Agga pillugu piviusulersaarut Kalaallit Illuutaata takutilerpaa

Kalaallit isiginnaagassiaat pingasut takutinneqarnissaannut Københavnimi Kalaallit Illuutaat qaaqqusivoq

Agga Dam Pedersen pillugu isiginnaagassiaq 'Agga' Kalaallit Illuutaanni sisamanngornermi takutinneqassaaq.

Erinarsortartoq isiginnaartitsisartorlu tusaamasaq Agga Dam Pedersen - immaqa Agga Olsenitut ilisimaneqarluartoq - pillugu filmiliaq minutsinik 60-inik sivisussusilik Københavnimi Kalaallit Illuutaanni sisamanngornermi isiginnaarneqarsinnaavoq.

Laila Hansenip filmiliaa naatsoq ‘Qaammaallak’ aamma inummik ilisarititsilluni isiginaagassiaa ‘Agga’ takutinneqassapput.

- Agga piviusulersaarutaavoq erinarsortartoq isiginnaartitsisartorlu tusaamasaq Agga Olsen pillugu. Taanna USA-mi, Europami Issittumilu isiginnaartitsisarnikuuvoq filminilu arlalinni peqataalluni tusarnaartitsisarnikuullunilu. 1970-ikkunni, 80-ikkunni, 90-ikkunni 2000-ikkunnilu erinnaminik pikkunartumik nunarsuup sinnerani tupigusutsitsisarsimavoq, Kalaallit Illuutaat isiginnaagassiaq pillugu allappoq.

Qaammaallak, meeqqanut filmiliaq (10+), aamma takutinneqassaaq. Filmimi pingaarnertut inuttaasoq ukiumi 1015-imi Sermermiuni (maannakkut Ilulissani) inuusoq aanaminit angakkumit siunissamut aallartinneqarpoq. Taanna Ilulissani 2015-imi meeqqat ukioqatini akornanniilertoq isiginnaagassiami malinnaavigineqarpoq.

Filminik ilitsersuisoq Laila Hansen aaqqissuussami najuutissaaq, filmiliamilu marluk qanoq pilersinneqarsimanerannik oqaluttuassaaq.

Aamma Inga Hansenip isiginnaagassiaa 'Nutaaliaasumik inuuneqalernerup arnat siuttunngortippai' immikkut takutinneqassaaq.

Powered by Labrador CMS