Ribbensandwich kissalaamik tunisisoq

Nuummi qulisimagaa uanitsut neqillu siatat naamaneqarsinnaapput. Hans-Frederik Heilmann Nuup ilaani Nuussuarmi neriniartarfiup Nasiffiup eqqaaniittumut pølseerniarfimmukarpoq.

- Ribbensandwichi, angummut pisiniartitsisumut oqarpoq.

Hans-Frederik Heilmann nerisassaminik akeqanngitsumik tunisippoq. Kunuks Pølsevognimi hotdogimik pisisoqarsinnaavoq, kissalaamik tunineqarluni kisimiinnginnermillu eqqaasinneqarluni. Pølseerniarfiup inniminniisarfiani allagartaq ima allannilik nivingavoq: Tullit ikioruk. Inissaqartikkukku pisiaq pissakitsunut uunga nivinngarsinnaavat.

Kinaluunniit ribbensandwichimik, pølsemik aappaluttumik imaluunniit pisiassamik allamik tunissuteqarsinnaavoq. Tassa pisiassaq akileriigaq arlaannut kissartutornissamik pisariaqartitsisumut tunniunneqartarpoq, inuttaa nassuiaatinnagu nittarsaannaguluunniit.

- Inuit attaveqaqatigiittarfiisigut assit takusama ilaat isumassarsiffigaara. Kaffisorniartarfik – akissaqaraanni – allanut tunissutissanik pisiffigineqarsinnaasoq, taannalu pisiaq allamut pisariaqartitsisumut tunniunneqartarluni, pølseerniarfimmik piginnittoq Kunuk Evaldsen oqarpoq. 

Pisinermut uppernarsaatit allagartaat 20-nit amerlanerusut nivinngaavimmi nivingapput, Hans-Frederik Heilmannillu nererusutani nammineerluni toqqarsinnaavaa.

- Nuanneqaaq, taamaattunik takuneq ajorluni alutornarpoq. Massakkut ribbensandwichimik aallertunga. Tamatigut pisisaraluarama maannakkut aallertunga. Ittoornalaartarnermut, Hans-Frederik Heilmann oqaluttuarpoq.

Kunuup pølseerniarfini takorluugariuaannarsimasani upernaaq manna maajip 16-iani ammarpaa.

- Meeraallungali takorloortagaraara, oqarpoq.

Kunuk Evaldsen sanasutut ukiorpassuarni sulisimavoq, taamaammallu ulluinnai allanngorluinnarlutik.

- Nuanneqaaq. Qangalili eqqarsaatigisarnikuuara, taava periarfissaqaleriataarama ammaavunga, Kunuk Evaldsen oqaluttuarpoq.

Nerisassat ataatsimoorfittut

Kunuup pølseerniarfini ammaqqammitsiaannaraa inuit takkutalerput aperalutillu nerisassanik igitassanik sinneqarnersoq.

- Uanga igitassaanngitsunik tuniserusunnerullunga eqqarsarama. Kisiannilu ullut tamaasa nammineq tunioraasinnaananga, oqarpoq. Kunuup tunissuteqarsinnaanermik periarfissaq ammaanerminiit sapaatip-akunnera ataaseq qaangiuttoq aallartippaa. Inuillu inuit nittartakkatigut attaveqatigiittarfimmi siammartererujussuarput.

- Taava pisariaqartitsisut takkuttalerput, oqarfigisarpakkalu kammalaatisi aamma taama inissisimasut ilagerusukkussigit. Takkuttarpullu, Kunuk Evaldsen oqarpoq.

Hans-Frederik Heilmannip ribbensandwichiutukkani mamarsaatigaa. Taanna sikalluarsimavoq, isseqarluarluni kissarlunilu.

- Allanik aamma taamaattoqartussaagaluarpoq. Illoqarfimmi amigaataasaramik. Angerlarsimaffeqanngitsut amerliartornermut taakkununnga iluaqutaasassaaq, Hans-Frederik Heilmann oqarpoq.

Inuit ikiuukkumatunerat Kunuup maluginiarpaa. Ima tunisiumasoqartartigaaq tunissuteqarumasut unitsittariaqartarlugit.

- Assersuutigalugu nererusuttumik takkuttoqarpat allagartat akileriikkat sisamat peerpakkamiatagooq, taava sisamanik nivinngaanissamik inissaqaqqilissaaq. Taamatut aqukkuminarneruvoq. Ikiortikkumasunik ullut tamangajaasa takkuttoqartarpoq. Aamma ullut tamaasa tapiiumasoqartarpoq, oqarpoq.

Angerlarsimaffeqanngitsunuinnaanngitsoq

Ajunngitsuliorsinnaanermik isumassarsiaq Instagramimiit taamaallaat isumassarsiaanngilaq. Inuttut nammineq aamma aqqusaakkameersuuvoq.

- Piitsuuillunga misiginikuunngilara, kisianni sipaarujussuaqqaartinnanga ernikka tallimanngornikkut neriartoqatigisinnaasarnikuunngilakka, Kunuk Evaldsen oqarpoq.

Taamaammat angerlarsimaffeqanngitsut kisiisa ikiornissaat siunertarinngilaa. - Illumut, nerisassanut akiligassanullu allanut akileereeraanni imaassinnaavoq neriartornissamut ooriuteqarpiarnani inissisimasoqartartoq. Tassani uanga inissisimanikuuvunga. Angerlarsimaffeqanngitsunuinnaanngilaq, aningaasaateqartorujussuunngitsunut aamma atuuppoq. Soorlu ilaqutariinnut meerartalinnut, oqarpoq. Apersornera naggaserlugu Kunuup bøfsandwichiliaa misilippara. Asanninnerinnaq.

Boorlutaata aqitsup kissalaartup punnermut sialaarnikup imai tamaasa ataatsimuulersippai. Neqitaa sialluagaavoq, sinaa sikassimasoq ilualu isseqarluartoq. Torrallallugu akuugaq. Nerisaatikka puisip neqaanik sungiussisimasut mamarsartilluarpai.

Bøfsandwichi dressingiligaq, uanitsuligaq – suneqanngitsunik sikatsitanillu - agurkinillu seernarsakkanik akusaq, tunguarninnera sikatsillugulu siataanerata tarnera eqitaarneqartutullusooq mamarsaatigaara.

Nerisara nungukkakku Kunuks Pølsevognip neriniartarfiinnartut isiginera allanngorpoq. Kalaallit Nunaata nuannarisatta asasattalu takussutissaasa ilagaat: Ataatsimoorneq qanilaarnerlu. Kunuk eqqaasitsissummut nerisannullu qujanaq.