”North of North” kavaajatut puisip amianik
sanaatut kissalaartigaluni issittormiullu qungujunnarisaannik alutornartumik
tupaallannartumillu imaqarluni isiginnaagassiatut ”ataannartumik isiginnaarusunnartut”
pissanganartuujuaannartariaqannginnerannut assersuutissaqqippoq.
Nuannersunik
inuttalersugaagami issittormiut kulturiannik ilisarnaqisumik kissalaarnermillu
misiginartumik takutitsisuuvoq.
”North of North” kavaajatut puisip amianik
sanaatut kissalaartigaluni issittormiullu qungujunnarisaannik alutornartumik
tupaallannartumillu imaqarluni isiginnaagassiatut ”ataannartumik isiginnaarusunnartut”
pissanganartuujuaannartariaqannginnerannut assersuutissaqqippoq.
Nuannersunik
inuttalersugaagami issittormiut kulturiannik ilisarnaqisumik kissalaarnermillu
misiginartumik takutitsisuuvoq.
Isiginnaartitsisartup Anna Lambep Iqalunneersup
isiginnaagassiami nangeqattaartumik pingaarnertut inuttaasoq Siaja, arnaq issittormioq
26-nik ukiulik, aappani avereerlugu inuunerminik aaqqiiniarsarisoq,
inuttaaffigaa. Siaja panini arfinilinnik ukiulik, asanartoq Bun (Keira Belle
Cooper), ilagalugu arnaminut Neeveemut (Maika Harper) nuuppoq. Siaja najukkamini
kulturip illuani sulilerniarluni uteriikkami Helen (Mary Lynn Rajskub), illoqarfimmi aqutsisoq, qaamasumik amilittut
annaassiniartutut pissuseqarsinnaasoq aammali illoqarfimmik Ice Covemik,
Canadap ilaani Nunavummi Prince
of Wales Islandimi, isiginnaagassiorfiusumi illoqarfiusuusaartinneqartumut, nuannarinnilluartuusoq,
sulisitsisorilerpaa.
Isiginnaasassiami sekundit siulliit 30-it Siaja
imminut ilisaritimmat ingerlaannaq tiguartilluinnarpunga.
Sooq?
Nunarsuup kujasinnerusortaani najugallit
amerlanerpaat qangatut illuikkiani issuinnarnillu illuikkiani
najugaqarnitsinnik eqqarsartarnerannik Siajap oqaasii pissutigalugit. Arnaasoq issittormioq
ullutsinnut malinnaasoq, ’qanorluunniit isumaqaraluarpat’. Issittumi upernaaq
issittormiunut ukiortaajupajaartartoq oqarnera ilanngullugu.
Allaat uima, quiasaarusianik
asanninnilersaarnertalinnik isiginnaarneq ajoraluartup, immikkoortut arfineq-pingasut
tamaasa isiginnaarlugillu nanginnissai qilanaarilereerpai.
”North of North” sapiissuseqarluni
isiginnaagassiaavoq nangeqattaartoq, aammali sammisanik oqimaatsunik quianartunngortitsisinnaasoq.
Isiginnaagassiami oqaluttuap allamut sangunerani issittormiut meerartaannik
pinngitsaaliilluni arsaarinnittarneq pillugu oqaluttuaq avaanngunartoq immikkut
ittumik tussunngunarpoq.
Imerajunneq, kiserliorneq kingunerlutitsinerlu
isiginnaagassiami aamma ilaapput, quianartunngorlugillu
isiginnaagassiarineqarneri piviusorpalaarlutillu ajortaarunnarput. Soorlu tassa
alianartut quiassuaatiginninngikkaluarluni ilungersunarnerilu
assortunngikkaluarlugit isiginnaagassiaq aqqutigalugu
illaatigineqarsinnaalersut. Issittormiut isiginnaagassiaat
nuannernerpaagaangamik taamaattarput!
Zedna Netfliximi
Isiginnaagassiaq nangeqattaartoq inuummarissinartumik killitsinnartumillu
quianartuliaavoq, inuit kulturiannut
kissalaartumut aammali immikkuullarissumut ammaassisoq.
Uanga nammineerlunga ”North of North” isiginnaagassaqartitsivimmi
Netfliximi isiginnaarpara, kulturerpullu taamatut takullugu nuannerluinnartoq
isumaqarpunga. NUAN! Sassuma arnaa, tunniit, sapangaaqqanik iverusiat takisuut
qalipaatigissullu, puiseqqaanniunnerit kamiillu isiginnaagassiami
pitsaalluinnartumik suliaasumi takullugit alutornaqaat.
”North of North” isiginnaagassiatut issittumi
pinngortitatut issittorsuartut kusanartutullu isiginnaagassiorfigineqartutuulli
ippoq, tamannalu innuttaasut ataatsimoornerannut akerliusutut ippoq.
Isiginnaagassiami nangeqattaartumi issittormiut
nipilersortartut soorlu Tanya Tagaq, torlorsortartoq Canadami Nunavummeersoq,
aamma isiginnaagassiami Sassuma Arnaasoq, aamma nipilersortartut kalaallit
soorlu Tarrak aamma Nanook, ilaatinneqarput.
”North of North” issittormiut kulturiannik
nersorinninnerusoq inuillu pillugit oqaluttuaasoq ikinnerussuteqartut
nunarsuarmi sumiluunniit najugaqartut tarrarsorfigisinnaassajunnarsivaat.
Isiginnaagassiaq naagakku kulturikkut pisoorsuartut misigalungalu,
tulluusimaarlungalu nuannaarpunga. Pisariaqartitaqqissaara. Qujannamiik!
