Rasmus Lyberth nersorniarneqartoq
Rasmus Lyberthip inuiaat nipilersoriaasiannut sunniuteqangaarnera pissutigalugu kalaaleq nipilersortartoq taanna inuiaat nipilersoriaasianni tusaamasat nalunaarsorsimaffiannut ilanngunniarlugu Tønder Festivalip aalajangersimavaa.
Rasmus Lyberth Tønder Festivalimi tusaamasat nalunaarsorsimaffiannut ilanngunneqassaaq.
Assi: Tønder Festival
Rasmus Lyberth taamatut ataqqinaateqarneq pissutigalugu nipilersortartut tallimassaattut tusaamasat allattorsimaffianni ilannguppoq, taamaalillunilu Povl Dissing, Niels Hausgaard, Finbar Furey aamma Eleanor Shanley ilannguffigalugit.
Rasmus Lyberth Tønder Festivalimi arlaleriarluni tusarnaartitsisarsimavoq, kingullermik 2018-imi.
- Rasmus Lyberth pingaaruteqarluinnarpoq – qallunaat nipilersortartuinuinnaanngitsoq aammali kalaallit nipilersortartuinut. Maannakkut politikkikkut allanngorarfioqisumi kalaallit namminiilivinnissamik sammineqarnissamillu sorsunneranni tapersersorneqartariaqarput. Taamaammat ilanngunneqarnera oqaluttuarisaanermut attuumassuteqarluinnarlunilu piffissamut tulluarpoq, Tønder Festival Fondimi siulittaasup tullia Poul-Henrik Jensen oqarpoq.
Eqqumiitsuliaq
Nersornaat eqqumiitsuliamik ilaqarpoq, tassa qisummik inuusaliaq qiperugaq oqaluttuarpalaartumillu taalliaq. Eqqumiitsuliaq atuakkiortumit eqqumiitsuliortumiillu Sanne Flyvbjergimit kiisalu assilialiortumit ilusilersuisumiillu Søren Assenholtimit sananeqarpoq. Aappariit eqqumiitsuliortut taakku Tønder Festivalimik ukiorpassuarni suleqateqarsimapput.
Eqqumiitsuliaq arfininngornermi 2025-m novembarip 15-iani Tønderimi Hagge’s Musik Pub-imi nalliuttorsiornermi pissasoq tusagassiutitigut nalunaarummi ilisimatitsissutigineqarpoq.
