Ineriartorneq nutaaq aallartippoq

Arctic Soundsimi angutit arnallu amerlaqatigiinnissaat sulissutigineqarpoq.

Arctic Sounds tassaavoq nipilersortartunik festivalertitsisarneq kalaallit, nunat avannarliit inuillu nipilersugaannik saqqummiussiffiusoq, ukiut aqqanillit matuma siorna 2014-imi aallartittoq.

Festivali nammineq kajumissutsimit ingerlanneqartarpoq ullullu tallimat missaani sivisussuseqartarluni. Arctic Sounds aamma eqqumiitsuliortut assigiinngitsut akornanni pilersueqatigiittarnermut, suleqatigiinnermut, isumassarsioqatigiittarnermut attaveqaqatigiinnermullu sinaakkutaavoq.

Festivalimi nipilersortartut arnaasut angutillu akuunerat naligiissarneqartuaannarpoq, aamma nipilersortartut arnat, angutit aammalu suiaassutsimigut pituttorsimanngitsut nipilersortartut naligiinnerulernissaat sulissutigineqarpoq.

- ’Keychange pledge’ 2018-imi atsioqatigiissutigivarput, tassanilu pisussaaffigaarput nipilersortartutta 50 procentii arnaajumaartut imaluunniit suiaassutsimut pituttorsimanngitsut, Maria Camilla Kristiansen, Arctic Soundsimi siulersuisuni ilaasortaq, oqarpoq.

”Keychange pledge” tassaavoq nunarsuaq tamakkerlugu naligiissitaanissamik suliniut, pikkorissunut nutaanut aningaasaliisartut, festivalertitsisartut, ataatsimeersuartitsisartut, nipilersortartut peqatigiiffii suliffeqarfiillu kajumissaarneqartarput neriorsuuteqaqqullugit aallakaatitassiaminni sulisuminnilu minnerpaamik 50 procentit arnaajumaartut.

- Nipilersortartut erinarsortartullu arnat angutitut nersornaaserneqartartut assigalugit suleruloortartut. Naligiinnerulertoqartariaqarpoq, Arctic Soundsimi siulersuisuni ilaasortaq Kimmernaq K. Heilmann oqarpoq.

AG-mi sapaatip-akunnerani kingullermi saqqummertumi ukiuni 34-ni kingullerni Koda-p nersornaasiuttagai katillugit 97-eriarlutik tunniunneqartarsimasut, taakkunanngalu arfineq-marluinnaat nipilersortartunut arnanut tunniunneqartarsimasut allaaserineqarpoq. Koda-p siullermeerluni arnamut nipilersornermi sulialimmut nersornaat Julie Berthelsenimut "Isumalluarnartumut nersornaat" 2003-mi tunniuppaa.

Koda-p nersornaasiuttagaata siullermeertumik tunniunneqarneraniit ukiut aqqaneq-marluk nersornaasiinerillu 18-it qaangiutereersut.

EPI-p (Eqqumiitsuliornermik Pinngorartitsisut Ingerlatsisullu) AG-mi sapaatip-akunnerani kingullermi saqqummersumi nunami angutit eqqumiitsuliortut amerlanerusut tikkuarpaa.

Siulersuisulli allatut isumaqarput.

- Nipilersortartunik angutaanngitsunik nassaarniarneq ajornaquteqanngilaq. Nunami arnanik nipilersortartukinneraaneq utoqqatsissutaanngilaq. Toqqagassarpassuaqarpoq, siulersuisut isumaqarput.

Arnanut teknikkikkut pikkorissaaneq

Arctic Sounds niviarsiaqqanut arnanullu Sisimiuni siorna teknikkimik workshoppertitsivoq, soqutigineqarnera annertorujussuarmik.

- Nuummi aamma arnat amerlasuut siunissami taamaaliortuarusullutik oqarput, Maria Camilla Kristiansen oqarpoq.

Nipilersortartoq Arctic Soundsimilu siulersuisunut ilaasortaq Athena Lings teknikkimik workshoppimi peqataavoq kingornalu Sisimiuni tusarnaartitsinermi teknikeriulluni.

- Tusarnaartitsineq piareersarniarlugu ajornartorsiuterpassuaqarpoq. Amigaateqarluta, kinguartoorluta, Athena Lings oqaluttuarpoq.

Uiveruttulersut angutinik takkuttoqarpoq.

- Naluara kikkuunersut nipilersortartuunersulluunniit. Ataaseq oqarasuaatikkut oqaluppoq, oqarlunilu: ”Suli naammassinngillat, arnaannaapput.” Arnaariaratta ajornartorsiuteqarsorivaatigut, Athena Lings oqarpoq, oqaluttuaralugulu aamma nipilersortartut arnat taamatut pissusilersortut misigisaqarfigisimallugu.

Nipilersornerup silarsuaani arnat angutininngarnit isornartorsioruminarnerusartut Arctic Soundsimi siulersuisut isumaqarput.

- Tamanna allanngortikkusupparput. Pingaaruteqartorujussuuvoq arnat, angutitit suiaassutsimigullu pituttorsimanngitsut assigiimmik pingaartinneqarnissaat, ineriartortinneqarnissaata ukkatarineqarnissaallu, Kimmernaq K. Heilmannip oqaatigaa.

Nipilersornerup silarsuaani angutit tatigineqarnerisut arnat tatigineqanngitsut isumaqarpoq.

- Taanna ileqqoq, biilernerluttumik takugaanni: Arnaagami biilernerluttoq. Taanna ileqqoq aamma nipilersortartut silarsuaanni atuuppoq. Taanna eqqarsartariaaseq peertariaqarpoq tamarmillu naligiimmik pineqalerlutik, Kimmernaq K. Heilmann naqissusiivoq.

Tusarnaartitsisoqassatillugu aningaasaqarneq annertuumik aallaaviusartoq aamma tikkuarpaa.

- Naligiissitaaneq eqqarsaatigineqarneq ajorpoq, suiaassuseq assigisaalluunniit. Tusarnaartitsinernik aaqqissuisarneq aningaasannanniarneq pillugu naliginnaavoq.

Arnat amerlanerusut

Arnat amerlanerit nipilersorsinnaalissasut Arctic Soundsip ilaatigut suliniutigaa.

Maria Camilla Kristiansen Sisimiuni nipilersornermi ilinniarfimmi atorfeqarpoq, tassanilu arnat scenemi nipilersuutinik atuisuunissaat suliniutigineqarpoq.

- Arnat tumerparpaartut arnanit niviarsiaqqaniillu eqqumiigineqartarunnaarniassammata. Sineriammi arnat nipilersortut qaqutigoortorujussuugamik. Arnarmi tumerparpaartoq takunngikkaanni eqqarsartoqarnaviannginnami: Hey, uangaasinnaavoq, Maria Camilla Kristiansen oqarpoq.

Arctic Sounds siorna koncertertitsimmat, arnanut maligassiuerusuinnarlutik arnaannarnik suiaassutsimigullu pituttorsimanngitsunik nipilersortoqarpoq,

Nipilersortartunik toqqaanermi kikkut toqqarnerlugit ilisimaneqartariaqartut Maria Camilla Kristiansenip oqariartuutiginiarpaa.

- Tamatumunnga isiginnittaatsip allanngortinnissaa ajornaatsuinnaanngilaq. Eqqarsartariaatsip allanngortinnissaa aamma imaannaanngilaq, oqarpoq.

Kimmernaq K. Heilmannip isumaqatigaa oqarlunilu ilorraap tungaanut ingerlasoqartoq.

- Nipilersornerup silarsuaani suiaassutsikkut immikkoortiterinnginnissaq inuit eqqummaariffiginerulerpaat. Tamanna aallartittoq nutaajuvoq, oqarpoq.