13-it missaannik ukioqarlunga special effektit pinnguaralugit aallartippakka, Marc Fussing Rosbach oqaluttuarpoq.

Taamanikkut Ilulissani Arctic TV-mi aamma sulisarpoq, filmeeqqanillu sanasarluni.

- Allamik suliaqarnikuunngisaannarpunga. Aa, Pisiffimmi sulisussatut utaqqisuni allatseqqavunga, sianerfigineqanngisaannarpungali. Qujanartumik, illarluni oqarpoq.

Efterskolernani filmiliortoq

Meeqqat atuarfiat naammassigamiuk Marci 15-inik ukiulik Danmarkiliarpoq, Syddjurs Kommunemilu Ebeltoftip eqqaani Femmøller Efterskolerluni. Allat taamaaliortarneri piinnarlugit, taamatullu aamma angajuni tassaniissimammat.

- Qaammatialuit qaangiummata angerlarpunga, uannummi soqutiginanngilaq. Ikinngutigilluakkammali ilaat Jaqqi tassani naapippara, susaanngilanga, Marc Fussing Rosbach oqaluttuarpoq.

Ilulissanut uterpoq, ukiorlu ataaseq qaangiummat Marc filmiliornermik ilitsersuisumit Malik Kleistimit, taamanikkut Tumit Productionimik piginnittumit attavigineqarpoq.

- Maliup filmeeraliara Youtubemi takusimavaa, suleqatigerusullungalu oqarpoq, Marc Fussing Rosbach oqaluttuarpoq.

Tassanngaannarlu Marc Nuummiileriasaarpoq, filmiliortut inersimasut misilittagaqartullu akornanni inuusuttortatuaalluni.

- Siornatigut Nuummiissimanngisaannarpunga. Aap, mikisuaraagallarama, kisianni kingorna naamik, taamaammallu suut tamarmik uannut nutaarluinnaapput, oqarpoq.

17-inik ukiulik Marc Fussing Rosbach juullimut ammartakkami ”Nissit Angakkuaatillu”-mi special effektilerivoq. Kingornalu tassa tamakku qimanngilai.

- Ukiuni 15-ini peqataasarninni immaqa kalaallit filmiliaasa 70 procentiisa missaanni peqataasarpunga. Malik Kleistip filmiliaani tamani suleqataasarpunga, oqarpoq.

Ersinartulikkersaarummi ”Qaqqat Alanngui”-ni special effektilerisuuvoq, taannalu kalaallit filmiliaanni takuneqarnerpaatut nalilerneqartarpoq, nunatsinnilu innuttaasut pingajorarterutaasa takusimavaat.

Furos Image

Marc Fussing Rosbach kujataani najugalimmik arnaatitaarami Tumit Productionimi suliunnaarpoq.

- Qaqortumut nuuppunga ilinniarnertuunngorniarfimmilu atualerlunga, oqaluttuarpoq.

Taamanikkullu Marc Fussing Rosbachip suliffeqarfiutini, Furos Image, ukiut qulingiluat matuma siorna 2014-mi aallartippaa.

- Ukioq ataaseq qaangiuttoq ilinniarnertuunngorniarfimmi taamaatippunga Ilulissanullu uterlunga. Tamatuma ilinniagaqarnermik ingerlatsinnginnissara uppernarsarpaa, filmiliornermut uteqqikkusuppunga.

Ilulissanut sungiusimasaminut uterami Marcip filmiliaqqaatini ”Akornatsinniittut – Tarratta Nunaanni”, sci-fi fantasifilmi suliaralugu aallartippaa. Filmi ilaquttani peqatigalugit suliaraa, ikinngutigilluagaasalu ilaat Kasper Bach Zeeb pingaarnertut inuttaavoq, filmiliornermulluuna atatillugu Marcip Ikimalik Pikilak, panimmi arnaa, naapikkaa. Marcip Ikimalik radiomi inuit kakioriaasiat tunniit eqqartoraa tusarpaa. Filmiliaminut tulluartippaa, filmimmi kalaallit anersaarsiornerannik ilisarnaateqartussaavoq. Torrak, eqqarsarpoq. Suliniummut ilannguttariaqarpoq.

- Utoqqatsissutaannaavorli. Inequgisorujussuuara, attaveqarfigerusuinnarparalu, oqaluttuarpoq. Paniat Ukaleq 2021-mi inuuvoq.

- Meeraaninnilli ataatanngorusuttuarsimavunga. Ullut tamarluinnaasa Ukalermik meerartaarsimanera pilluaatigaara, Marc Fussing Rosbach, meeqqap arnaanik inooqateqarunnaarnikoq oqaluttuarpoq.

Marcip filmiliami aappaa ”Akornatsinniittut – Kiinappalik” 2021-mi filmiliaraa, taannalu filmiliaqqaataata nanginneraa. Taakku saniatigut filminik naatsunik pingasunik aamma suliaqarpoq.

Seqertitsivimmit spilinut

Marc Fussing Rosbach maannakkut videospilimik Kalaallit Nunaanni aallaavilimmik suliaqaleruttorpoq.

- Spili ”nunarsuaassaaq ammasoq”, tassanilu nunami immamilu nuna nunatta pinngortitaanik kulturianillu isumassarsisoq ilisimasassarsiorfigineqarsinnaavoq. Spillertorlu nunatsinni avatangiisini ingerlaarsinnaavoq, illuaqqanilu isertukkanik toqqortanik ujarlerluni eqqumiitsunillu misigisaqartarluni, Marc Fussing Rosbach oqarpoq.

Ukiorpassuit takorluugara piviusunngoraluttuarpoq.

- Meeraaninni ilaqutariiulluta spillertorujussuuvugut, nunatsinnilu avatangiisini nunarsuaasuusaartitami qanoq innera takorloortuarsimavara, oqarpoq.

Naak saqqummerfissaa suli ullulerneqanngikkaluartoq, suliniut kulturikkut nutaaliornermik ersersitsivoq: qarasaasiami pinnguaat siulleq nunatsinneersoq nunatsinnillu kinaassusilik.

- Taavalu aamma spilit atorlugit Kalaallit Nunarput misigineqarsinnaavoq, taannalu ullutsinnut Kalaallit Nunaannik Kalaallillu Nunaat pillugu soqutiginninnerup annertusiartorneranut naleqquppoq, Marc Fussing Rosbach oqarpoq.

Immikkoortut suut ilanngutissanerlugit Marcip aalajangigassaraa. Ilulissani inoqarfik inuerussimasoq Sermermiut imaluunniit taseq Qallussuaq. Suna tamarmi periarfissaavoq.