Kalaallit Nunaannit Oscarimut innersuunneqartoq aana
Piviusulersaarut ‘Walls – Akinni Inuk’ Kalaallit Nunaata Oscarimut ataatsimiititaliaanit innersuunneqarpoq. Arnat kalaallit marluk Nuumi pineqaatissinneqarsimasunut inissiisarfimmi naapinnerat pillugu piviusulersaarutaavoq.
‘Walls – Akinni Inuk’-mi arnat marluk pissutsini immikkorluinnaq ittuni naapinnerat oqaluttuarineqarput.
Assi: Anorak Film
Kalaallit Nunaata Oscarimut ataatsimiititaliaani siulittaasup oqaaseqaatai ilanngullugit allaaserisaq nutartigaavoq.
Kalaallit Nunaata Oscarimut ataatsimiititaliaata piviusulersaarut 'Walls - Akinni Inuk' nunani tamalaani filmiliaalluarnerpaatut Oscarimut innersuussutigaa.
Tamannali isumaqanngilaq piviusulersaarut Oscarinnannissaminut innersuunneqartoq. Nunanit assigiinngitsunit oscarimut innersuunneqartut oscarimik nersornaasiisarfimmit nalilersorneqaqqaariarlutik arlaat innersuunneqassanersoq aalajangerneqassaaq.
Filmi Sofie Rørdamimit aamma Nina Paninnguaq Skydsbjergimit ilitsersorneqarpoq, tassanilu arnat kalaallit marluk Nuummi pineqaatissinneqarsimasunut inissiisarfimmi naapinnerat oqaluttuarineqarpoq.
Aappaa tassaavoq Ruth, taanna killiligaanngitsumik paarineqartussanngorneqarnikuuvoq. Aappaalu tassaavoq filmiliortartoq Nina Nuummeersoq, taassuma Kalaallit Nunaanni parnaarussiviit pillugit piviusulersaarusiornermini Ruthip atugai pillugit akuliuppoq.
- Siullermik isikkumikkut assigiinngilluinnarput, kisianni inuunerminni aqqusaarnikuusatik nammatatillu assigiissuteqarnerat naapertorlugit, ilimaginngisaminnik qanilliallatsinneqarput, tusagassiuutitigut nalunaarummi allassimavoq.
Kalaallit Nunaanni Oscarimut ataatsimiititaliami siulittaasoq AldaRós Olsen Rosing ima oqarpoq:
– Kalaallit Nunaata Oscarimut Ataatsimiititaliaanni filminik arlalinnik nalilersuivugut. WALLS – Akinni Inuk dokumentarfilmi torrallataavoq qanilaassutsimillu misinnartitaqartitsisoq. Filmi sakkortuumik eqqarsalersitsivoq, kiffaanngissuserlu pillugu paasinnittaatsimik immikkuullarissumik periarfissiilluni. Qulequtaq ilungersunartoq pineqarpoq, kisiannili siunissamik pitsaanerusumik neriuuteqalersitsivoq.
– Ataatsimiititaliami ilaasortat isumaqatigiipput WALLS – Akinni Inuk, 2026-imi Oscar-inik nersornaasiinermi pitsaanerpaatut Kalaallit Nunaanniit sinniisuussasoq.
Filmi Danmarkimi filmfestivalimi CPH:DOX-imi takuteqqaarneqarpoq, tassanilu Nunani Avannarlerni Piviusulersaarutit Pitsaanerpaartaattut nersornaaserneqarluni.
Oscarimik nersornaasiisartut nunanit tamalaanit filmit 15-it pitsaanersaattut innersuunneqarsinnaasut allattorsimaffiat decembarimi saqqummiutissavaat.
Filmit tallimat Oscarinnannissaminnut innersuunneqartut januaarip 22-ani saqqummiunneqassapput.
Piviusulersaarut 'Mr Nobody mod Putin' Danmarkimit nersornaammut una qaammat innersuunneqarpoq.
