Inuusuttut Kulturikkut Illuat kusassarneqartoq

Linda Møller Petersenip, eqqumiitsuliortutut naammasserlaap, Kommuneqarfik Sermersuumi Sunngiffik kulturilu pillugit immikkoortortaqarfia suleqatigalugu Inuusuttut Kultrikkut Illuata iigai betoniusut kusassarlugit qalipappai.

- Inuusuttut Kulturikkut Illuata iigaanik kusassaallunga qalipaasinnaanera nuannaarutigeqaara. Taamatut periarfissinneqarneq uannut immikkuullarissuuvoq. Peroriartorfinni kusassaaqataavunga, kusassaanikka inuusuttuaqqaniit takuneqariaannaapput, neriuppungalu eqqumiitsuliornermik soqutigisallit periarfissagissaarnertik takussagaat, Linda Møller Petersen kommunip Facebookimi quppernera naapertorlugu oqarpoq.

Kusassaaneq suliniummut Paamiut Asasara part 2-mut, katillugit 1,4 million koruuninik aningaasartuuteqarfiusumut, ilaavoq. Suliniummi ataatsimoorneq, peqqissuseq pillugu paasisitsiniaaneq illoqarfimmilu kusassaaneq aqqutigalugit Paamiuni pitsaasumik inuuneqarnerup nukittorsarnissaa siunertaavoq.