”Qummut Pujorit” inuunermi apeqqutit pingaarutillit kattukkai

Katuap inersuaaraani qulliit taarsitinneqarput Ole Kristiansenillu erinarsuusiaa ”Qummut Pujorit” appimmat isiginnaartut malinnaalerput.

Isiginnaartitsisartut tallimat takutitsisarfimmut qaqigamik takutitsisarfik asanninnermik, aliasunnermik qilanaarnermillu immerpaat. 

“Qummut Pujorit” nunatsinni popimik rockimillu erinarsortartut taaliortullu tusaamaneqarnerpaap Ole Kristiansenip erinarsuusiai atorlugit isiginnaartitsiitigaluni tusarnaartitsineruvoq.

Erinnat, allatut erinarsorneqartut, annermik asanninnermut tunngapput; avissaarnermut ilungersunartumut allamullu: asannilernermut. Isiginnaartitsiutigaluni tusarnaartitsinermi isiginnaartitsisut ilaat tassaavoq Nukakkuluk Kreutzmann. Taanna isiginnaagassiami arnaavoq suiaaqatiminoortoq, asasaminut katittussaq. Asasorisaminut. 

- Olep erinaatai assiliannguinermik imaqangaatsiarlutillu inuunermik eqqarsalersitsinartuupput, Nukakkuluk Kreutzmann oqarpoq. Taanna 29-nik ukioqarpoq 2018-milu isiginnaartitsisartunngorluni. Akunnerit marlussuit qaangiuppata isiginnaartitsiitigaluni tusarnaartitsivissami innarluni tasitsaarpoq.

Isiginnaartitsinnginnermini ileqqutoqqani yogatut tasitsaarneq ingerlallugulu erinnani isiginnaartitsinermi erinarsornissaminut kissasserpaa. 

Toqqarluni isikkulersornerit erinnallu nikallungasut

Erinnat aalalluni, toqqarluni isikkulersorluni takutitserpalaarlunilu tusarnaartitsinermi isiginnaartitsissutigineqarnerini isiginnaartut nipaarutivillutik issiapput, tassanilu Ole Kristiansenip erinaatai oqaluttuatut nutaatut uummaarissutullu isiginnaarneqarput. 

Kjolit qillalaartut, nerrivik persuarsiorpalaartumik piareersagaq, qitinnerpassuit nuannaarnerlu isiginnaartitsinermi sammineqarput, tassani ikinngutigiit nikallungasumik erinniat atorlugit eqqarsaatitik itinerpaat isiginnaartunut takutippaat. Isiginnaartitsineq asanninnermut tunngavoq. Asanninneq artorsarnartoq, ajornaatsoq inuillu akornanni asanninnerujussuaq. 

Isiginnaartitsissummi, pisortamit Vivi Sørensenimit suliarineqartumi, aasaq mannalu Kujataani takuteqattaarneqartussami, isiginnaartitsartut tallimat asanneriaatsit assigiinngitsut, tamarmik immikkut nipeqarlutik, isiginnaartitsissutigaat. 

- Katittoqarpoq, aamma 30-liisoqarmat nalliuttorsiortoqarpoq. Aappariit qimattut aappariillu asannilertut aamma isiginnaartitsissutigineqarput, Nukakkuluk Kreutzmann oqaluttuarpoq.

Illarneq oqaasillu

Malu Lynge, Berthinnguaq Mukku Geisler aamma Nukakkuluk Kreutzmann isiginnaartitsinissaq akunnermik ataatsimik sioqqullugu immikkut tarrarsuuserlutik tanipput. Isiginnaartitsinnginnerminni tamarmik immikkut ileqqoqarput, taakku oqaluttuarput. Isiginnaartitsinnginnerminnili tarrarsuutip saavani naapillutik oqaluttuaqattaallutillu, illarlutillu oqaasissatik erinarsugassatillu sungiusartarpaat.

Isiginnaartitsisartut tallimat, Malu Lynge, Berthinnguaq Mukku Geisler aamma Nukakkuluk Kreutzmann, Klaus Geisler aamma Joshua Qaumariaq, isiginnaartitsinissamut minutsit quliinnanngortut takutitsiffissap saavani tasiorlutik sequnngerput. Asanninnerup erinnamikkut aniatinnginnerani ataatsimoorlutik naggammik piareersarput. Ataasiakkaarlutik uipput, imminnut qungujupput assatillu qullarlugit ataatsimoorlutik nilliapput. Pimoorussillutillu piareeqqapput. 

Nukakkuluk ilukkut nuannaarpoq. Siornatigut inuunermini eqqissiviissimavoq, maannali kristumiutut inuunermini eqqissisimalluni, taanna oqaluttuarpoq. 

- Uppernera qaammatini kingullerni aallunnerulerpara. Eqqissiviitsorujussuunikuuvunga, pilluarneq inunnit allanit ujartortarlugu, biibilili atualerakku guutip pilersimmanga pilersinnginninnilu eqqarsarluaqqaarnikuummat uangaallunga naammallunga paasivara, taamaammat uppernera aqqutigalugu imminut naleqartilerpunga, Nukakkuluk Kreutzmann oqaluttuarpoq.

Uppernini iluaqutigalugu sumiiffissani nassaaraa, aammali qulartarsimavoq. 

- Soorunami isiginnaagassiami uani peqataarusuppunga, isiginnaagassiamilu inuttara suiaaqatiminoortuummat inuttut qularpunga. Suiaaqatiminoortut ataqqeqaakka, inuttulli arnaq suiaaqatiminoortoq inuttarissallugu eqqarsarnartoqartippara, taanna oqaluttuarpoq.

Ilitsersorluagaq

Isiginnaagassiap ilitsersorluagaasup isiginnaartitsisullu nipaasa erseqqarissut imminnullu tatigisut isiginnaartut tamaasa tiguarpaat. Joshua Qaumariap iggiarlulluni qatituumik “Uummatinga” atormagu, allaannginnami kiffaanngissuseq misigalugu. Saqqummernera nalissaqanngilaq.

“Uummatinga” erinarsuutaavoq asanninnermut tunngasoq, assiliartalersuutinilli taallartaqarami allatut aamma paasineqarsinnaasoq. Joshualli erinarsornerata unnuup ingerlanerani takusani ingasannerpaavoq, isiginnaagassiarlu paasinartumik naggaserlugu.

Erinarsornermini mikrofooni siffiaminiitsippaa, nipaalu uummammut EQQUINGAARPOQ. Ole Kristiansenip soorlu nammineq taalliamini ima oqaasertaleraa: ‘isumagissusermik taqaarunnartumik.‘

Isiginnaartitsisut imminnut toqqaannarlutik oqaluutinngillat, misigissutsit erinarsuutit atorlugit takutinneqarput. Taamaakkaluartoq isiginnaartitsisut timertik atorlugu takutitsinerat paasissaalluarmat suna pineqarnersoq paatsuugassaanngilaq. Asanninnermi aqqusaarneqartartut ajortut ajunngitsullu takutilluarneqangaarmata isiginnaartut qullilisarput. Akunnerup ataatsip ingerlanerani nuannaarneq, pilluarneq, aliasunneq neriuutaarunnerlu aqqusaarneqareersullu qulliit ikimmata isiginnaartut piviusumut utertitaaqqinnerminni sivisuumik ersaattaapput.

Nukakkuluk Kreutzmann tusarnaartitsilluni isiginnaartitsereernerup kingorna isiginnaartitsisarfiup tunuani ineeqqami nalaasaarfimmut imminut igeriuppoq. Inimi illaqattaartoqarlunilu tamuluttoqarpoq. Tamarmik nuannaarput. Isiginnaartitsineq iluatsilluarluni naammassivoq. Illaqatigeereeramik isiginnaartitsineq nalilersorpaat: Mikrofoni ajoqutilik tullissaanut aqqinneqassaaq. Scene ataaseq sivisunerulaassaaq. Nukakkuluk Kreutzmann aamma imminut nalilersorpoq. Akulikitsumik. Isiginnaartitsisartuuneq tassa taamaappoq. Inuuneranut ilaavoq.

- Isiginnaagassiap inuuninni killiffiga pillugu eqqarsalersippaanga. Maanna sussaninnik qularnera eqqarsaatersorneralu akueraakka. Maannami sussaanga?