Isiginnaartitsisartup isiginnaartitsisarfiullu nalliuttorsiornerat isiginnaartitsinermik malunnartinneqartoq
Isiginnaartitsisarfik Tuukkaq isiginnaartitsisartorlu Bendo Schmidt kaffisortitsinermik isiginnaartitsinermillu „Festens Gave“-mik nalliuttorsiutigineqarput.
Tuukkaq aamma Bendo Schmidt ukiuni 50-ini nalliuttorsiormata Festens Gave Holstebromi Odin Teaterimi – Nordisk Teaterlaboratoriumimiittumi takutinneqarpoq.
Assi: Jesper Hansen
Isiginnaartitsisarfik Tuukkaq Jyllandip kitaani Lemvigip eqqaani illoqarfeeqqami Fjaltringimi pilersinneqarmat ukioq manna ukiut 50-it qaangiupput. Tamanna sapaatiummat Holstebromi Odin Teaterimi -Nordisk Teaterlaboratoriumimiittumi kaffisoqatigiinnermik, saqqummersitsinermik ammaanersiornermik, oqalugiaateqarnermik aliikkusersuinerpassuarnillu nalliussineqarpoq.
Tuukkaq Norgemi isiginnaartitsisartumit ilitsersuisartumillu Reidar Nielsenimit, siorna toqukkut qimagussimasumit, pilersinneqarpoq. Isiginnaartitsisarfik kalaallinut isiginnaartitsisartunut ilinniarfissatut Kalaallit Nunaannullu tunngasunut ministereqarfimmit akuerineqarpoq.
Nalliuttorsiornermi 100-t sinnerlugit peqataapput - kaffillertoqarlunilu aliikkusersuisoqarpoq.
Assi: Jesper Hansen
Tuukkami isiginnaartitsisartut ilaasattaaq isiginnaartitsisartoqatigiit Silamiut kingusinnerusukkut 1984-imi, tamatuma kingorna Nunatta Isiginnaartitsisarfianik taaguuteqalersoq, tunngavilerpaat.
- Taamaammat Tuukkaq kalaallisut oqaaseqarnerup ineriartorneranut pingaaruteqangaarpoq, kaffillernermi oqalugiartut arlallit oqarput.
Eqqaamasat siammarsimasut
Reidar Nielsson toqummat Fjaltringimi illut isaterneqarput – aamma Reidar Nielssonip toqqorsivissuata annersaa, allagatoqqat, kiinarpaat assillu Nunatta Katersugaasivianut Allagaateqarfianullu tunniunneqarput. Reidar Nielsonip katersugaasa sinneri, qimussit, kiinarpaat, qimussit nannup amillit allarpassuillu, Reidar Nielssonip ukiuni 25-ni uiata Erninnguaq Poulsenip Odin Teaterimut – Nordisk Teaterlaboratoriumimiittumut tunniuppai.
Erninnguaq Poulsenip – Reidar Nielsenip ukiuni 25-ni uiata – Nielssonip toqqortaaterpassui inuillu oqaluttuarisaanerannik katersugaasa ilaat Odin Teatrimut tunissutigai. Amerlanerpaalli Nunatta KAtersugaasivianut Allagaateqarfianullu tunniunneqarput.
Assi: Jesper Hansen
Odin Teateri – Nordisk Teaterlaboratoriumip Tuukkaq ukiut ingerlaneranni qanimut suleqatigisarsimavaa – aamma Holstebromi nunap immikkoortuani isiginnaartitsisarfiit Tuukkaq pillugu isiginnaagassiarpassuarnik isiginnaartitsisarsimapput.
- Fjaltringimi Tuukkamit ullumikkumut, Nordisk Teaterlaboratoriumimut, kalaallisut podcastimik Inunamik saqqummersitsisarfimmut, pilersaarutaanngikkaluartumik toqqaannartumilli atassuteqarpoq, isiginnaartitsisarfimmi pisortaq Per Kap Bech Jensen oqarpoq.
Tuukkaq kisimi sapaatiummat ukiunik 50-inngortorsiunngilaq. Aamma isiginnaartitsisartoq kalaaleq Bendo Schmidt isiginnaartitsisartutut ukiunik 50-inngortorsiorpoq. Taanna Tuukkami isiginnaartitsisartunngorpoq. Nalliuttorsiornermi isiginnaagassiami Festens Gave-mi minutsit 35-it sivisussuseqartumi kisimiilluni isiginnaartitsisuuvoq.
