Nuuk International Film Festivalip
ammaanersiornerani filmi kingulleq takutinneqartoq “Agga”-mik qulequtaqarpoq
Laila K. Hansenimillu ilitsersorneqarluni.
Piviusulersaarut erinarsortartoq
isiginnaartitsisartorlu tusaamasaalluinnartoq Agga Dam Pedersen pillugu
ilisarititsineruvoq. Arnaq filmini USA-mi, Europami Issittumilu arlalinni
inuttaanikoq.
Nuuk International Film Festivalip
ammaanersiornerani filmi kingulleq takutinneqartoq “Agga”-mik qulequtaqarpoq
Laila K. Hansenimillu ilitsersorneqarluni.
Piviusulersaarut erinarsortartoq
isiginnaartitsisartorlu tusaamasaalluinnartoq Agga Dam Pedersen pillugu
ilisarititsineruvoq. Arnaq filmini USA-mi, Europami Issittumilu arlalinni
inuttaanikoq.
Agga Dam Pedersen kalaallit
isiginnaartitsisartut filmiliortartullu oqaluttuarisaaneranni tusaamasaanerpaat
ilagaat. TV-kkut radiokkullu meeqqanoortuni peqataasarsimavoq aamma filmiliani
annertuuni allani. Agga isiginnaartitsisartunik Silamiunik pilersitseqataavoq
isiginnaartitsinernillu arlalinnik suliaqartarsimalluni aamma filmini
”Qaammarngup Uummataa”-ni ”Frøken Smillas fornemmelse for Sne”-milu
peqataanikuulluni. CV-a kilometerinik arlalinnik takissuseqarsimassaaq.
Uanga nammineq ’91-imi
inunngortuullunga Agga peroriartorfigaara takussaajuaannartuuneralu
sungiusimallugu. Immaqa taamaattussaannartut isigisoorsimavara. Filmi takugakku
taama misigisimavunga, Agga qanoq iliuuseqartigisimaneranik paasinnilersutut
illunga. A assaa inuiaqatigiinnut, inunnut, naggueqatigiit Inunnut
minnerunngitsumillu arnanut suliaqarsuaarsimavoq.
Agga Dam Pedersen uini Uffe
peqatigalugu Katuami issiavoq. Filmi tamaat aatsaavissuaq isiginnaarpaa.
Isiginnaartut filmimi “Unnulersumi
Sila” aamma “Arnaq ai” takutinneqarmata erinarsoqataapput aamma “Ukioq
Naagujoq” KNR-ip ukiutoqqamut aallakaatitassiaa takutinneqarmat illarput.
Kulturikkut inuk tusaamasaq ukiuni
40-ni nipiminik kimittuumik nuna tamakkerlugu nuannaartorineqartumik
nersorinninnermi Katuap filmertarfia inunnik assigiinngitsunik ukiulinnik
ulikkaarpoq.
Spiralilerneqartunut ilaasoq
Akunnerup ataatsip ingerlanerani
filmi killitsinnartumik naammassineqarpoq, isiginnaartullu nikuillutik
ersaartaapput.
Agga Dam Pedersenip mikrofoni
tigoriarlugu qujassuteqarpoq. Killitsisimavoq uluaatigullu qullii kuupput.
- Aperineqaruma suli tusarnaartunut
erinarsorsinnaanersunga ajoraluartumik naaggaassaanga, Agga Dam Pedersen
qujassuteqarluni oqalugiarnermini oqarpoq.
Qissaserpoq.
- Erinarsorsinnaajunnaarnikuuvunga.
Nipera qangatut atorsinnaajunnaarnikuuvoq.
Saqqummertarnini sakkortooq
pissuteqartoq oqarpoq.
- Filmi una arnanut uattut
spiralilerneqarsimasunut tunniuppara, Agga oqarpoq.
Inersuaq nipaaruppoq.
- Arnat nakussatsikkusullugit
kalaallillu allat arnanut tapersersuissasut qinnuigaakka. Arnat taakku
pilluaqquakka filmerlu ilissinnut tunniullugu.
Inuit nikuipput
ersaartaatilerlutillu. Killitsisimapput qissaseriaannaallutillu. Tassanngaannaq
erinarsortartoq Paaliit Mølgaard nipilersortartoq Johannes Sigurdsen
peqatigalugu takkupput Aggalu ataqqiniarlugu "Nukappiaraq tikeraaq“
appillugu.
Katuamiit ingerlagama
aalassassimaarnera malugaara, oqaasertalerneqarsinnaanngitsumillu
nuannaarlunga. Unnuk puiunaatsoq, tupinnaqaaq issittumi isiginnaagassiat qanoq
tunisisinnaatiginerat! Nuuk International Filmfestival qujanaq unnummut
puiunaatsumut.
