Kunngip aarrup niaquata saarnga Bornholmiliaakkaa

Kunngip Frederiup Bornholmimi Center for Kunsthåndværkimi kalaallit sanalugaannik saqqummersitsinerup alakkarnerani aarrup niaquata saarnga atukkiuppaa.

Kunngikkut aarrup niaquata saarnga Nuummi kommunip allaffeqarfiani 2024-mi juulip sisamaani tunissutigaat.

Assi: Ida Marie Odgaard/Ritzau Scanpix

Morten Okkels Morten Okkels Tusagassiortoq

Saqqummersinneqarpoq 21. Maaji 2025 - 13:01

Kunngi Frederik dronningilu Mary Nunatsinnut siorna tikeraarmata Kommuneqarfik Sermersuumit aarrup niaquata saarnganik qiperukkamik tunineqarput. Tunissut eqqumiitsuliortup Kim Kleist-Eriksenip kalaallit siulliit pillugit oqaluttuatut qiperugaraa.

Kunngimut taanna tunissut Bornholms Center for Kunsthåndværkimut Haslemiittumut atukkiunneqarluni saqqummersinneqarpoq. Saqqummersitsineq "Kusanartuliat: Impressions & Expression"-imik atilik kalaallit sanalugaannik saqqummersitsineruvoq.

Assit Kunngikkormiut Facebookimi qupperneranni takuneqarsinnaasut naapertorlugit aarrup niaquata saarnga kunngip Frederiup Bornholmimi Center for Kunsthåndværkimut nammineq tunniukkiartorpaa. Taanna sanalukkallu allat juunip 29-ata tungaanut takuniarneqarsinnaapput.