Nuuk Snow Festimi ajugaasut toqqarneqartut
Snow Festivalimi sapaatiummat ualikkut nittaalarnerani ajugaasut toqqarneqarmata najuuttut amerlapput.
Ajugaasut suliamik saavani.
Assiliisoq: Oscar Scott Carl
Ukioq manna apummik ilusilersuinermi Sila qulequtarineqarpoq. Peqataasorpassuit ilusilersukkat assigiinngiiaarneri pillugit aamma sammisat oqimaatsut, soorlu angerlarsimaffeqannginneq silallu pissusiata allanngoriartornera, sammineqarnerat pillugu nersualaarneqarput.
Borgmester Avaaraq Olsen sapaatiummat ajugaasunit akissarsititsiartorluni najuuttoq aamma nersualaarinnippoq. Taassuma peqataasut weekendimi issikkaluartoq illoqarfimmullu peqataanermikkut tunniussaqarnerat qujassutigaa.
Apummik ilusilersugaq ”Baby it’s cold outside” nr. 2-nngortinneqarpoq.
Assiliisoq: Oscar Scott Carl
"Frostmestrene" ilusilersukkaminnik "Hybris"-imik ajugaapput. Ilusilersugaq angutaavoq peqiliassimasoq assaminik kiinani asserlugu.
Ukioq manna ajugaasut apummik kipparissumik atuilluarnerat, inuttut isikkulimmik sammisamillu pingaarutilimmik tassa silap pissusiata allanngoriartorneranik sammisaqarnerat dommerit nersualaarpaat.
- Sapaatit-akunneri arlaqanngitsut matuma siorna issangialermat ilusilersuisoqarsinnaassanersoq ernummatigileraluarparput. Taamaattumik silap pissusiata allanngoriartornera inuillu tassunga atatillugu inissisimaffiat sammissallugu aalajangiupparput.
Innuttaasut Katuap silataani apummik ilusilersuisut sapaatiummat alakkarpaat.
Assiliisoq: Oscar Scott Carl
- Ilusilersugarput peqingavoq inuillu silap pissusiata allanngoriartorneranut ajornerulersitsinerat kanngusuutigalugu niaqquni toqqorsimallugu, ajugaaqataasoq Nanna Hildebrandt oqarpoq.
Ajugaasut ilusilersuisoqatigiittut ukuupput: Andreas Stær Nielsen, Naja Riber Hougaard, Andreas Ludvigsen, Nanna Hildebrandt, Ida Nielsen, Mette Lange-Nielsen aamma Nicolaj Ry Høvik.
