Kinguaariit Nassuttuumi

Aasap naajartornerani anori kissalaartoq Kristianep Nassuttuup paavanut ingerlaarnerminni kiinnamini malugaa. Paarmaqutisunni immap tikkanik ilallugu angallatillu motooriata nipaata sianiutai tiguarpai tupigusutsillugulu.

Ukiut tamaasa taamatut misigisarpoq angutaatinilu Hans Fredeerik Kuitse Nassuttuumut Kalaallit Nunaata kitaani kangerlummut 190 kilometerinik isorartutigisuut nerukitsumullu aavariaraangamik.

Namminneq meeraqanngillat, taamalli erlinnartigisunik peqarlutik: jorngutik, ukiumoortumik aavariaqatigisartakkatik – kinguaariit nikittarneranni ileqquulersimasutut.

- Uagutsinnut pingaarnerpaavoq aavariarfik aallartikkaangat meeqqat tamatigut nassartarnissaat, Kristiane Isaksen oqaluttuarpoq.

Aggerfimminni Aasianni angerlarsimaffimminni issiapput. Aqaguani aavarneq aallartissaaq jornguisalu ilaat marluk siullermeertumik aavariaqataasussaapput.

- Ullaakkut aallarsinnaaniarluta uagutsinni tukkussapput, Kristiane Isaksen aqagumut aavariartussaq oqarpoq.

Hans Frederiup asimiinnissani pinngitsoorsinnaanngilaa. Ukiut tamaasa asimi nipaassuseq, silaannarik paarmaqutisunni imarlu pisariaqartippai - ulluinnarni inuuneq ungasilliimilaarlugu. Asimiinnermini iluitsutut misigisarpoq, tamannalu meeraanerminiilli ilitsoqqussaraa.

- Mikisuararsuullungali asimiittuaannarpunga. Tamanna aatakkunnit toqoreersimasunit ilitsoqqussaraara, Hans Frederik Kuitse ulluinnarni Aasiaat peqqissaaviani portøritut annaassiniartartutut sulisarpoq.

- Ilaannikkut ilungersunarsinnaasarpoq, taamaattumik piniariarneq anersaartorfittut atortarpara, oqarpoq.

Kristiane 2021-mi aavariartalerpoq, tamannalu ileqquliussimavaa aavarianngitsoorusuttarani.

- Aavariaqqaarnera ippassaq pisimasutut eqqaamavara. Nassuttuup paavata tungaanukarluta anoraannguaq nerumittoq kiinnanni misigalugu nalissaqanngilaq puigunaallunilu. Pinngortitarsuaq minguillunilu tupinnaannartoq! Tiguartippunga, Kristiane Isaksen oqaluttuarpoq.

Inooriaaseq

Marluullutilli pingaartinnerpaavaat ingerlatitseqqiinissaq. Piniariaatsinik uumasullu tumaannik ilisimasaqarnerinnaanngitsoq inooriaaserli. Meeqqat ataqqinnillutik ingerlaartarnissaannik ilinniartippaat – pinngortitarsuarmut, uumasunut inoqatiminnullu.

- Asimiikkaangatta meeqqat oqaluttuuttarpakka nukitik inoqatiminnut atunngisaannassagaat, arlaanillu ajortumik annernartumilluunniit misigisaqaraangamik akiniaanngisaannassasut, Hans Frederik Kuitse oqarpoq.

- Meeqqat aamma arsaakkiartarput. Taamaattumik aamma uumasunik nammanneq isorartuumullu pisunneq nukkassaataalluartarpoq, taamaalilluta timersornerat aamma tapersersorlutigu, oqarpoq.

Hans Frederiup meeqqat uumasup aattornissaanik qanorlu pisarinissaanik ilinniartittarpai.

- Ilinniartikkusuppakka kulturerput uagutsinnut qanoq pingaartigisoq, oqarpoq.

Aappariit jorngui pingasut qeqarnerminni kaffillernermi tuttutaminnik sassaalliipput.

- Annertuumik kaffillertoqassagaangat tamatigut nammineq pisatsinnik sassaalliisarpugut. Aaviariarneq uagutsinnut pisariaqarpoq, Hans Frederik Kuitse oqaluttuarpoq.

Kristianep eqqaamalluarpaa kaffillernermi nammineq pisanik sassaalliineq qanoq misinnarnersoq.

- Pisannik sassaalleeqqaarnera misigisaavoq annertooq. Aanaga nuannaangaarami paggatsitsivoq. Ataatsimoorpugut tamattalu nuannaaqaagut. Misigisaavoq nuannerluinnartoq nalunagu uumasoq nammineq pisarineqarsimasoq, Kristiane Isaksen oqarpoq.

Ataatsimoorneq

Hans Frederik 2000-imili tuttumik perngaramili – ukiut 25 matuma siornagut – ukiut ingerlanerini piniariarnissaminik soqutiginninnerujartorsimavoq.

- 13-inik ukioqarpunga, ataatamalu perngarnissannik ikiorpaanga. Uumasup taqissornissaa nuannareqaara, uumasorlu ilaqutariinnut nuannaartunut angerlaallugu, Hans Frederik Kuitse oqaluttuarpoq.

Tuttu tassaaginnanngilaq kaakkunnaarsitsisussaq, aammali ilaqutariinnik ikinngutinillu katersuuffiusoq, aappariit tamatigut ikinngutitik qaaqqusarmatigit Aasiaat aqqusaaraangatigit.

- Ikinngutivut Aasiannukassagaangamik naluneq ajorpaat neriartoqquneqassallutik, Kristiane Isaksen oqaluttuarpoq, angutaatinilu qungujullugu nangilluni:

- Ukiut tamaasa aamma aanani tuttumik tunisarpaa, qaniginerpaasavullu neqimik tunillugit, qeqartoqassagaangat, kuisittoqarluni assigisaanilluunniit, oqarpoq.

Tuttu tassaalersimavoq isummersuut asanninnermillu takutitsineq. Kaffillernissamut ikiuineq, nalliuttunut imaluunniit ulluinnarni nerisassatut.

Maanna aappariit ukioq manna siullermik aavariareerlutik utersimalerput. AG-mit Aasialiartut pissarsiaraavut. Attumiipput immap unerisimanerulernissaa uteqqillugu.

- Nuannerpoq! Jorngut marluk tuttumik perngarput. Jorngora 15-inik ukiulik umimmammik perngarpoq niviarsiararlu tuttumik perngarluni. Taamaalilluni qeqaruni sassaalliutissaqalerpoq, Kristiane Isaksen nuannaarluni oqaluttuarpoq.

Aappariit aamma perngarnertik tulluussimaarlutik nuannaarlutillu eqqaamavaat. Taamaalillutik Nassuttuup qeqqani pingaarutilimmik angusaqarput.