Aajap inuiattut ullorsiornerup nalliussinera aallartikkaa
Inuiattut ullorsiornerup Danmarkimi malunnartinneqarnera siusissukkut aallartippoq.
Aalborgimi inuiattut ullorsiorneq Kalaallit Illuutaata tunuani kaffisortitsinermik ullaarnganiik aallarnerneqarpoq.
Pisortaaneq Anna Lynge tikilluaqqusereermat Aalborgimi seqinnarissuup ataani erinarsoqatigiit Arsarnerit erinarsorneranni Erfalasorput amuneqarpoq.
Ullaakkut oqalugiartoq pingaarnerpaaq tassaavoq Aaja Chemnitz, taassumalu kalaallit illui pillugit oqalugiarpoq.
- Kalaallit sisamararterutaat Danmarkimi najugaqarput. Taamaammat kalaallit illui pingaaruteqarput taakkunanimi katersuuttaratta, kalaaliminernik nereqatigiilluta nuannisaaqatigiissinnaallutalu – maannatut.
- Kalaallit Illuutaanni kikkut tamarmik – tunuliaqutaat oqaatsitillu apeqqutaatinnagit – inissaqarnerat pitsaanerpaavoq. Tassani kikkut tamarmik Kalaallit Nunaannik soqutiginnittut naapittarput illaqatigiissinnaallutillu – aamma immitsinnut. Tamanna politikkikkut oqallinnermi ilinniarfigisinnaavarput, folketingimut ilaasortaq oqarpoq.
Ulloq sivisooq
Aaja Chemnitzimut ulloq sivisussaaq. Aalborgimi aallartinnermi kingorna Aaja Chemnitz qimuttuitsunik Københavniliarpoq, tassanilu ullup ingerlanerani Kalaallit Illuutaanni Løvstrædemiittumi aamma oqalugiassalluni.
Aalborgimi ullaakkut aaqqissuussaq naggaserlugu Jyllandip avannaani kalaallit erinarsoqatigiit ilaat, Ikinngutigiit, pilersaarutaanngitsumik nikueriarlutik erinarsorlutik nuna asiilasooq atorpaat.
Aalborgimi inuiattut ullorsiorneq ullaakkorsioqatigiinnermik aallartinneqareermat Nørresundbymi Vor Frue Kirkemi aamma Løvvangens Kirkecenterimi kalaallisut naalagiaqatigiittoqarpoq. Nørresundbymi kalaallit peqatigiiffiat Ikerasak nalliuttorsiornermik aaqqissuussisuuvoq, tassani ulloqeqqasioqatigiittoqassaaq unnukkukkullu umimmaap quttoraanik nereqatigiittoqassalluni.
Aalborgip uumasuusivissuani ualikkut aamma inuiattut ullorsiorneq nalliussineqassaaq, tassani naatsiivik Kalaallit Nunaannik soqutiginnittunut tamanut ammassaaq. Aaqqissuussinermi ileqquusumik Aalborgip borgmesteria Lasse Frimand Jensen oqalugiassaaq, kaffillertoqassaaq Aalborg Street Lab-imillu nerisassanik misilitassanik sassaalliisoqassalluni. Nipilersornermik aliikkusersuinertalimmik ulloq naggaserneqassaaq, Uumasuusivissuarmilu silami siatsilluni ataatsimut unnukkorsioqatigiittoqarluni.
Aalborgip uumasuusivissuani aamma kalaallit Jyllandip avannaani ilinniakkaminnik naammassinerat ualikkut nalliuttorsiutigineqassaaq.
