- Aarlerivunga. Pissangallungalu.
Nuannersumik.
Frederik Elsnerip
arfininngorneq apriilip tallimaat qilanaaraa. Tassani Kalaallit Nunaanni
Pinerluttunik Isumaginnittoqarfik suleqatigalugu nutaamik misiliinissaaq:
Inissiisarfinni tallimani tamani tigummineqartunut kisimiilluni guitarerlunilu
arlaleriarluni tusarnaartitsissaaq. Nuna tamakkerlugu inissiisarfinni
assigiinngitsuni katillugit aqqanileriarluni tusarnaartitsissaaq.
Elsnerip
inissiisarfimmi tusarnaartitsiartoqattaarnissaminut isumassarsiaa Nuummi
pineqaatissinneqarsimasunut inissiisarfimmiittuni ilaqutaasut juullimi
tusarnaartitsiffineqarnerinut arlalinnut appisimaariaqqusaasarsimaneranit
pinngorpoq. Siullermik 2021-mi appisimaarpoq.
-
Pissanganartuusoq isumaqarpunga. Taqqamaniilluni nipilersortartutut
allaanerulluinnarpoq, misigissutsillu allaanerulluinnarput, Frederik Elsner
oqaluttuarpoq.
Siorna juullimi
tusarnaartitsinerup kingorna Pinerluuteqarsimasunik Isumaginnittoqarfiup
pisortaa Christian Høygaard saaffigalugu (Elsnerip, aaqq.) allamik sulilu
annerusumik iliuuseqarusulluni oqarfigaa. Frederik Elsner ukiuni 20-ni
kingullerni Kalaallit Nunaanni angalareerluni, ilaatigut Nanookikkut
nipilersoqatigisareerlugit kisimiillunilu appisimaartareerluni allamik
misileerusulerpoq.
Ukiut
ingerlaneranni taalliat 100-t missaanniittut allassimallugit oqaluttuarpoq.
Paasisimavaali taallat tusarnaartunut erinarsuinnarnagit aamma allatigut
atorneqarsinnaasut:
- Taamaammat
neriuuteqalersitsisumik ataatsimoortitsisumillu suliniuteqarnissara
isumassarsiaraara. Tassa taalliama eqqarsaatiginneqqissaarneqarlutik immaqa
inissiisarfinniittunit iluaqutigineqarsinnaanerat, oqarpoq.
Nalusatsinnik,
ingammik pinerluuteqarsimasunut inissiisarfimmiittussanngortitaasimasunik,
eqqartuussinissaq ajornannginnerusartoq aammattaaq oqaatigaa. Minnerunngitsumik
inunnik pinerluuteqarsimasunut inissiisarfinniittussanngorlugit
eqqartuunneqarsimasunik.
- Qanorluunniit
iliuuseqarsimagaluarutta inuinnaavugut. Isumaqarpungalu taakkua aamma
misigisaqarnissaminnut ineriartornissaminnullu periarfissaqartariaqartut, naak
maannakkut inissisimaffimminniikkaluarlutik, Frederik Elsner oqarpoq.
Taamaammat
taalliarisimasani atuarpai, tamannalu aatsaat misilippaa.
-
Inissiisarfimmiittut "isiginnittariaasiat atorlugu" taallat taakkua
isaannit atuarniarsaraakka. Erinarsuinnaraannimi paasilluarnagillu
erinarsortoqartarpoq, nipilersortartoq ukiuni kingullerni erinarsornerminik
eqqumaffiginninneruleraluttuinnartoq nassuiaavoq.
Aammattaaq
taalliani siunissamut naleqqussarnagit piffissami matumani inuiaqatigiinnut
naleqqussarniarlugit allanngortissinnaasarpai.
Nalunaaquttap-akunneri
marlukkaarlugit
Tusarnaartitsinerit
akunnerni marlunni ingerlanneqassapput, tassani Elsnerip inuunini
oqaluttuaralugulu erinarsuutit toqqarluakkani assigiinngitsut atortassavai.
- Isumaqarpunga
akunnerit marluk naammassasut. Aamma apeqquteqartoqarlunilu
akissuteqartoqartassaaq, oqarpoq.
Frederik Elsnerip
nammineq erinarsuusiani Nanookikkullu erinarsuusiaat appittassallugit oqarpoq.
Aammali allat erinarsuusiaat inissiisarfimmiittut immaqa ilisimalluagaat
appitarumaarpai.
Assersuutigalugu
Inneruulakkut erinarsuusiaat “Aasarissumi”.
Frederik Elsnerip
erinarsuut taanna aamma saniatigut suliniuteqarfigaa, tassa erinarsoqatigiit
nunatta sumiiffiinit tamaneersut peqatigalugit angalalluni
immiuteqqinniaramiuk. Tamanna nunatsinni nipilersortartut suliniutaasa
annersaata ilagaat. Tamannali ulloq alla oqaluttuarineqarumaarpoq.
Erinarsuut Aasarissumi
oqitsunnguullunilu nuannersuugami tusarnaartitsinermi atorneqartassaaq,
Frederik Elsner nassuiaavoq.
- Erinarsuut
taanna pinngortitami angalaartartunut pingaaruteqarluinnarpoq. Erinarsuut
taanna aalisartut piniartullu taallaanik ilisimasaqarluaramik
tusarnaaraangamikkulu imminnut takulluartaramik tusarnaartarpaat. Taallaa nuannersuullunilu aasaaneranut
tunngassuteqarpoq. Tassa inuiaqatigiit ikitsunnguusugut nunattalu pisuussutaat,
nipilersortartoq naqissusiivoq.
Erinnat allat,
soorlu Zikazakkut Siiva Fleischerillu erinarsuusiaat “Silarsuaq takuiuk?” aamma
“ilisimaneqarlaurtuusoq”, aamma Ole Kristiansenip assilianngortitserpalaartumik
erinarsuutai tusarnaartitsinerni aamma atorneqarumaartut eqqaavai:
- Taassuma (Ole
Kristiansenip, aaqq.) taalliai inuttut qanoq ittuuneq apeqqutaalluni
isumassarpassuaqarput. Taakkualu itinerusumik misissornissaat nuannareqaara.
Frederik Elsnerip
inissiisarfinniittunut saqqummiineq misilinngisaannarsimagaluarlugu
inissiisarfimmiittut misigissusii assigiinngitsorujussuusinnaasut nalunngilaa.
Immaqalu ilimagisaminit allaanerulluinnartumik qisuariartoqarsinnaavoq.
-
Piareersakkannik saqqummiiumaarpunga, aammali suut tamarmik
allanngorsinnaanrtsnnut piareersimavunga, oqarpoq.
Nuannaartorisaa
Johnny Cash
Tusarnaartitsinerit
immikkoortortat isersimaartarfiini pissapput, inissiisarfimmiittut
taamaalillutik Frederik Elsner guitarertoq nalunaaquttap-akunnerini marlunni
tusarnaarsinnaassavaat.
Aamma
erinarsortartutut nipilersortartutullu kiisalu sulorartartutut pikkorissutut
ilisimaneqarnini allanik ilaartorniarlugu nammineq inuunini pillugu
oqaluttuarnissaa ilanngunneqarpoq.
- Maannakkut
allanik ikiuerusunneruvunga, inissiisarfimmillu aallartinneq
pissanganartorujussuuvoq, Frederik Elsner oqarpoq nangillunilu:
- Johnny Cash
misigissutsinik (isertitsivimmiittut ilisarisinnaasaannik) toqqaannartumik
taalliortartoq nuannariuaannarsimavara, nipilersortartoq, guitarertartoq
taalliortorlu „The Man in Black“-imik taaneqartartoq pillugu oqarpoq. Cash
ilaatigut 1968-imi San Quentinimi aamma 1969-imi Folsom Prisonimi USA-miittumi
tusarnaartitsinerminit immiussimasani pillugit tusaamaneqarpoq.
Kalaallit
Nunaanni pineqaatissinneqarsimasunut inissiisarfinniittut ilarpassui aamma
nipilersortarput, taamaammallu Frederik Elsnerip taakku tusarnaartitsinerup
kingorna sungiusarsinnaaniassammata erinarsuutinik nassaatissavai.
Elsner
naapertorlugu nipilersorneq taarsiornermi tarnikkut qiimmassaataasinnaavoq.
- Nipilersornerup
qanoq sunniuteqarsinnaanera puiorneqakulasarpoq. Inunnut ajornartorsiortunut
iluaqutaangaatsiarsinnaavoq. Imaluunniit siumut isiginissamut
ikiorneqarnissamik pisariaqartitsisunut. Isumaqarpunga tulluartuusoq
suliniutissamullu matumunnga pitsaasumik qisuariartorpassuaqalereerpoq, taanna
oqarpoq LinkedInimilu, Frederik Elsnerip maannakkut nittartakkani
attaveqaqatigiittarfittut kisiartaasutut atugaani, allaaserisaq
innersuussutigaa.
- Ilaquttakka
suliakkalu pingaarnerutikkusukkakkit inuit attaveqaqatigiittarfii
atorunnaarpakka. Silarsuarmi pisartut piffissartornarpallaartarput, qarasaralu
pinngoorartitsissutiga ajortunik ulikkaarpoq, nipilersortartoq nittartakkakkut
attaveqaqatigiittarfinnik atuiunnaarnini pillugu nassuiaavoq.
-
Maqaasinngilara. Inuunera tamaat piginikuugaluarlugit tamanullu
saqqumilaartuusimagaluarlunga. Ilaannikkulli taamaaliortarneq
peqqinnartorujussuusorivara, oqarpoq.
Kisimiinneq allatut
Frederik Elsnerip
nammineq pinerluttunik isumaginnittoqarfik eqqartuussivillu
attaveqarfigisimanngisaannarpai.
Aamma qanigisaani
inissiisarfimmiittoqarsimanngila. Taamaammat inissiisarfiup ilua
inissiisarfimmiittut ilaqutaannut juullimi tusarnaartitsinermini
siullermeerluni takuaa.
Takorloortarpaali
inuuneq artornangaarsimassasoq. Aamma arlaannik pisoqartariaqartoq, ingammik
ulluni artornartuni.
Tusarnaartitsinerit
imminut qanoq sunniuteqarsinnaanerat aamma eqqumaffigaa.
Qanoq
qisuariassanerlunga pissangagaara. Inuttut. Oqaluttuassakka uannut tunngasut
aamma oqimaatsuusinnaapput. Inuunerami oqaluttuarisussaavara, oqarpoq
misigisimasanilu eqqaallugit, soorlu sinnganeq kannguttaatsuliornerlu,
nipilersortartutut ilisimaneqarluartutut misigisartakkani qanigisaanullu
sunniuteqarsinnaasut.
-
Nuannersuinnaanngilarmi. Nipilersortartutut angalalluni
nuannarigaluaraanniluunniit ulloq naallugu sulisariaqarpoq, nassuiaavoq.
Inissiisarfimmiittut
akornanni ilisarisimasami ilaat naapissinnaallugit aammattaaq ilimagisinnaavaa.
- Tamanna
eqqarsaatigisimavara. Inissiisarfimmiittunik
ilisarisimasaqarsimassajunnarsivunga. Immaqa eqqumiissaaq. Nalinginnaasumilli ilassiussallugit
ilimagaara, aamma oqaloqatigiinnerup qanoq aallarnernissaa aammalu siunertap
anguniakkallu oqaluttuarinissaa apeqqutaavoq.
Nanookikkut
erinarsuutaasa ilaat inissiisarfimmiittut qilanaarisinnaasaat tassaavoq
“Kisimiinneq”, Nanookikkut saqqummersitaanit siullermit
nuannarineqarluartumeersoq. Erinarsuut Frederik Elsnerip Frederikshavnimi
niuernermik ilinniarnermini allataa.
-
Kiserliungaarama misigisimasanni artornarnerpaat ilagaat.
Unammillernartorpassuaqarpoq, kisianni aamma taamanikkut taalliat pitsaasut
allappakka. Arlalippassuit taallianni imminnut ilisarisinnaapput, Frederik
Elsner owqarpoq nangillunilu:
- Erinarsuut
allatorluinnaq atussavara, tassani taalliaq sallitillugu nipilersuut
tunuliaqutarissavara.
Apriilip
tallimaani Ilulissani pineqaatissinneqarsimasunut inissiisarfimmi
tusarnaartitsinerit misiliutaasumik aallarnerneqassapput. Tassani Frederik
Elsnerip Nanookikkut 2009-mi saqqummersitaanni nuannarineqarluartumik
nutarterilluni atuinera inissiisarfinniittunit qanoq tiguneqassanersoq
takuneqarsinnaassaaq.
