Issittumi nerisassanik nutaaliorneq

Tikaagullik qisummut amitsukujuumut ikkussugaq. Kujataanit savanit shawarma. Tuttunit bagel. Ilaatigut tamakku Nuup qeqqani Street Foodimi pisinnaavatit.

Nunarsuarmi street foodinik tuniniaaviit pizza slicenik, nersussuarnit burgerinik rullekebabinillu tuniniaasarneranni, Street Food allamik sammiveqarpoq.

- Rullekebabinik puulukiminermit nersussuaminermilluunniit sanaanit allaanerusunik tuniniaarusuppunga, Niels Jørgen Rosing, Street Foodimik piginnittoq oqarpoq.

Street Foodeerniarfimminit kalaaliminernik sassaallertarnissani siunertaraa – tikaagulliminernit savaminernillu sanaanik – muteerniusumik streetfoodinullu assingusunik.

AG tassungarluni sassaalliutinik pissanganartunik ussiiartorpoq.

Atagu savaaraq kujataaneersoq aallarniutigeriartigu?

Savaaraq uutaq pommes frittesini friturimik uutanut ilineqarpoq, peberfrugtinillu nutaanik, salatinik agurkillu qalliuteqarpoq. Igasup urtedressing nammineq sanaaq sipaanngivippaa, seqernullu tarrikkiartulerneranit kusanarneruvoq.

Kaallunga Nuup qeqqani nerriviup saavanut ingippunga, silamilu pequtit tassunga inissinneqarsimapput. Streetfoodimmi aqqusinermi ussigassaapput, ilaa?

Savap mamaa pikkunarlunilu assigiinngiiaarpoq. Savap qaqqani ivigartortuunera neqip mamaani, tungoqarluarluni sakkortuumi malunnarluarpoq.

Savaaqqap kujataani qorsooqqissumi qaqqartuumi silaannarmi alliartorsimanera mamaanut sunniuteqarluarpoq, tassanilu naatitat ivikkallu nerisaraat – allanik akuugaanngilluinnartut. Pinngortitaq kiffaanngissuserlu mamassusianniippoq. Aatsaat tassa.

Street Foodip aallaqqaammut rullekebabit nersussuullu puulukillu neqaannit nerisassiat allat sassaalliutigisarpai.

- Allaanerusumik ingerlatserusullunga Inunnguaq Hegelundimik siunnersortippunga. Taassumalu nunatsinni nerisassiassat isumassarsiaraa. Akueraaralu taamaaliorusullungalu, Niels Jørgen Rosing oqaluttuarpoq.

Taannalumi aamma avataanit eqqussukkat pinnagit nunatsinnit nerisassat toqqartagarai.

- Tusartakkanni allat kalaaliminiinnavinnik nerisaqarput, ukiunilu arlalinni neqinik allanik nerisimanngillat. Taakku aamma pillugit imaasiorpugut, Niels Jørgen Rosing oqarpoq, taassumalu nerisassaarniarfinni ukioq manna siusinnerusukkut ammarpaa.

Tikaagullik qisuaqqamut amitsumut ikkussuussaq

Tikaagullik on stick tulliullugu uuttorpara. Tikaagulliminermik marinerikkamik qisummut kappussamik neriumanissami sapiissuseq alapernaassuserlu pisariaqarput. Neqi qaalernarlunilu qituppoq. Pikkunarpoq, ingasattajaanngitsumilli, tassa nerisassiarilluagaavoq.

“Whale on Stick” qajannartunoortuunngilaq puisitorsinnaanngitsunullu piukkunnarnani. Tassani kalaallit nerisassiaat nutaaliortumik passunneqarpoq. Kudos.

- Neqit, dressingit mamarsaatillu tamaasa Inunnguaq Hegelundip isumassarsiarai. Periarfissaqartilluta kuannit dressingimut aamma atortarpagut, Niels Jørgen Rosing oqarpoq.

Uuma allaaserinerata nalaani Niels Jørgenip suleqataasalu tuttu savaaqqallu neqaa, kissavaasat, saarulliit tikaagulliminerlu nerisassiornerminni atortarpaat.

- Ukiup immikkoortui malillugit nerisassiassat allanngortittarnissaat kissaataavoq, taanna oqaluttuarpoq.

Niels Jørgen Rosing naapertorlugu shawarma kissavaasallu pisisartunit pisiarineqarnerusarput.

Atagu suut ussataanerat takutigu. Kissavaasat qallikkat friturikkallu saanniipput. Piareerpit?

Pikkunaq. Sikattunngorlugit siataapput, taamaattussaappullimi. Qaava qillaalasunngorlugit sialluakkat qeqqalu ooqanngingajattoq. Nutaamik salatilerlugit sassaalliutigineqarput, taakkulu isikkorissisippaat naluffigerusunnartunngortipajaarlugit.

Igaat sananissaat pisariitsuupput, igariaatsimillu muteerniusumik issittumi kusanartuliaallutik. Shawarma naggasiullugu nerivara. Naak qaaleraluaqalunga usserusulluinnarpara, taanna aamma savaaqqamit kujataaneersumit sanaajuvoq. Pakatsinanngivippoq, naak qeqqani pomfrittilerlugu salatinik mamartumillu dressingiligaasarnera tupaallaatigilaaraluarlugu. Mamaq!

Tulluusimaarut

Kalaalerpassuarnut kalaalimernit nerisassiassaannaanngillat – tulluusimaarutaapput. Issittumi silaannarmi imaannaanngitsorsuarmi neqinik minguinnerpaat mamarnerpaallu, imarsunnitsut, qaqqasunnitsut aallaaniarnersunnitsullu ilaannik nammineerluni tunisassiorsinnaanermut uppernarsaat.

Kalaallit streetfoodiliaat makkunatut ittut qaqutigoorput. Nerisassiat tamarmik immikkut nunap peqqarniissusianik, piujuartitsisumik piniarnermik pinngortitamillu, piniartunik igaassanillu ataqqinninnermik annertuumik oqaluttuartuupput. Sassaalliutigineqartut street foodinut naleqqupput, akikinnerpaajunngillalli, immikkuullarissulli taakkutut ittut aamma akinik aalajangersaavigiuminaatsuupput. Qujanaq!