Sanaaluttartup skakkerutit Göteborgimi saqqummersikkai
Sanaaluttartup Dina Louise Andersenip, saqqummersitsinermut World of Gamesimut atatillugu, skakkerutit kalaalerpaluttut sanaalunnikuusani Sverigemi Göteborgimi katersugaasivissuarmi ulluni makkunani saqqummersippai.
Dina Louise Andersenip skakkerutit kalaalerpaluttunngorlugit sanaalugai, Sverigemi Göteborgimiittumi katersugaasivissuarmi maanna saqqummersinneqarput.
Dina Louise Andersen, Nuummi Ajagami siornatigut sulisuusimasoq, Nuuk Skak Klubimeersut aamma Gøteborgimi katersugaasivissuarmeersoq isumaginnittuusoq Bjørn Lindgren isumasioqatigereerlugit Göteborgimi saqqummersitsinermut sunniuteqarluartumik suliaqarpoq.
Saqqummersitsineq 2026-p tungaanut alakkarneqarsinnaavoq, tamatumalu kingorna Stockholmimi Etnografiimut Katersugaasivimmi ukiuni marlunni aamma saqqummersitsivimmiissallutik.
Sivisuumik kissaatigisaq
- Saqqummersitsinermut nunaqavissut skakkerutinik sanaalutaanik ilanngussinissamik kissaateqarneq Bjørn Lindgrenip Nuuk Skakklubimut saaffiginninneranit aallaaveqarpoq. Taanna skakkertarfik kalaallit pigisaat isumassarsiorfigalugit sanaaq svenskip ujarassiuup Otto Nordenskjoldip Kalaallit Nunaanniit Sverigemut 1910-mi nassarsimasaata skakkeruteqalernissaa pillugu saaffiginnittarmat, Nuuk Skak Klub tusagassiuutinut nalunaarummi allappoq.
Skakkerutinik kalaalerpaluttunik nassaarnissa aallaqqaammut iluatsissimanngitsoq Nuuk Skak Klub aamma allappoq.
Tamanna pissutigalugu Nuuk Skak Klubimeersut Dina Louise Andersen suleqatigalugu saqqummersitsinermut atatillugu skakkerutinik kalaalerpaluttunik ilusilersuisoqassasoq aalajangerput. Skakkerutit pingasut nunaqavissunit sanaat Stockholmimi Ethnografisk Museumimiittumut skakkertarfimmut ukiunik 115-inik pisoqaassusilimmut saqqummersitsinermut ilanngunneqartut.
- Nuuk Skakklubimi, Niels Kristian Skou oqaluttuarpoq, skakkerutit nutaaliat Dina Louisep saqqummersitsinermut tunissutai nuannaarutigeqaagut, soorluttaaq Word of Gamesimi saqqummersitsisut nunat tamalaat akornanni kulturikkut suleqatigiinnerup iluatsilluarsimanera pillugu nersualaarinnittut, oqaatigineqarpoq.
Nuuk Skak Klub sapaammi juulip 20-ani, FN-ip nunarsuaq tamakkerlugu skakkernerup ulluani, Nuuk Centerimi nalunaaqutaq marluniit tallimat tungaanut sammisaqartitsissaaq.
