Filminut nersornaasiuttagaq
Innersuaq Film.gl-imi siulittaasumit Klaus Georg Hansenimit Nuuk
Internationale Filmfestivalip ingerlanneqarnerata ulluani kingullermi
arfininngornermat septembarip 20-ani tunniunneqarpoq.
Filmiliortartut peqatigiiffianni
Film.gl-imi ilaasortat Innersuaq 2025-mi innersuunneqartunik
pingasunik arlaat ajugaassanersoq aggustimi isertortumik
taasissutigaat.
Filminut nersornaasiuttagaq
Innersuaq Film.gl-imi siulittaasumit Klaus Georg Hansenimit Nuuk
Internationale Filmfestivalip ingerlanneqarnerata ulluani kingullermi
arfininngornermat septembarip 20-ani tunniunneqarpoq.
Filmiliortartut peqatigiiffianni
Film.gl-imi ilaasortat Innersuaq 2025-mi innersuunneqartunik
pingasunik arlaat ajugaassanersoq aggustimi isertortumik
taasissutigaat.
– Innersuaq 2025-mi ajugaasup
piviusulersaarut ukiorpassuarni suliaraa. Pitsaassusaa qaffasippoq.
Filmi sapiitsuliorneruvoq oqaluttuarisaanermilu pisimasunik
pingaarnerit ilaannik allatut isiginnilersitsilluni sunniuteqarpoq,
Film.gl-imi siulittaasoq Klaus Georg Hansen nersornaasiinermut
atatillugu oqarpoq.
DR-i narrujuummissutigigaa
Film.gl-imi siulittaasup Klaus Georg Hansenip Nuuk International Filmfestivalertoqarnerani Innersuaq 2025-mik arfininngormat nersornaasiissutigaa.
Assi: Nuuk International Filmfestival
Ilitsersuisup Otto Rosingip
piviusulersaarut Orsugiak – Grønlands hvide guld
nersornaasissutigaa. Piviusulersaarut qallunaat tusagassiiviini
ajorluinnartumik oqallisigineqarpoq, tassanilu DR-imi
piviusulersaarut aallakaatitassiani takuneqarsinnaajunnaarlugu
peerneqarpoq. Tassalu Ivittuuni orsugiassiorfimmit kaaviiaartitat
isertitalluunniit 400 milliardit koruuniunersut ersarissumik
immikkoortinneqannginnerat oqallinnermi tunngavigineqarpoq.
Filmiliortartut peqatigiiffiata
Film.gl-ip piviusulersaarusiap pitsaassusaa nersorneqartoq, DR-imilu
aallakaatinneqarnerata kingorna qisuariarnerit narrujuummernartuusut,
Klaus Georg Hansenip nersornaasiinermut atatillugu oqaatigaa.
– Piviusulersaarummut
nersornaasiinermi filmiliortartut piviusulersaarutip pitsaassusaa
akuersaarpaat. Ajugaasup toqqarneqarnera piviusulersaarutip
februaarip qulingiluaanni 2025-mi Danmarkimi tv-kkut
takuteqqaarneqarmat Danmarks Radiop qallunaallu tusagassiuutaasa
amerlanersaasa peqqarniitsumik nalinginnaanngitsumullu
qisuariarnerannut asissuineruvoq.
Oqaluttuarisaanermi aatsaat taama
assoralisimaartoqartigisoq
Ilitsersuisup Otto Rosingip piviusulersaarutip takutinneqarnerani Danmarkimi assoralisimaarsimaqalutik eqqaavaa, Kalaallit Nunaannilu filmiliornermik suliaqartut piviusulersaarummik nersorinninnerat qujaffigalugu. Ilitsersuisoqatini Claus Pilehave aamma qutsavigaa.
Assi: Piviusulersaarut Orsugiak- Grønlands hvide guld
Piviusulersaarummik ilitsersuisoq
Otto Rosing Nuuk International Filmfestivalimi peqataanngilaq,
inuulluaqqusillunilu piviusulersaarummut qisuariarnerit pillugit
allappoq.
– Filmi ukiuni pingasuni
suliaraarput, Danmarkimilu tusaamasaalluarpoq, nunarsuullu sinneranit
Kalaallit Nunaat maluginiarneqalersimalluni. Danmarkimi
oqaluttuarisaanermi aatsaat taama ajortigisumik assoralisimaarpugut,
taamaattumik Kalaallit Nunaanni suliatta nersorneqarnera nuanneqaaq,
taamaattumillu nersornaat una uagutsinnut nuanneqaaq, Otto Rosing
oqarpoq, taassumalu ilitsersuisoqatigisani Claus Pilehave aamma
qutsavigaa.
Piviusulersaarummi pingaarnertut inuttaasoq Naja Dyrendom Graugaard aamma nuannaarpoq:
- Otto Rosingip Orsugiak – Grønlands Hvide Guldimut Innersuarmik nersornaaserneqarnera persuarsiornarpoq, nuannerpoq pissusissamisoorlunilu. Filmi nammineq filmitut pingaarutilittut inissisimavoq, filmilli Danmarkimi aalassassutigineqarnera tusagassiuutitigullu eqqartorneqangaatsiarnera eqqarsaatigalugit nersornaat aamma immikkut pingaaruteqarpoq.
- Qallunaat tusagassiorfiisa orsugiassiorfik taassumalu kinguneri pillugit pisimasut taamarsuunngitsutut killilersorniarlugillu saqqummiussisaarnerat tamatsinnut eqquivoq. Taamaattumik Innersuarmik nersornaaserneqarnerput pingaarutilimmik oqariartuuteqarpoq: oqaluttuarisaarnerput pillugu nammineq oqaluttuarsinnaatitaarnerput – nammineq tunngavilersorlugu, Naja Dyrendom Graugaard Sermitsiamut oqarpoq.
Innersuunneqartut
ilaat Oscarimut innersuunneqartoq
Innersuaq
2025-mut
innersuunneqartut tassaapput:
Hanne M. Sørensen, GUX Filmfestivalimik
pilersitsineranut aamma
Nuuk GUX-ip
Station Next-illu
suleqatigiisilernerannut. Nina Paninnguaq Skydsbjerg, piviusulersaarut
Walls
– Akinni Inuk. Otto Rosing, Piviusulersaarut
Orsugiak
– Grønlands hvide guld. Nina
Paninnguaq Skydsbjergip
piviusulersaarusiaa Kalaallit Nunaat sinnerlugu Oscarimut
nersornaasiinissamut innersuunneqartoq Film.gl-imit
nalunaarutigineqaqqammerpoq.
